अल्पवयीनाकडून एक दुचाकी आणि दोन ऑटो रिक्षा जप्त; ३ वाहनचोरीचे गुन्हे उघड

चोरीच्या गाड्यांची किंमत १.७५ लाख रुपये

दरोडा व वाहनचोरी विरोधी पथकाची कारवाई

सहकारनगर, हडपसर, वारजे माळवाडी येथील गुन्हे उघडकीस

पुणे : पुणे शहर पोलीस दलाच्या दरोडा व वाहनचोरी विरोधी पथक १ ने एका विधीसंघर्षीत बालकाकडून तीन वाहनचोरीचे गुन्हे उघडकीस आणले आहेत. यामध्ये एका दुचाकीसह दोन रिक्षा जप्त करण्यात आल्या असून, जप्त केलेल्या वाहनांची एकूण किंमत १,७५,०००/- रुपये आहे.

सहकारनगर पोलीस ठाण्यात दाखल असलेल्या गुन्ह्याच्या तपासादरम्यान, पोलिसांनी गोपनीय माहितीच्या आधारे रामनगर, वारजे माळवाडी येथील एका मोकळ्या मैदानाजवळ सापळा रचून एका मुलाला ताब्यात घेतले. त्याच्या ताब्यात असलेली ऑटो रिक्षा चोरीची असल्याचे निष्पन्न झाले. चौकशीत त्याने एक दुचाकी आणि दोन ऑटो रिक्षा चोरल्याची कबुली दिली.

या कारवाईमुळे सहकारनगर, हडपसर आणि वारजे माळवाडी पोलीस ठाण्यातील वाहनचोरीचे तीन गुन्हे उघड झाले आहेत. अटक केलेल्या मुलाला पुढील कारवाईसाठी सहकारनगर पोलीस ठाण्याच्या ताब्यात देण्यात आले आहे.