नांदेड सिटी पोलिसांनी गोळीबाराच्या घटनेतील आरोपींना ठोकल्या बेड्या

पुणे, (प्रतिनिधी): कोल्हेवाडी येथे गाडी घासल्याच्या क्षुल्लक कारणावरून हवेत तीन गोळ्या झाडून दहशत निर्माण करणाऱ्या सहा आरोपींना नांदेड सिटी पोलिसांनी अटक केली आहे. ही घटना ४ ऑगस्ट २०२५ रोजी घडली होती, ज्यात आरोपी गोळीबार करून फरार झाले होते. वरिष्ठ पोलीस निरीक्षक अतुल भोस यांनी आरोपींचा शोध घेण्याचे आदेश दिले होते.

पोलिसांना मिळालेल्या गोपनीय माहितीनुसार, गोळीबार करणारे आरोपी खडकवासला चौपाटी येथे थांबले असल्याची माहिती मिळाली. त्यानंतर सहायक पोलीस निरीक्षक राहुल यादव आणि त्यांच्या पथकाने तात्काळ कारवाई करत सहा संशयितांना ताब्यात घेतले. ताब्यात घेतलेल्या आरोपींची नावे साहिल अरविंद चव्हाण (वय २४), अभिजीत राजू चव्हाण (वय ३१), प्रशांत यशवंत चव्हाण (वय ३४), आकाश भिमा चव्हाण (वय २४), गितेश शंकर जाधव (वय २०) आणि मंदार यशवंत चव्हाण (वय ३९) अशी आहेत.

नांदेड सिटी पोलिस स्टेशनमध्ये या आरोपींविरुद्ध भारतीय न्याय संहिता २०२३ च्या कलम ११८ (१), १८९ (२), १८९ (४), १९०, १९१ (२), ३५१ (२) (३), ३५२ सह आर्म अॅक्ट कलम ३, २५, २७ आणि क्रिमिनल अमेंडमेंट कलम ७ व महाराष्ट्र पोलीस अधिनियम कलम ३७ (१), १३५ नुसार गुन्हा नोंदवण्यात आला आहे.