फुगेवाडी दारूकांड: राजकीय नेत्यांची अनास्था उघड, 'निवडणुकीत येतात, संकटात कुठे जातात?'

 

पिंपरी-चिंचवड, दि. २९ मे २०२६ : पिंपरी-चिंचवड औद्योगिक नगरीतील फुगेवाडी भागात अवैध हातभट्टीची विषारी दारू प्राशन केल्याने तब्बल आठ निष्पाप नागरिकांचा दुर्दैवी मृत्यू झाला असून, या प्रकरणात मुख्य सूत्रधार योगेश वानखेडे याला अटक करण्यात आली आहे. विशेष म्हणजे, स्थानिक पोलीस अधिकाऱ्यांनी सुरुवातीला हे मृत्यू 'स्वतंत्र व नैसर्गिक कारणांनी' झाल्याचा बचावात्मक दावा करत प्रकरण दडपण्याचा प्रयत्न केला; मात्र राज्य उत्पादन शुल्क विभागाच्या धाडीनंतर त्यांचा हा पवित्रा पूर्णपणे उघडा पडला. या प्रसंगी खासदार श्रीरंग बारणे, आमदार शंकर जगताप आणि आमदार अमित गोरखे यांनी पीडित कुटुंबांची भेट घेतली असली, तरी शहरातील बहुतांश बडे नेते घटनास्थळी फिरकलेच नाहीत—याबद्दल स्थानिक जनतेत तीव्र संताप धुमसत आहे.

२८ मे रोजी फुगेवाडी परिसरातील कामगार वर्गातील नागरिकांनी अवैध हातभट्टीची दारू प्राशन केल्यानंतर त्यांना तोंडातून फेस येणे, तीव्र घाम सुटणे आणि श्वास घेण्यास त्रास होणे असे गंभीर त्रास सुरू झाले. तातडीने YCM रुग्णालयात दाखल करण्यात आलेल्या या पीडितांपैकी एकापाठोपाठ एक अशा आठ जणांनी उपचारादरम्यान प्राण गमावले. रुग्णालयात अजूनही सुभाष डिगीकर आणि अक्षय अवसरमल हे दोघे मृत्यूशी झुंज देत आहेत.

नातेवाईकांचे जबाब आणि प्राथमिक तपासातून विषारी दारूचे कारण स्पष्ट दिसत असतानाही, स्थानिक दापोडी पोलिसांनी रुग्णालयातील डॉक्टरांचा आधार घेत मृत्यूंचे कारण 'वेगवेगळे आणि नैसर्गिक' असल्याचे भासवण्याचा प्रयत्न केला. हा संपूर्ण बचावात्मक पवित्रा त्याच वेळी उघडा पडला, जेव्हा राज्य उत्पादन शुल्क विभागाने पुण्यात धाड घालून मुख्य सूत्रधार योगेश वानखेडे अटक केली. तपासात असे स्पष्ट झाल्याचे समजते की, वानखेडेने  दापोडी आणि फुगेवाडीतील किरकोळ विक्रेत्यांना ही विषारी दारू पुरवली होती,

मावळचे खासदार श्रीरंग बारणे, चिंचवडचे आमदार शंकर जगताप आणि विधानपरिषद आमदार अमित गोरखे यांनी घटनेची माहिती मिळताच फुगेवाडीत धाव घेऊन मृतांच्या कुटुंबीयांचे सांत्वन केले. आमदार गोरखे यांनी मुख्यमंत्री आणि पोलीस आयुक्तांना अधिकृत पत्र लिहून दोषींवर कडक कारवाई करावी, शहरातील सर्व अवैध अड्डे २४ तासांत उद्ध्वस्त करावेत आणि प्रत्येक पीडित कुटुंबाला ५ लाख रुपयांची तातडीची मदत द्यावी अशी मागणी केली आहे. तसेच, उपचाराधीन दोन रुग्णांच्या वैद्यकीय खर्चाची जबाबदारीही त्यांनी स्वीकारली आहे.

शहरात एकाच दिवशी आठ गरिबांचे प्राण गेलेले असताना, केवळ तीन लोकप्रतिनिधी सोडता अन्य पक्षांचे नेते, माजी महापालिका पदाधिकारी आणि स्वतःला 'जनतेचे कैवारी' म्हणवून घेणारे बडे राजकारणी घटनास्थळी पोहोचलेच नाहीत. "निवडणुकांच्या काळात गल्लोगल्ली फिरणारे हे नेते इतक्या मोठ्या दुर्घटनेच्या वेळी नेमके कुठे आहेत?" असा संतप्त सवाल स्थानिक नागरिक उपस्थित करत आहेत.

शवविच्छेदन व व्हिसेरा फॉरेन्सिक अहवालातून मृत्यूचे नेमके कारण अधिकृतरीत्या निश्चित होणार आहे. या भीषण घटनेने पिंपरी-चिंचवडमधील अवैध दारू रॅकेटविरोधात ठोस आणि कायमस्वरूपी कारवाईची तातडीची गरज अधोरेखित केली आहे.

Labels: Pimpri-Chinchwad, Hooch Tragedy, Fugwadi, Illegal Liquor, Maharashtra, Crime, YCM Hospital, Excise Department, Yogesh Wankhede

Search Description: Eight people died after consuming illicit liquor in Fugwadi area of Pimpri-Chinchwad on May 28, 2026. Police and hospital initially tried to suppress the case, but the main accused Yogesh Wankhede was arrested with unlicensed ethanol from Mumbai. Read full investigative report in Marathi.

Hashtags: #PimpriChinchwad #HoochTragedy #Fugwadi #IllegalLiquor #Maharashtra #YCMHospital #ExciseDepartment #MarathiNews #BreakingNews #CrimeNews