'हर घर तिरंगा' अभियान: जिल्हाधिकारी डॉ. पांचाळ यांनी घरी जाऊन वीरपत्नीचा केला गौरव

१० हजारांहून अधिक माजी सैनिक आणि १२९ आणीबाणी सत्याग्रहींना प्रशंसा प्रमाणपत्र

ठाणे : 'हर घर तिरंगा' मोहिमेच्या निमित्ताने ठाणे जिल्हा प्रशासनाने स्वातंत्र्य सैनिक, शहीद जवान, माजी सैनिक आणि आणीबाणीविरोधी सत्याग्रहींच्या त्यागाबद्दल कृतज्ञता व्यक्त करण्यासाठी एक कौतुकास्पद उपक्रम राबविला आहे. जिल्हाधिकारी डॉ. श्रीकृष्ण पांचाळ यांच्या नेतृत्वाखाली राबविलेल्या या विशेष मोहिमेमुळे देशभक्ती आणि त्याग करणाऱ्या व्यक्तींप्रति आदराची भावना आणखी दृढ झाली आहे.

या मोहिमेअंतर्गत जिल्हाधिकारी डॉ. पांचाळ यांनी स्वतः शहीद हवालदार सुधीर धोंडू आंब्रे यांच्या वीरपत्नी श्रीमती सुप्रिया सुधीर आंब्रे यांच्या घरी जाऊन आभार पत्र देऊन त्यांचा सन्मान केला. १७ सप्टेंबर २००१ रोजी जम्मू-काश्मीरमधील राजौरी येथे झालेल्या हल्ल्यात वीरमरण आलेल्या सुधीर आंब्रे यांच्या सर्वोच्च त्यागाबद्दल त्यांनी कृतज्ञता व्यक्त केली.

याचबरोबर, जिल्ह्यातील प्रत्येक तालुक्यातील तहसीलदारांनी शहीद सैनिकांच्या वीरमाता, वीरपिता आणि वीरपत्नींच्या घरी जाऊन आभार पत्र दिले. याव्यतिरिक्त, जिल्हाधिकाऱ्यांच्या स्वाक्षरीचे आभार व प्रशंसा प्रमाणपत्र १० हजारांहून अधिक माजी सैनिकांना व्हॉट्सॲपद्वारे पाठवण्यात आले. तसेच १९७५ च्या आणीबाणीच्या काळात लोकशाही मूल्यांच्या रक्षणासाठी लढा दिलेल्या १२९ सत्याग्रहींनाही तहसीलदारांमार्फत सन्मानित करण्यात आले.