बनावट सीमकार्ड अन् 'डिजिटल अरेस्ट'च्या नावाने १.१२ कोटींची लूट; बँक मॅनेजर आणि वेब डेव्हलपरसह ६ जण गजाआड

मुंबई: बनावट सीमकार्डचा वापर करून २३८ कोटी रुपयांच्या मनी लॉड्रिंग प्रकरणात नाव आल्याची आणि सुप्रीम कोर्टाची बनावट नोटीस पाठवून 'डिजिटल अरेस्ट'ची भीती दाखवत एका ६८ वर्षीय ज्येष्ठ नागरिकाची १ कोटी १२ लाख २६ हजार रुपयांची आर्थिक फसवणूक करणाऱ्या आंतरराज्य टोळीचा मुंबईच्या नॉर्थ सायबर पोलीस ठाण्याने पर्दाफाश केला आहे. या हायटेक सायबर गुन्ह्यात थेट इंडसइंड बँकेच्या ऑपरेशनल मॅनेजर हेडसह आयआयटी पदवीधर असलेल्या एका आयटी वेब डेव्हलपर आणि बँक खाती पुरवणाऱ्या एकूण ६ आरोपींना पोलिसांनी जेरबंद केले आहे.

नॉर्थ सायबर पोलीस ठाण्यात दाखल गुन्हा नोंद क्रमांक १८६/२०२६ नुसार भारतीय न्याय संहितेचे कलम २०४, ३०८(७), ६१(२), ३१८(४), ३१९(२), ३३६(२), ३३६(३), ३३८, ३४०(२), २३८ सह माहिती तंत्रज्ञान कायद्याच्या कलम ६६ (क) व ६६ (ड) अन्वये गुन्हा दाखल करण्यात आला आहे. दहिसर येथील रहिवासी असलेल्या ६८ वर्षीय तक्रारदारास ३० जुलै २०२६ ते १२ ऑगस्ट २०२६ दरम्यान व्हॉट्सॲप व्हिडिओ कॉलद्वारे संपर्क साधण्यात आला होता. आरोपींनी स्वतःची ओळख भारतीय दूरसंचार विभागातील अधिकारी म्हणून सांगत तक्रारदाराच्या सीमकार्डवरून २३८ कोटींचा मनी लॉड्रिंग घोटाळा झाल्याचा आणि त्यांच्यावर दिल्ली येथे गुन्हा दाखल झाल्याचा बनाव रचला.

तक्रारदाराला सुप्रीम कोर्टाचे बनावट समन्स व नोटीस पाठवून पोलीस गणवेश परिधान केलेले भामटे व्हिडिओ कॉलवर आले. त्यांनी राष्ट्रीय तपास यंत्रणा, ईडी आणि पोलिसांचे बनावट शिक्के व लेटरहेड वापरून अटकेची तीव्र भीती घातली. तक्रारदाराला तब्बल १३ दिवस घरातच 'डिजिटल अरेस्ट'मध्ये ठेवून त्यांच्या बँक खात्यातील १,१२,२६,००० रुपये वेगवेगळ्या चालू बँक खात्यांवर वर्ग करण्यास भाग पाडले.

तपासादरम्यान नॉर्थ सायबर पोलिसांच्या पथकाने तांत्रिक विश्लेषण करून फसवणुकीची रक्कम ज्या प्रथम स्तरावरील चालू खात्यात (Current Account) गेली, त्याचा माग काढला. त्या आधारे खाते खरेदी-विक्री करणारे व पैशांची विल्हेवाट लावणारे जाळे उघडकीस आणले. या प्रकरणात पोलीस ठाण्याने २१ ऑगस्ट ते २९ ऑगस्ट २०२६ दरम्यान टप्प्याटप्प्याने सहा आरोपींना अटक केली.

अटक करण्यात आलेले आरोपी आणि त्यांची भूमिका: 

१. राजेशकुमार मोहनलाल जैन (वय ५४, रा. दादर पूर्व, मुंबई): अभय देव गोल्ड प्रा. लि. कंपनीचा संचालक आणि बँक खातेधारक. २. मोहम्मद तारिक अन्वर मोमीन (वय ४९, रा. दादर पूर्व, मुंबई): वेगवेगळ्या व्यक्तींचे बनावट चालू खाते उघडून ते गुन्हेगारांना पुरवणारा. ३. शिखर मुकेश त्यागी (वय २८, रा. सायन, मुंबई - बी.कॉम, बीएमए): इंडसइंड बँकेचा ऑपरेशन्स मॅनेजर हेड. ४. गौरव महेश गोयल (वय ४०, रा. गोरेगाव पूर्व, मुंबई - बी.ई. आयआयटी दिल्ली): वेब डेव्हलपर, ज्याच्यावर यापूर्वी वांद्रे पोलीस ठाण्यात फसवणुकीचा गुन्हा दाखल आहे. ५. अजयकुमार कालीप्रसाद शर्मा (वय ३५, रा. काल्हेर, जि. ठाणे - बी.ए.): मोबाईलद्वारे सायबर गुन्हेगारांना ॲक्सेस देणारा मध्यस्थ. ६. चिंतनकुमार सुरेशभाई देसाई (वय ४६, रा. सुरत, गुजरात - बी.ए.): मुंबईतून विमानाने दिल्ली व तेथून बिजनूर (उत्तर प्रदेश) येथे जाऊन सहकाऱ्यांमार्फत रकमेची विल्हेवाट लावणारा मुख्य सूत्रधार.

गुन्ह्याची कार्यपद्धती (Modus Operandi):
आरोपी राजेशकुमार जैन यांच्या अभय देव गोल्ड प्रा. लि. या कंपनीचे इंडसइंड बँकेत चालू खाते होते. आरोपी मोहम्मद तारिक मोमीन याने दादरमधील एका मोबाईल दुकानातून दोन नवीन मोबाईल खरेदी केले. त्यातील एका मोबाईलमध्ये कंपनीच्या पहिल्या संचालकाचे तर दुसऱ्या मोबाईलमध्ये दुसऱ्या संचालकाचे बँकेशी लिंक असलेले सीमकार्ड टाकले. हे दोन्ही मोबाईल इंडसइंड बँकेचा ऑपरेशन्स मॅनेजर शिखर त्यागी याला देण्यात आले. त्यागीने एक मोबाईल स्वतःकडे ठेवून तो अजयकुमार शर्माला दिला, तर दुसरा मोबाईल आयआयटी पदवीधर गौरव गोयलला दिला. गौरव गोयलने हा मोबाईल सुरतचा आरोपी चिंतनकुमार देसाई याच्या स्वाधीन केला. चिंतनकुमार देसाई विमानाने दिल्ली आणि तेथून बिजनूर येथे पोहोचला व सहकाऱ्यांच्या मदतीने तक्रारदाराची रक्कम खात्यात वर्ग करून घेत विल्हेवाट लावली.

पोलीस पथकाने आरोपींच्या ताब्यातून २ लॅपटॉप, २० मोबाईल फोन, २५ निरनिराळ्या व्यक्तींचे बँक अकाऊंट्स, पासबुक, एटीएम कार्ड्स आणि आधार कार्ड्स असा मोठा मुद्देमाल जप्त केला आहे.

ही धडक कारवाई बृहन्मुंबई पोलीस आयुक्त देवेन भारती,  सह आयुक्त (गुन्हे) अनिल कुंभारे, अपर  आयुक्त (गुन्हे) कृष्णकांत उपाध्याय, उप आयुक्त बजरंग बनसोडे, सहायक आयुक्त सुवर्णा शिंदे आणि वरिष्ठ  निरीक्षक प्रमोद कांबळे यांच्या मार्गदर्शनाखाली निरीक्षक सुनील लोखंडे, सहायक  निरीक्षक सुदर्शन पाटील,  हवालदार रवी पाटील व शिपाई अक्षय साळवे यांच्या पथकाने केली.

मुंबई पोलिसांचे नागरिकांना महत्त्वाचे आवाहन: 

१. पोलीस, सीबीआय, ईडी, आरबीआय किंवा कोणतीही सरकारी संस्था कधीही 'डिजिटल अरेस्ट' करत नाही. २. भारतीय कायद्यात डिजिटल अरेस्ट अशी कोणतीही कायदेशीर तरतूद अस्तित्वात नाही. ३. अनोळखी व्यक्तींचे व्हॉट्सॲप व्हिडिओ कॉल स्वीकारू नका अथवा भीतीपोटी पैसे वर्ग करू नका. ४. संशयित कॉल आल्यास तत्काळ जवळच्या पोलीस ठाण्याशी संपर्क साधा किंवा १००/१९३० या राष्ट्रीय हेल्पलाइनवर तक्रार नोंदवा.

• Labels: Cyber Crime, Digital Arrest, Mumbai Police, IndusInd Bank Fraud, Crime News Mumbai, Cyber Fraud

• Search Description: Mumbai Cyber Police arrest 6 including IndusInd Bank operational manager and IIT developer for Rs 1.12 crore Digital Arrest fraud.

• Hashtags: #CyberCrime #DigitalArrest #MumbaiPolice #CyberFraud #IndusIndBank #CrimeNews #CyberSecurity