आजचा तरुण वैचारिकदृष्ट्या परिपक्व; स्वयंसिद्धा प्रतिष्ठानच्या कवी संमेलनात साहित्यिक सुहास घुमरे यांचे प्रतिपादन

 

निगडी, प्राधिकरण (१४ ऑगस्ट २०२६): आजचा तरुण वैचारिकदृष्ट्या अत्यंत परिपक्व आहे. मात्र, अतिउत्साहात स्वतःचे स्वातंत्र्य उपभोगताना दुसऱ्याच्या स्वातंत्र्यावर अतिक्रमण होणार नाही याची दक्षता प्रत्येक तरुणाने घेतली पाहिजे, असे प्रतिपादन प्रसिद्ध कवी, गझलकार आणि साहित्यिक सुहास घुमरे यांनी केले. स्वातंत्र्यदिनाच्या पूर्वसंध्येला आयोजित कवी संमेलनाच्या अध्यक्षस्थानावरून ते बोलत होते. घुमरे यांनी विद्यार्थ्यांना प्रबोधनपर गोष्टी सांगून काव्यलेखनासाठी प्रोत्साहन दिले आणि शुभेच्छा दिल्या.

स्वयंसिद्धा प्रतिष्ठान (पिंपरी चिंचवड, पुणे) यांच्या वतीने ८० व्या स्वातंत्र्यदिनाच्या पूर्वसंध्येला निमंत्रित कवी व विद्यार्थ्यांचे कवी संमेलन आणि निबंध स्पर्धेचे आयोजन निगडी येथील ज्ञान प्रबोधिनी नवनगर विद्यालयाच्या गुरुकुल विभागात करण्यात आले होते. या कार्यक्रमाला शाळेतील विद्यार्थी कवींचा उदंड प्रतिसाद लाभला. इयत्ता सातवी ते दहावीच्या विद्यार्थ्यांसाठी आयोजित 'विविधतेतील एकता' या विषयावरील निबंध स्पर्धेत १२६ स्पर्धकांनी सहभाग नोंदवून आपल्या विचारांची प्रगल्भता मांडली.

निबंध स्पर्धेतून बालमनाची निरागसता आणि वैचारिक एकात्मतेचे दर्शन

आयोजित निबंध स्पर्धेचे परीक्षण निवृत्त शिक्षिका आणि साहित्याजी रजनी अहेरराव यांनी केले. मनोगत व्यक्त करताना त्या म्हणाल्या, "विद्यार्थ्यांचे निबंध वाचताना कुठे बालमनाची निरागसता जाणवली, तर कुठे विचारांची प्रगल्भता दिसून आली. काही विद्यार्थ्यांनी अगदी साध्या विषयाकडेही अत्यंत वेगळ्या आणि सर्जनशील दृष्टिकोनातून पाहिले होते. 'विविधतेतून एकता' या विषयावरील निबंधांमधून आपल्या देशातील विविध भाषा, धर्म, संस्कृती, परंपरा आणि विचार यांच्यातील एकात्मतेची सुंदर जाणीव विद्यार्थ्यांनी आपल्या शब्दांत व्यक्त केली आहे."

कार्यक्रमाचे प्रमुख पाहुणे साहित्यिक व पत्रकार पितांबर लोहार यांनी आपल्या भाषणात भारतीय संस्कृती आणि कौटुंबिक मूल्यांवर प्रकाश टाकला. "भारतीय समाजव्यवस्था कुटुंबवत्सल आहे. यामध्ये आई-वडिलांच्या सेवेला देवतासमान महत्त्व आहे. भारतीय संस्कृतीचा हा एक महान संस्कार आहे. साक्षात परमेश्वरालाही युगानुयुगे विटेवर उभे करण्याची ताकद या संस्कारात आहे. पंढरपूरचे भक्त पुंडलिक आणि कमरेवर हात ठेवून उभा असलेला पांडुरंग हे याचे उत्तम उदाहरण आहे," असे लोहार म्हणाले. त्यांनी स्वतः रचलेली 'साथ चल' ही हिंदी रचना आणि भाऊ-बहिणीच्या नात्यावर आधारित 'आई बघ ना' ही मराठी कविता सादर करून उपस्थितांची दाद मिळवली.

साहित्याने क्रांतीची धग जिवंत ठेवली

स्वयंसिद्धा प्रतिष्ठानच्या अध्यक्षा सविता इंगळे यांनी प्रास्ताविक करताना स्वातंत्र्यलढ्यातील साहित्याचे महत्त्व अधोरेखित केले. "ज्याप्रमाणे देशाच्या स्वातंत्र्यसंग्रमात स्वातंत्र्यसैनिकांचे मोठे योगदान होते, त्याचप्रमाणे साहित्यिकांची भूमिकाही अत्यंत महत्त्वपूर्ण होती. साहित्यिकांनी आपल्या लेखणीच्या माध्यमातून लढाई लढली आणि समाजात देशभक्तीची ज्योत सतत तेवत ठेवली," असे इंगळे म्हणाल्या.

या कवी संमेलनात निमंत्रित कवींनी विविध राष्ट्रभक्तीपर रचना सादर केल्या. माधुरी विधाटे यांनी "समर्थ भारत होने का, रखते है अभिमान", निलेश शेंबेकर यांनी "स्वातंत्र्याचा दिव्य तिरंगा मनात कायम लहरत आहे...", माधुरी डिसोजा यांनी "झेंडा आमुच्या प्रिय देशाचा फडकत वरी महान...", सीमा गांधी यांनी "तिरंग्याची शान राखूया, देशासाठी जगूया..." आणि हेमंत जोशी यांनी "ब्रह्मांडातली एकमेव अन् सुंदर रचना म्हणजे भारत..." या रचना सादर केल्या. तसेच तानाजी एकोन्डे यांनी पांडुरंगाच्या भक्तीवर आधारित ओव्या गायल्या.

विद्यार्थी कवींच्या रचनांनी वेधले लक्ष

कवी संमेलनात तब्बल २१ विद्यार्थ्यांनी आपल्या स्वलिखित व निवडक रचना सादर करून उपस्थितांची वाहवा मिळवली. कणाद गोडसे, अर्चीस केळकर, अमेय पानसरे, अर्णव चापोलीकर, गार्गी तळोले, सायली बोरमाळे, आनंदी कुलकर्णी, राशी रोकडे, अद्विता, सारंग मुचरीकर, क्षिप्रा नरोटे, सुश्रुता कानडे आणि शर्वी भैय्या या विद्यार्थ्यांनी सादर केलेल्या कवितांमधून देशभक्ती, सैनिकांचे बलिदान आणि सामाजिक एकात्मतेचे दर्शन घडले.

कार्यक्रमाला ज्येष्ठ साहित्यिका शोभा जोशी यांची विशेष उपस्थिती होती. कार्यक्रमाच्या यशस्वी संयोजनासाठी राजश्री मराठे, श्रीराम, गुरुकुल विभागातील शिक्षक वर्ग आणि विद्यार्थ्यांनी विशेष परिश्रम घेतले. स्वयंसिद्धा प्रतिष्ठानचे उपाध्यक्ष नंदकुमार मुरडे यांनी सूत्रसंचालन केले, तर राजश्री मराठे यांनी उपस्थितांचे आभार मानले.

निबंध स्पर्धेचा अधिकृत निकाल

स्पर्धेत उत्कृष्ट लेखन करणाऱ्या खालील विद्यार्थ्यांना विजेते घोषित करून गौरवण्यात आले:

• इयत्ता सातवी:

  • प्रथम क्रमांक: स्वरा रामदास काळे

  • द्वितीय क्रमांक: आराध्या विष्णू कदम

• इयत्ता आठवी:

  • प्रथम क्रमांक: आरोही यशवंत काळे

  • द्वितीय क्रमांक: स्वरांजली विक्रम केसवड

  • तृतीय क्रमांक: अथर्व हेमंत जोगळेकर

• इयत्ता नववी:

  • प्रथम क्रमांक: शुद्धोधन योगेश भंडारी

  • द्वितीय क्रमांक: कौशिका कपिल दामल

• इयत्ता दहावी:

  • प्रथम क्रमांक: विश्वेश प्रशांत खैरनार

  • द्वितीय क्रमांक: आनंदी जगजीत कुलकर्णी

Labels:

Swayamsiddha Pratishthan, Pimpri Chinchwad, Kavi Sammelan, Independence Day 2026, Gnan Prabodhini Nigdi, Suhas Ghumre, Pitambar Lohar

Search Description:

Swayamsiddha Pratishthan organized a Kavi Sammelan and essay competition at Dnyan Prabodhini Nigdi on the eve of the 80th Independence Day.

Hashtags:

#PimpriChinchwad #NigdiNews #KaviSammelan #IndependenceDay #SwayamsiddhaPratishthan #MarathiSahitya #StudentPoets