सोन्याच्या दुकानात दरोडा टाकणारे २४ तासांत जेरबंद

चंदननगरमधील दरोड्याचा २४ तासांत छडा: गुन्हे शाखा युनिट-४ ची यशस्वी कामगिरी

पुणे (प्रतिनिधी) - चंदननगर पोलीस ठाण्याच्या हद्दीत दिवसाढवळ्या सोन्याच्या दुकानात दरोडा टाकणाऱ्या दोन आरोपींना गुन्हे शाखा युनिट-४ ने अवघ्या २४ तासांच्या आत अटक करून मोठ्या गुन्ह्याचा पर्दाफाश केला आहे. या आरोपींकडून गुन्ह्यात वापरण्यात आलेले साहित्य जप्त करण्यात आले असून, पुढील तपास चंदननगर पोलीस करत आहेत.

८ ऑगस्ट, २०२५ रोजी चंदननगर येथील साईनाथनगरमधील 'श्री आशापुरा ज्वेलर्स' नावाच्या दुकानात दुचाकीवरून आलेल्या दोन इसमांनी हत्याराचा धाक दाखवून दुकानदाराला लुटले होते. या घटनेनंतर चंदननगर पोलीस ठाण्यात भारतीय न्याय संहिता कलम ३०९ (२), ३ (५) अन्वये गुन्हा दाखल करण्यात आला होता. या गुन्ह्याचा तपास तातडीने करून आरोपींना अटक करण्याच्या सूचना वरिष्ठांकडून देण्यात आल्या होत्या.

या सूचनांनुसार, गुन्हे शाखा युनिट-४ चे पथक या भागात गोपनीय बातमीदारामार्फत माहिती गोळा करत होते. तांत्रिक विश्लेषणाच्या आधारे आरोपींचे फोटो मिळवून त्यांच्याबद्दल अधिक माहिती मिळवण्यात आली. यात हे आरोपी गुलटेकडी भागातील इंदिरानगरमधील असल्याचे समजले.

मिळालेल्या माहितीनुसार, युनिट-४ चे पथक इंदिरानगर, गुलटेकडी भागात आरोपींचा शोध घेत असताना, बिलाल मस्जिदजवळ दरोडा टाकणारे दोन आरोपी असल्याची खात्रीशीर माहिती मिळाली. पोलिसांनी तात्काळ घटनास्थळी धाव घेऊन सनी राजू खांडेकर (वय २४, रा. इंदिरानगर, गुलटेकडी, पुणे) आणि अनिल परशुराम विसरे (वय २६, रा. इंदिरानगर, गुलटेकडी, पुणे) या दोघांना ताब्यात घेतले. ताब्यातील आरोपींकडे कसून चौकशी केली असता, त्यांनी गुन्हा केल्याची कबुली दिली.