टेलिग्राम व व्हॉट्सॲप 'इन्व्हेस्टमेंट फ्रॉड' रॅकेटचा पर्दाफाश; पुण्यासह नवी मुंबईतून भामटे पोलिसांच्या जाळ्यात

मुंबई: सोशल मीडिया प्लॅटफॉर्म व्हॉट्सॲप आणि टेलिग्राम ग्रुपच्या माध्यमातून शेअर बाजारात गुंतवणुकीवर मोठा परतावा मिळवून देण्याचे आमिष दाखवून तब्बल १ कोटी ८९ लाख २५ हजार रुपयांची आर्थिक फसवणूक करणाऱ्या एका मोठ्या आंतरराज्य रॅकेटचा मुंबई पोलीस गुन्हे शाखेच्या पश्चिम विभाग सायबर पोलीस ठाण्याने पर्दाफाश केला आहे. या सायबर गुन्ह्यासाठी बनावट चालू बँक खाती (Current Accounts) उघडून गुन्हेगारांना पुरवणाऱ्या आणि पैशांची आपापसात विल्हेवाट लावणाऱ्या ४ प्रमुख आरोपींना अटक करण्यात पोलिसांना यश आले आहे.

पश्चिम विभाग सायबर पोलीस ठाण्यात दाखल गुन्हा नोंद क्रमांक १९०/२०२६ नुसार भारतीय न्याय संहितेचे कलम ३१८(४), ३१९(२), ३३६(२), ३३६(३), ३३८, ३४०(२), ३(५) सह माहिती तंत्रज्ञान कायदा कलम ६६(क), ६६(ड) अन्वये गुन्हा नोंदवण्यात आला आहे. सायबर गुन्हेगारांनी तक्रारदाराशी व्हॉट्सॲपवर संपर्क साधून त्यांना 'NAM AMC HNW' नावाच्या बनावट शेअर मार्केट ट्रेडिंग ॲपची लिंक पाठवली होती. या ॲपद्वारे गुंतवणूक केल्यास भरघोस नफा मिळेल असे आमिष दाखवून सायबर भामट्यांनी तक्रारदाराकडून १,८९,२५,००० रुपये वेगवेगळ्या बँक खात्यांवर भरण्यास भाग पाडून फसवणूक केली.

अटक आरोपी आणि त्यांची गुन्ह्यातील कार्यपद्धती:

१. विठ्ठल लक्ष्मण वाघमोडे (वय ३६, रा. इंदापूर, जि. पुणे): त्याने मुख्य आरोपींच्या सांगण्यावरून बँक ऑफ इंडियामध्ये बनावट माहितीच्या आधारे चालू खाते उघडले. हे खाते '786-Wisdom Launch Club' हा व्हॉट्सॲप व टेलिग्राम ग्रुप चालवणाऱ्या भामट्यांना सायबर फसवणुकीचे पैसे स्विकारण्यासाठी दिले. २. रमेश हरिबा लवंगारे (वय ४९, रा. कामोठे, नवी मुंबई): टेलिग्राम ग्रुपचा सक्रिय सदस्य बनून सांगण्यानुसार इतर व्यक्तींची बनावट बँक खाती उघडून ती सायबर गुन्ह्यासाठी पुरवत असे. ३. नानासाहेब अरुण पारखे (वय ३३, रा. कळंबोली, पनवेल): त्याने प्रथम स्तरावरील लाभार्थी (First Layer Beneficiary) विठ्ठल वाघमोडे याला खाते उघडून देण्यास मदत केली आणि खात्यावर आलेली फसवणुकीची रक्कम काढून त्याची विल्हेवाट लावली. ४. अमोल शांतीलाल कुंभार (वय ३९, रा. कामोठे, नवी मुंबई): प्रथम बेनिफिशिअरी खात्यावर आलेली रक्कम स्वतःच्या खात्यावर वळवून ती इतर आरोपींमध्ये समान वाटून घेऊन अपहार करत असे.

तपास पथकाने या कारवाईत आरोपींच्या ताब्यातून ६ अँड्रॉइड मोबाईल हँडसेट आणि ९,८६,४०० रुपयांची रोख रक्कम जप्त केली आहे. याशिवाय सायबर पोर्टलवर तातडीने कारवाई करत आरोपींच्या बँक खात्यांतील २८,५६,२९३ रुपयांची रक्कम यशस्वीरीत्या गोठवली (Freeze) आहे.

ही  कारवाई बृहन्मुंबई पोलीस आयुक्त देवेन भारती,  सह आयुक्त (गुन्हे) अनिल कुंभारे, अपर  आयुक्त (गुन्हे) कृष्णकांत उपाध्याय, उप आयुक्त बजरंग बनसोडे आणि सहायक आयुक्त सुवर्णा शिंदे यांच्या मार्गदर्शनाखाली करण्यात आली. प्रत्यक्ष कारवाईत प्रभारी निरीक्षक संदीप पाटील, सहायक निरीक्षक पूनम जाधव, अ‍ंजली वाणी, शंकर पाटील, उपनिरीक्षक शिवाजी सावले, शिपाई केशव तकीक व मोहित नेलावडे यांनी विशेष परिश्रम घेतले.

मुंबई पोलिसांच्या महत्त्वाच्या सायबर सुरक्षा सूचना: 

१. कोणत्याही अनोळखी मोबाईल किंवा व्हॉट्सॲप नंबरवरून आलेली APK फाईल किंवा ZIP फाईल डाऊनलोड किंवा एक्स्ट्रॅक्ट करू नका. २. सोशल मीडियावरून शेअर मार्केटमध्ये हमखास परतावा मिळवून देण्याचा दावा करणाऱ्या कोणत्याही व्यक्तीवर विश्वास ठेवू नका. ३. कोणतीही संस्था किंवा ब्रोकर SEBI (भारतीय रोख आणि विनिमय मंडळ) कडे नोंदणीकृत आहे का, याची अधिकृत संकेतस्थळावर स्वतंत्र पडताळणी केल्याशिवाय पैसे गुंतवू नका. ४. कमी कालावधीत दुप्पट नफा, व्हीआयपी ट्रेडिंग अकाऊंट किंवा गॅरंटीड प्रॉफिटच्या आमिषाला बळी पडू नका. ५. गुंतवणुकीसाठी वैयक्तिक किंवा अनोळखी बँक खात्यांवर पैसे जमा न करता अधिकृत व पडताळलेल्या माध्यमांचाच वापर करा.

• Labels: Investment Fraud, Cyber Crime Mumbai, Share Market Scam, Mumbai Police Crime Branch, Fake Bank Accounts

• Search Description: Mumbai Cyber Police arrest 4 members of a gang providing fake bank accounts for Rs 1.89 crore share market investment fraud.

• Hashtags: #InvestmentScam #CyberCrime #MumbaiPolice #ShareMarketFraud #CrimeNews #CyberSecurity