गांजा विक्री करणाऱ्या सराईत टोळीचा काळेपडळ पोलिसांकडून पर्दाफाश; ६ आरोपींना बेड्या, चारचाकी वाहनासह ८ लाख ५५ हजारांचा मुद्देमाल जप्त

 

पुणे (विशेष बातमीदार): पुणे शहरातील अंमली पदार्थांच्या अवैध विक्री आणि पुरवठ्याविरोधात काळेपडळ पोलिसांनी मोठी कारवाई करत एका सराईत टोळीचा पर्दाफाश केला आहे. २१ सप्टेंबर २०२६ रोजी एसआरपीएफच्या मोकळ्या मैदानात गांजा विक्रीसाठी आलेल्या एका इसमाला रंगेहात पकडल्यानंतर, पोलिसांनी तपासाची चक्रे वेगाने फिरवत त्याला गांजा पुरवठा करणाऱ्या आणखी ५ सराईत आरोपींना बेड्या ठोकल्या. या संपूर्ण कारवाईत पोलिसांनी १०४४ ग्रॅम गांजा, एक चारचाकी कार आणि मोबाईल फोन असा एकूण ८ लाख ५५ हजार रुपये किंमतीचा मुद्देमाल जप्त केला आहे.

काळेपडळ पोलीस ठाण्याचे तपास पथक २१ सप्टेंबर रोजी परिसरात अवैध धंद्यांवर कारवाई करण्यासाठी पेट्रोलिंग करत होते. या दरम्यान पोलीस अंमलदार विशाल ठोंबरे, महादेव शिंदे, नितीन ढोले आणि गिरीराज जगदाळे यांना त्यांच्या गोपनीय बातमीदाराद्वारे माहिती मिळाली की, हडपसर येथील एस.आर.पी.एफ.च्या मोकळ्या मैदानात झाडाजवळ एक इसम संशयितरीत्या पांढऱ्या रंगाची पिशवी हातात घेऊन उभा आहे आणि त्याच्याकडे गांजा हा अंमली पदार्थ असण्याची शक्यता आहे.

 
एसआरपीएफ मैदानात छापा अन् मुख्य विक्रेता ताब्यात

मिळालेल्या पक्क्या बातमीच्या आधारे तपास पथकाचे अधिकारी सहायक पोलीस निरीक्षक अमित शेटे आणि रात्रगस्त अधिकारी सहायक निरीक्षक रत्नदिप गायकवाड यांनी वरिष्ठ निरीक्षक गिरीषा निंबाळकर यांना माहिती दिली. वरिष्ठांच्या सूचनेनुसार पोलिसांनी दोन पंच साक्षीदारांना सोबत घेऊन एसआरपीएफ मैदानात छापा टाकला. तेथे संशयितरीत्या थांबलेल्या योगेश प्रल्हाद अडसुळ (वय ४० वर्षे, रा. अखिल एकता कॉलनी, रेल्वे गेटशेजारी, काळेपडळ, हडपसर, पुणे) याला ताब्यात घेऊन त्याची झडती घेतली असता, त्याच्याकडे १०४४ ग्रॅम वजनाचा गांजा आढळून आला. याप्रकरणी काळेपडळ पोलीस ठाण्यात गुन्हा नोंदवून आरोपीला अटक करण्यात आली.

 
पुरवठादारांच्या साखळीचा शोध अन् ५ सराईत साथीदारांना अटक

अटक आरोपी योगेश अडसुळ याच्याकडे सहायक निरीक्षक अमित शेटे यांनी कसून चौकशी केली असता, त्याने त्याला गांजा पुरवठा करणाऱ्या साथीदारांची नावे उघड केली. पोलिसांनी तत्परतेने कारवाई करत गांजा पुरवठा करणाऱ्या ५ आरोपींना शोधून काढत अटक केली:

विजय राजू हुबळीकर (वय २९ वर्षे, रा. भिमाले हाईट्स, कोथरूड, पुणे)
बबन बाबूराव दांडगे (वय ३९ वर्षे, रा. भिमाले हाईट्स, कोथरूड, पुणे)
अशोक उर्फ अक्षय सतीश जाधव (वय २८ वर्षे, रा. भिमाले हाईट्स, कोथरूड, पुणे)
साहिल सुभाष ठोंबे (वय २७ वर्षे, रा. गुरुवार पेठ, पुणे)
विकास संदीप बोदडे (वय २० वर्षे, रा. भिमाले हाईट्स, कोथरूड, पुणे)

अशी त्यांची नावे आहेत.

  
सराईत गुन्हेगारी पार्श्वभूमी अन् ८.५५ लाखांचा मुद्देमाल जप्त

अटक करण्यात आलेल्या आरोपींच्या पोलीस रेकॉर्डची पाहणी केली असता, त्यांच्यावर कोथरूड, यवत, वानवडी, नगर तालुका आणि भिंगार पोलीस ठाण्यात खून, खुनाचा प्रयत्न करणे आणि एन.डी.पी.एस. (NDPS) कायद्यांतर्गत गंभीर गुन्हे दाखल असल्याचे निष्पन्न झाले आहे. पोलिसांनी या कारवाईत आरोपींकडून एक चारचाकी कार, मोबाईल फोन आणि गांजा असा एकूण ८,५५,००० रुपये किंमतीचा मुद्देमाल जप्त केला आहे.

आरोपींविरुद्ध काळेपडळ पोलीस ठाण्यात गुन्हा नोंद क्रमांक ४५९/२०२६ अन्वये अंमली पदार्थ विरोधी कायदा (NDPS Act) कलम ८ (क), २० (ब) (ii) (ब) नुसार गुन्हा दाखल करण्यात आला असून गुन्ह्याचा पुढील तपास सहायक निरीक्षक अमित शेटे करत आहेत.

सदर  कारवाई उपायुक्त (परिमंडळ ६) जीवन बेनीवाल आणि सहायक आयुक्त (हडपसर विभाग) अतुलकुमार नवगिरे यांच्या मार्गदर्शनाखाली वरिष्ठ निरीक्षक गिरीषा निंबाळकर व निरीक्षक (गुन्हे) अण्णासो बाबर यांच्या सूचनेनुसार पार पडली. या कारवाईत सहायक निरीक्षक रत्नदिप गायकवाड, अमित शेटे, सहायक  उपनिरीक्षक राजस शेख तसेच अंमलदार प्रवीण काळभोर, अमोल फडतरे, दाऊद सय्यद, प्रतीक लाहिगुडे, शाहीद शेख, निलेश देसाई, विशाल ठोंबरे, अतुल पंधरकर, नितीन ढोले, सद्दाम तांबोळी, प्रदीप बेडीस्कर, महादेव शिंदे, गिरीराज जगदाळे आणि अमोल जाधव यांनी महत्त्वपूर्ण भूमिका बजावली.

• Labels: Pune Crime News, Kalepadal Police Station, Ganja Seized Pune, NDPS Act Pune, Pune Police Arrest

• Search Description: Kalepadal police station arrested 6 hard-core criminals involved in illegal ganja supply and trade in Hadapsar Pune, seizing assets worth Rs 8.55 lakh.

• Hashtags: #PunePolice #KalepadalPolice #PuneCrime #NDPSAct #DrugFreePune #CrimeNews #HadapsarNews