फरासखाना पोलीस ठाण्यातील ऐतिहासिक हनुमान मूर्तीची कस्टडीतून मुक्तता करा; भाविकांसाठी दर्शन खुले करण्याची हिंदुत्वनिष्ठ संघटनांची मागणी

 

 पुणे: स्वातंत्र्यवीर चापेकर बंधूंच्या क्रांतीकार्याचा देदीप्यमान वारसा लाभलेल्या आणि सध्या पुण्यातील फरासखाना पोलीस ठाण्याच्या कस्टडीत असलेल्या ऐतिहासिक हनुमान मूर्तीची कायदेशीर मुक्तता करण्यात यावी, अशी जोरदार मागणी हिंदुत्वनिष्ठ संघटनांच्या वतीने करण्यात आली आहे. या ऐतिहासिक मूर्तीची कस्टडीतून मुक्तता करून तिची सार्वजनिक ठिकाणी रीतसर स्थापना करावी आणि सर्वसामान्य भाविकांना दर्शनासाठी कायमस्वरूपी खुली करावी, या संदर्भातील मागणीचे निवेदन हिंदुत्वनिष्ठ संघटनांच्या शिष्टमंडळाने पोलीस उपआयुक्त (परिमंडळ-१, पुणे शहर) यांच्या कार्यालयात सादर केले.

निवेदन देण्यासाठी गेलेल्या शिष्टमंडळाची पोलीस उपआयुक्तांशी प्रत्यक्ष भेट होऊ शकली नाही; मात्र, प्रतिनिधींनी हे निवेदन त्यांच्या कार्यालयात रीतसर इनवर्ड (नोंदणीकृत) केले आहे. या घटनेमुळे फरासखाना परिसर आणि पुणे शहरात ऐतिहासिक हनुमान मूर्तीचा विषय पुन्हा एकदा ऐरणीवर आला आहे.

हे निवेदन सादर करताना हिंदू जनजागृती समितीचे पराग गोखले, हिंदु राष्ट्र समन्वय समितीचे सचिन घुले, विश्व हिंदू परिषद-बजरंग दलाच्या सौ. पद्मजा मधुकर पाटील, धर्मप्रेमी कु. पूर्वा धनंजय पाटील आणि कृष्णाजी पाटील यांच्यासह इतर अनेक कार्यकर्ते मोठ्या संख्येने उपस्थित होते.

फरासखाना पोलीस ठाण्याच्या आवारात असलेल्या या मूर्तीला ऐतिहासिक आणि धार्मिक दृष्ट्या मोठे महत्त्व असल्याचे संघटनांचे म्हणणे आहे. चापेकर बंधूंच्या क्रांतिकारी इतिहास आणि भावना या मूर्तीशी जोडलेल्या असल्याने तिला कस्टडीत न ठेवता योग्य सन्मानाने सार्वजनिक ठिकाणी स्थापित करणे आणि भाविकांसाठी दर्शन खुले करणे अत्यंत आवश्यक असल्याचे निवेदनात नमूद करण्यात आले आहे. याप्रकरणी पोलीस प्रशासन आणि संबंधित अधिकारी काय भूमिका घेतात, याकडे आता पुणेकरांचे व सर्व धर्मीयांचे लक्ष लागले आहे.

Labels: Pune Police, Faraskhana Police Station, Hanuman Idol, Hindu Janajagruthi Samiti, Pune News 

| Search Description: Hindutva organizations demand the legal release of an iconic historical Hanuman idol currently kept in custody at Faraskhana Police Station in Pune. 

| Hash Tags: #PuneNews #FaraskhanaPolice #HanumanIdol #ChapekarBrothers #PunePolice #LegalNews #Maharashtra