मराठा आरक्षण, शेतकरी कर्जमाफी आणि वाढत्या गुन्हेगारीवर 'अखिल भारतीय छावा संघटनेचा' आक्रमक पवित्रा

'मराठा समाजाचा संयम संपण्याची वाट पाहू नका' - जावळे पाटील

पुणे-पिंपरीतील मसाज पार्लरच्या नावाखाली चालणारे गैरप्रकार तात्काळ थांबवण्याची मागणी

पिंपरी, (प्रतिनिधी): मराठा आरक्षण, शेतकरी कर्जमाफी आणि वाढत्या गुन्हेगारीसारख्या संवेदनशील मुद्द्यांवर 'अखिल भारतीय छावा संघटने'चे केंद्रीय अध्यक्ष नानासाहेब जावळे पाटील यांनी आक्रमक भूमिका घेतली आहे. काळेवाडी येथे झालेल्या एका मेळाव्यापूर्वी आयोजित पत्रकार परिषदेत त्यांनी राज्य सरकारला या मागण्यांवर तातडीने निर्णय घेण्याचा इशारा दिला.

जावळे पाटील म्हणाले की, "मराठा समाजाच्या आर्थिक, सामाजिक आणि शैक्षणिक उन्नतीसाठी सरकारने मराठा आरक्षण लागू करण्यासोबतच १० हजार कोटी रुपयांचे आर्थिक विकास महामंडळ तात्काळ कार्यान्वित करावे." मराठा समाज सध्या शांत आणि संयमी असला तरी, त्यांच्या संयमाचा कडेलोट होण्याची वाट सरकारने पाहू नये, असा इशाराही त्यांनी दिला.

शेतकऱ्यांच्या मुद्द्यावर बोलताना ते म्हणाले की, सध्या हवामानाच्या बदलांमुळे शेतकरी संकटात सापडला आहे. त्यामुळे सरकारने त्वरित सरसकट कर्जमाफी जाहीर करावी. तसेच, पुणे आणि पिंपरी-चिंचवडमध्ये मसाज पार्लरच्या नावाखाली चालणाऱ्या वेश्याव्यवसायावर त्यांनी तीव्र आक्षेप घेतला. 'संत-महात्म्यांच्या भूमीत असे गैरप्रकार चालणे लज्जास्पद आहे,' असे म्हणत त्यांनी प्रशासनाला यावर कठोर कारवाई करण्याची मागणी केली.