दुकानांसमोरील अतिक्रमण १५ दिवसांत हटवा, अन्यथा जप्ती आणि कठोर कारवाई; पीसीएमसी आयुक्त डॉ. विजय सूर्यवंशी यांचा कडक इशारा

 

पिंपरी (प्रतिनिधी):पिंपरी चिंचवड शहरातील पदपथ (फुटपाथ) नागरिकांना चालण्यासाठी विनाअडथळा खुले करण्याच्या उद्देशाने पिंपरी चिंचवड महानगरपालिकेने (PCMC) तीव्र अतिक्रमणमुक्त मोहीम हाती घेतली आहे. काही दुकानदार आपल्या दुकानापुढील जागेवर अनधिकृतपणे वाढीव क्षेत्र तयार करून किंवा साहित्य ठेवून अतिक्रमण करत असल्यामुळे शहरातील रहदारीला मोठा अडथळा निर्माण होत आहे. अशा सर्व दुकानधारकांनी येत्या १५ दिवसांच्या आत आपले अनधिकृत अतिक्रमण आणि साहित्य कायमस्वरूपी स्वतःहून हटवावे; अन्यथा महापालिकेच्या वतीने ते निष्कासित करून संबंधित दुकानदारांवर कायदेशीर व दंडात्मक कडक कारवाई करण्यात येईल, असा स्पष्ट आणि कडक इशारा मनपा आयुक्त डॉ. विजय सूर्यवंशी यांनी आज (२५ मे २०२६) दिला आहे.

पिंपरी येथील मुख्य प्रशासकीय भवनात आयोजित एका उच्चस्तरीय आढावा बैठकीत आयुक्त डॉ. सूर्यवंशी बोलत होते. या बैठकीला अतिरिक्त आयुक्त कुलदीप जंगम, तृप्ती सांडभोर, विक्रांत बगाडे, सह आयुक्त मनोज लोणकर, मुख्य अभियंता संजय कुलकर्णी, प्रमोद ओंभासे, सहशहर अभियंता बापूसाहेब गायकवाड यांच्यासह सर्व क्षेत्रीय अधिकारी आणि विविध विभागांचे प्रमुख उपस्थित होते. शहरात सुरू असलेल्या क्षेत्रीय कार्यालयनिहाय अतिक्रमण विरोधी कारवाईचा सविस्तर आढावा या बैठकीत घेण्यात आला.

आयुक्तांनी सर्व क्षेत्रीय कार्यालयांना स्पष्ट निर्देश दिले आहेत की, पदपथ अतिक्रमणमुक्त केल्यानंतर त्या जागेवर पुन्हा अतिक्रमण होणार नाही याची संपूर्ण जबाबदारी संबंधित अधिकारी आणि कर्मचाऱ्यांची असेल. शहराचा बकालपणा रोखण्यासाठी आणि वाहतूक कोंडी टाळण्यासाठी सर्व क्षेत्रीय कार्यालयनिहाय हॉकर्ससाठी जागा निश्चित करून तातडीने 'हॉकर्स झोन' तयार करण्याचे आदेश त्यांनी दिले. तसेच, या प्रक्रियेवर सातत्याने देखरेख ठेवण्यासाठी विशेष फिरती पथके नेमण्याचे निर्देशही प्रशासनाला देण्यात आले आहेत. दुकानदारांनी जाणीवपूर्वक वाढवलेल्या सीमांमुळे पादचाऱ्यांना जीव मुठीत धरून रस्त्यावरून चालावे लागते, ही बाब गंभीरतेने घेत मनपाने ही १५ दिवसांची अंतिम मुदत (डेडलाईन) जाहीर केली आहे.

Labels

PCMC Anti Encroachment Drive, Pimpri Chinchwad Municipal Corporation, Vijay Suryavanshi, Footpath Encroachment Pune, Hawkers Zone PCMC, Maval News, Town Planning Maharashtra

Search Description

PCMC Commissioner Dr. Vijay Suryavanshi issues a 15-day ultimatum to shopkeepers in Pimpri Chinchwad to remove illegal front encroachments or face strict municipal action.

Hashtags

#PCMCOfficial #AntiEncroachment #PimpriChinchwad #FootpathsForPedestrians #VijaySuryavanshi #SmartCityPCMC #PunePropertyNews