पुणे पोलिसांचे कोम्बिंग ऑपरेशन; हडपसरमध्ये गुन्हेगार आणि अल्पवयीन मुलाकडून हत्यारे जप्त; आरोपीच्या आईलाही सहआरोपी केले

पुणे (प्रतिनिधी) - पुणे शहर पोलीस आयुक्त (Pune Police) यांच्या सूचनेनुसार, शहरात राबवण्यात आलेल्या कोम्बिंग ऑपरेशन (Combing Operation) मोहिमेदरम्यान हडपसर पोलिसांनी ४ लोखंडी हत्यारे जप्त केली आहेत. या प्रकरणात एका सराईत गुन्हेगारासह एका विधीसंघर्षग्रस्त बालकाला अटक करण्यात आली असून, हत्यारे घरात लपवण्यास मदत केल्याबद्दल अल्पवयीन मुलाच्या आईलाही सह-आरोपी करण्यात आले आहे.

८ ऑगस्ट, २०२५ च्या रात्री ११ ते ९ ऑगस्ट, २०२५ च्या पहाटे २ वाजेपर्यंत पुणे शहर पोलीस आयुक्तालयाच्या हद्दीत कोम्बिंग ऑपरेशन मोहीम राबवण्यात आली होती. या मोहिमेअंतर्गत पोलीस स्टेशन हद्दीतील रेकॉर्डवरील गुन्हेगार तपासले जात होते, तसेच निर्जन स्थळे आणि गर्दीच्या ठिकाणी प्रभावीपणे कारवाई करण्याचे आदेश देण्यात आले होते.

हडपसर पोलीस स्टेशनचे वरिष्ठ पोलीस निरीक्षक संजय मोगले, पोलीस निरीक्षक निलेश जगदाळे आणि अश्विनी जगताप यांच्या मार्गदर्शनाखाली तपास पथक कारवाई करत असताना, त्यांना दोन संशयीत व्यक्ती दिसल्या. त्यांची चौकशी केली असता, एकाने त्याचे नाव विश्वजित उर्फ यश रामचंद्र मोरे (वय २०) असे सांगितले, तर दुसरा एक अल्पवयीन मुलगा असल्याचे समजले.

पोलिसांनी केलेल्या कसून तपासणीमध्ये, अल्पवयीन मुलाच्या घरातून ४ लोखंडी हत्यारे जप्त करण्यात आली. ही हत्यारे आई रुपाली चौधरी (वय ३५) यांच्या संमतीने घरात ठेवल्याचे आरोपींनी सांगितले. त्यानुसार, आरोपींना अटक करण्यात आली असून, रुपाली चौधरी यांनाही सह-आरोपी करण्यात आले आहे. या प्रकरणी हडपसर पोलीस स्टेशनमध्ये भारतीय न्याय संहिता कलम ३(४), भारतीय हत्यार कायदा कलम ८(२४) आणि महाराष्ट्र पोलीस अधिनियम कलम ३०(९) नुसार गुन्हा दाखल करण्यात आला आहे.

ही कामगिरी अप्पर पोलीस आयुक्त मनोज पाटील, पोलीस उप-आयुक्त डॉ. राजकुमार शिंदे, सहायक पोलीस आयुक्त अनुराधा उदमले आणि वरिष्ठ पोलीस निरीक्षक संजय मोगले यांच्या मार्गदर्शनाखाली करण्यात आली आहे.