स्वांतत्र्यदिनी रत्नागिरीत जनक्रोशाचा उद्रेक; न्यायहक्कासाठी जिल्हाधिकारी कार्यालयासमोर विविध संघटना व नागरिकांचे उपोषण

रत्नागिरी (१६ ऑगस्ट २०२६): देशभरात ८० वा स्वातंत्र्यदिन मोठ्या उत्साहात साजरा होत असताना, रत्नागिरीत मात्र प्रशासकीय अनास्था, पोलीस विभागाचा कारभार, भूमी अभिलेख मधील त्रुटी आणि बँक घोटाळ्यांमुळे त्रस्त झालेल्या अनेक नागरिकांनी आपल्या न्याय हक्कासाठी थेट जिल्हाधिकारी कार्यालयासमोर उपोषणाचा मार्ग निवडला. १५ ऑगस्ट रोजी सकाळपासूनच रत्नागिरी जिल्हाधिकारी कार्यालयानजिक विविध प्रकरणांतील पीडितांनी एकत्र येत उपोषण सुरू केले आहे. प्रशासकीय पातळीवर या आंदोलनाची दखल घेण्यात आली असली, तरी जोपर्यंत मागण्या पूर्ण होत नाहीत आणि ठोस निर्णय घेतला जात नाही, तोपर्यंत मागे हटणार नाही, असा स्पष्ट इशारा उपोषणकर्त्यांनी दिला आहे.

रत्नागिरीत एकाच वेळी इतक्या मोठ्या संख्येने विविध नागरी आणि गुन्हेगारी प्रकरणांतील पीडित नागरिक एकत्र येऊन उपोषणाला बसण्याची ही पहिलीच वेळ आहे. या उपोषणामध्ये ८५ वर्षांच्या ज्येष्ठ महिलांपासून ते स्थानिक व्यापारी, मजूर आणि सामाजिक कार्यकर्त्यांचा समावेश आहे. प्रशासकीय अधिकारी केवळ कागदी आश्वासने देत असल्याचा आरोप करत अनेक आंदोलकांनी आता आमरण उपोषणाचा पवित्रा घेतला आहे.

जयगड हत्या प्रकरणातील पोलीस अधिकाऱ्याच्या बडतर्फीची मागणी

उपोषणातील सर्वात गंभीर आणि संतापजनक प्रकरण जयगड येथील खंडाळा गावातील हत्याकांडाशी संबंधित आहे. जयगड येथील तिहेरी हत्याकांड आणि बेपत्ता प्रकरणातील आरोपींना पाठीशी घालणे, तक्रार नोंदवण्यास विलंब करणे आणि पुरावे नष्ट करण्यास मदत केल्याचा थेट आरोप तत्कालीन सहायक पोलीस निरीक्षक यांच्यावर करण्यात आला आहे.

सामाजिक कार्यकर्त्या संध्या कोसुंबकर आणि त्यांच्या सहकारी महिला या प्रकरणी आक्रमक झाल्या आहेत. या प्रकरणात  तक्रार घेण्यास टाळाटाळ केली गेली. संशयितांचा फोन तपासण्याऐवजी आणि योग्य तपास करण्याऐवजी तत्कालीन सहाय्यक निरीक्षकांनी आरोपींना पाठीशी घातल्याचा गंभीर आरोप आंदोलकांनी केला आहे. त्यामुळे संबंधित अधिकाऱ्यावर केवळ निलंबनाची कारवाई न करता त्याला शासकीय सेवेतून बडतर्फ करावे, या मागणीसाठी हे उपोषण सुरू आहे.

राजापूर अर्बन बँक घोटाळा आणि फसवणुकीतून आत्महत्या

दुसऱ्या बाजूला राजापूर अर्बन बँकेतील घोटाळा आणि फ्लॅट नोंदणीतील फसवणुकीविरोधात पीडित नागरिक उपोषणाला बसले आहेत. २०२०-२१ दरम्यान इमारतीतील फ्लॅट संदर्भात खोट्या नोंदी करून एकाच दिवसात कोट्यवधींचे कर्ज वाटप करण्यात आल्याचा आरोप इम्रान कमरुद्दीन शेख आणि इतर पीडितांनी केला आहे.

या घोटाळ्यात नाटेकर नावाच्या व्यक्तीने आणि बँक संचालकांनी मोठी फसवणूक केल्याचे समोर आले आहे. एका पीडित कुटुंबातील तरुणाने या आर्थिक फसवणुकीच्या आणि कर्जाच्या ताणतणावातून आत्महत्या केली. पोलिसांत वारंवार अर्ज देऊनही साधी विचारपूसही केली गेली नाही. या घोटाळ्यातील मुख्य सूत्रधार आणि बँकेच्या संचालक मंडळावर कडक कायदेशीर कारवाई करण्याची मागणी या वेळी करण्यात आली.

भूमी अभिलेख आणि स्थानिक प्रशासनाच्या कारभाराविरोधात रोष

संगमेश्वर तालुक्यातील हेगिष्टे कुटुंबीय भूमी अभिलेख विभागाच्या गलथान कारभाराविरोधात उपोषणाला बसले आहेत. नकाशावरील चूक दुरुस्त करण्यासाठी वारंवार अर्ज करूनही भूमी अभिलेख विभाग टाळाटाळ करत असल्याचा आरोप त्यांनी केला. ८५ वर्षांच्या वृद्ध आईसह संपूर्ण कुटुंब या त्रासाला कंटाळून उपोषणाला बसले आहे. सुधारित नकाशा आणि अतिक्रमाची स्पष्ट नोंद मिळेपर्यंत उपोषण मागे घेणार नसल्याचा पवित्रा त्यांनी घेतला आहे.

तसेच इतर उपोषणकर्त्यांच्या प्रमुख मागण्या पुढीलप्रमाणे आहेत:

• पावसाच्या पाण्याचा निचरा: शीळ भंडारवाडी येथील जितेंद्र बिरजे यांच्या घराच्या परिसरात येणाऱ्या नैसर्गिक पावसाच्या पाण्याला शेजाऱ्यांनी अडवल्याने घरात पाणी साचत आहे. पंचायत समिती, तहसीलदार आणि पोलीस ठाण्यात चेंडू एकमेकांकडे टोलवला जात असल्याने त्यांनी उपोषण सुरू केले.

• रिक्षा स्टँड आणि अ‍ॅट्रॉसिटीचा गुन्हा: रत्नादुर्ग रिक्षा व्यावसायिक संघटनेच्या विरोधात काही परवानाधारक चालक उपोषणाला बसले आहेत. मंजूर स्टँड सोडून इतर ठिकाणी अटकाव करणाऱ्यांवर अ‍ॅट्रॉसिटी कायद्यान्वये कारवाईची मागणी करण्यात आली आहे.

• मजुरीचा दाखला आणि ७० ब तपासणी: संगमेश्वर येथील मिलिंद मोहिते मजुरीचा दाखला मिळण्यासाठी, तर पांगरे बुद्रुक येथील संतोष कुळे ७० ब ची योग्य तपासणी न झाल्याने  उपोषण करत आहेत.

प्रशासकीय हालचाली आणि उपोषणकर्त्यांची भूमिका

रत्नागिरीत एकाच दिवशी विविध संघटना आणि नागरिकांनी सुरू केलेल्या या आंदोलनामुळे जिल्हाधिकारी कार्यालय परिसरात मोठा तणाव आणि पोलीस बंदोबस्त पाहायला मिळाला. महसूल आणि पोलीस प्रशासकीय अधिकाऱ्यांनी उपोषणकर्त्यांची भेट घेऊन चर्चा करण्याचा प्रयत्न केला.

मात्र, पूर्वी दिलेल्या आश्वासनांची पूर्तता झालेली नाही. केवळ तोंडी समाधानावर आम्ही उपोषण मागे घेणार नाही. जोपर्यंत संबंधित दोषी अधिकाऱ्यांवर कारवाई होत नाही आणि कागदपत्रांमधील त्रुटी दूर होत नाहीत, तोपर्यंत उपोषण सुरूच राहील, असा निर्धार आंदोलकांनी व्यक्त केला आहे. आता राज्य शासन आणि जिल्हा प्रशासन यावर काय तोडगा काढते, याकडे संपूर्ण जिल्ह्याचे लक्ष लागले आहे.

Labels:

Ratnagiri News, Protest, Independence Day Protests, Jaigad Murder Case, Rajapur Urban Bank, Collector Office Ratnagiri, Maharashtra Administration

Search Description:

Multiple victims and activists staged a hunger strike outside Ratnagiri Collectorate on 80th Independence Day demanding action on police negligence, land record errors, and bank fraud.

Hashtags:

#RatnagiriNews #Protest #IndependenceDay2026 #RatnagiriCollectorate #JusticeForVictims #RatnagiriPolice #RajapurBankScam