डेक्कन पोलिसांना हरवलेल्या २६ मोबाईलचा शोध लावण्यात यश

पुणे : पुणे पोलिसांच्या डेक्कन पोलीस स्टेशनने एक महत्त्वाची कामगिरी बजावली आहे. सायबर पथकाने गहाळ झालेले २६ मोबाईल फोन हस्तगत केले आहेत, ज्यांची एकूण किंमत ४,५०,०००/- रुपये आहे.

केंद्र शासनाच्या दूरसंचार विभागाच्या 'सेंट्रल इक्विपमेंट आयडेंटी रजिस्टर (CEIR)' या प्रणालीचा वापर करून पोलिसांनी हे मोबाईल फोन शोधले आहेत. डेक्कन पोलीस ठाण्याचे सायबर पथक प्रमुख आणि वरिष्ठ पोलीस निरीक्षक श्रीमती गिरिषा निंबाळकर, महिला पोलीस अंमलदार उमा पालवे यांनी हरवलेल्या मोबाईलचा डेटा तयार करून तांत्रिक तपास केला. या तपासातून हे मोबाईल महाराष्ट्रातील विविध जिल्ह्यांमध्ये आणि इतर राज्यांमध्ये वापरले जात असल्याचे निष्पन्न झाले. संबंधित वापरकर्ते आणि पोलीस ठाण्यांशी संपर्क साधून हे २६ मोबाईल फोन परत मिळवण्यात आले आहेत.

पोलिसांनी नागरिकांना आवाहन केले आहे की मोबाईल हरवल्यास त्याची तक्रार पुणे पोलिसांच्या punepolice.gov.in/lost Found Reg या वेबसाईटवर ऑनलाइन नोंदवावी. तक्रार नोंदवताना जवळच्या पोलीस स्टेशनचे नाव निवडून त्याची एक प्रत पोलीस ठाण्यात जमा करावी. त्यानंतर त्याच नंबरचे नवीन सिमकार्ड घेऊन ते सुरू झाल्यावर CEIR पोर्टलवर (https://www.ceir.gov.in) नोंदणी करावी आणि रिक्वेस्ट आयडी संबंधित पोलीस स्टेशनला द्यावा.