रोहा तालुक्यात प्रेमसंबंधातून २० वर्षीय तरुणीची गळा आवळून हत्या; आरोपी प्रियकराचीही गळफास घेऊन आत्महत्या

रोहा (रायगड): रायगड जिल्ह्यातील रोहा तालुक्यातील निडी गावात प्रेमसंबंधातून एका २० वर्षीय तरुणीची नायलॉनच्या दोरीने गळा आवळून निर्घृण हत्या करण्यात आल्याची आणि त्यानंतर आरोपी प्रियकरानेही त्याच घरात गळफास घेऊन आत्महत्या केल्याची धक्कादायक घटना समोर आली आहे. हा संपूर्ण प्रकार सोमवारी रात्री आठ वाजन्याच्या सुमारास घडला असून, मंगळवारी सकाळी उघडकीस आला. या दुहेरी मृत्यू प्रकरणामुळे अत्यंत शांत आणि निसर्गरम्य असलेल्या निडी गावावर मोठी शोककळा पसरली आहे.

या घटनेत तन्वी गणेश ताडकर (वय २०, रा. निडी, रोहा) या मृत तरुणीचे नाव असून, रोहित जनार्दन पाटील (वय २७, रा. निडी, रोहा) असे हत्या करून आत्महत्या करणाऱ्या आरोपी प्रियकराचे नाव आहे. रोहित हा महाराष्ट्र सुरक्षा दलात (MSF) कार्यरत होता आणि पोलीस भरतीची तयारी करत होता, तर तन्वी रोह्यातील एका खाजगी दुकानात कामाला होती. गेल्या काही काळापासून या दोघांमध्ये प्रेमसंबंध होते.

सोमवारी रात्री गावात राहणाऱ्या लक्ष्मण गडेकर यांच्या बंद घरात हे दोघे एकत्र आले होते. या घराची देखभाल तन्वीच्या आईकडे असल्याने घराची चावी त्यांच्याकडेच असायची. घरात असतानाच दोघांमध्ये कोणत्यातरी कारणावरून जोरदार वाद झाला. हा वाद इतका टोकाला गेला की, संतापाच्या भरात रोहितने तन्वीला बेदम मारहाण केली आणि त्यानंतर घरात असलेल्या नायलॉनच्या दोरीने तिचा गळा आवळून तिचा खून केला. तन्वीचा मृत्यू झाल्याचे लक्षात आल्यानंतर पोलिसांच्या अटकेची भीती किंवा पश्चातापामुळे रोहितने तातडीने त्याच नायलॉनच्या दोरीने हॉलमधील पंख्याला गळफास लावून स्वतःची जीवनयात्रा संपवली.

मंगळवारी सकाळी हा प्रकार उघडकीस येताच गावात एकच खळबळ उडाली. घटनेची माहिती मिळताच उपविभागीय पोलीस अधिकारी शेरेकर आणि रोहा पोलीस ठाण्याचे पोलीस निरीक्षक मारुती पाटील यांनी पथकासह तातडीने घटनास्थळी धाव घेतली. पोलिसांनी दोन्ही मृतदेह ताब्यात घेऊन शवविच्छेदनासाठी पाठवले आहेत. याप्रकरणी नामदेव मनोहर मडवी यांनी दिलेल्या तक्रारीवरून रोहा पोलीस ठाण्यात गुन्हा क्रमांक १७५/२०२६ अन्वये भारतीय न्याय संहितेच्या (BNS) कलम १०३(१) अंतर्गत खुनाचा गुन्हा दाखल करण्यात आला आहे. त्या रात्री दोघांमध्ये नेमका कोणत्या कारणावरून वाद झाला, याचा सखोल तपास निरीक्षक पाटील यांच्या मार्गदर्शनाखाली रोहा पोलीस करत आहेत.

• Labels: Raigad Crime, Roha Police, Murder Suicide, Love Affair Crime, Nidi Village

• Search Description: A 20-year-old girl Tanvi Tadkar was strangled to death by her lover Rohit Patil, who later committed suicide in Nidi village of Roha, Raigad.

• Hashtags: #RaigadCrime #RohaNews #MurderSuicide #CrimeUpdate #MaharashtraNews #PoliceInvestigation