महिलेचा विनयभंग करणाऱ्या आरोपीस १ वर्ष सक्तमजुरी; दौंड रेल्वे न्यायालयाचा मोठा निकाल

पुणे/दौंड, ९ सप्टेंबर २०२६: रेल्वे प्रवासादरम्यान महिला प्रवाशाचा विनयभंग करणाऱ्या आरोपीला दौंड रेल्वे न्यायालयाचे प्रथम वर्ग न्यायदंडाधिकारी सुनील दहातोंडे यांनी दोषी ठरवत १ वर्षे सक्तमजुरी आणि ३,००० रुपये दंडाची कडक शिक्षा सुनावली आहे. रौफ रब्बानी शेख (वय ४०, रा. श्यामनगर, लातूर) असे शिक्षा सुनावण्यात आलेल्या आरोपीचे नाव आहे.

घटनेची पार्श्वभूमी अशी की, २६ ऑगस्ट २०१४ रोजी तक्रारदार महिला लातूर ते मुंबई असा रेल्वे प्रवास करत होती. सदरची रेल्वे गाडी दौंड रेल्वे स्थानकातून सुटल्यानंतर १० ते १५ मिनिटांनी आरोपी रौफ शेख याने अंधाराचा फायदा घेऊन महिलेशी लज्जा उत्पन्न होईल असे वर्तन केले होते. या घटनेनंतर महिलेने दिलेल्या तक्रारीवरून दौंड लोहमार्ग पोलीस ठाण्यात भारतीय दंड संहितेच्या कलम ३५४ नुसार गुन्हा नोंदवण्यात आला होता.

सदर गुन्ह्याचा संपूर्ण तपास पूर्ण करून न्यायालयात दोषारोपपत्र दाखल करण्यात आले होते. सुनावणीदरम्यान न्यायालयाने सरकारी पक्षाचा युक्तिवाद आणि मांडलेले पुरावे तसेच साक्षीदारांची साक्ष पूर्णपणे ग्राह्य धरली. फौजदारी न्याय संहिता कलम २४८ (२) अन्वये आरोपीला दोषी ठरवत न्यायाधीशांनी १ वर्ष सक्तमजुरी व दंडाची शिक्षा घोषित केली.

या खटल्यात लोहमार्ग पोलीस आणि सरकारी वकिलांनी अत्यंत समन्वयाने काम केले. सहायक सरकारी अभियोक्ता प्रिया शिंदे, प्रभारी अधिकारी हिमालय जोशी आणि कोर्ट अंमलदार मोहम्मद शेख यांनी साक्षीदार आणि तपासी अंमलदारांना वेळेवर योग्य ते मार्गदर्शन (ब्रीफिंग) केले, ज्यामुळे न्यायालयात भक्कमपणे साक्ष नोंदवली गेली.

सदर कामगिरी लोहमार्ग पोलीस अधीक्षक डॉ. राजकुमार शिंदे, अपर अधीक्षक विशाल गायकवाड, उपविभागीय अधिकारी अजय शंकेश्वरी, सहायक निरीक्षक प्रभाकर कापुरे व उपनिरीक्षक शरणार्थी यांच्या मार्गदर्शनाखाली तपास अंमलदार हवालदार भीमा हागवणे व कोर्ट अंमलदार सहायक उपनिरीक्षक मोहम्मद शेख यांनी पार पाडली.

• Labels: Daund Railway Court, Railway Crime, Molestation Conviction, Pune Railway Police, Latur to Mumbai Train, Railway Security

• Search Description: Daund Railway Court sentenced Rauf Rabbani Shaikh to 1 year rigorous imprisonment for molesting a female passenger on a train in 2014.

• Hashtags: #DaundNews #RailwayPolice #JusticeForWomen #PuneCrime #CourtVerdict #SafetyInTrains