विश्रामबाग पोलिसांची कारवाई: मोबाईल हिसकावणारा जेरबंद;अल्पवयीन ताब्यात

पुणे (प्रतिनिधी) - विश्रामबाग पोलिसांनी (Vishrambagh Police) लक्ष्मी रोड परिसरातून मोबाईल हिसकावून पळणाऱ्या एका आरोपीला जेरबंद केले असून एका अल्पवयीनालाही ताब्यात घेतले आहे त्यांच्याकडून चोरीला गेलेला मोबाईल आणि गुन्हा करण्यासाठी वापरलेली दुचाकी असा एकूण ३५ हजार रुपयांचा मुद्देमाल जप्त करण्यात आला आहे.

ही घटना ३० जुलै, २०२५ रोजी रात्री १२:२० ते १२:४० च्या दरम्यान घडली होती. लक्ष्मी रोडवरील मुळचंद दुकानाजवळ स्वीट कॉर्न विक्रीचे काम संपवून एक व्यक्ती घरी जात असताना, दुचाकीवरून आलेल्या तीन तरुणांनी त्यांचा सॅमसंग गॅलेक्सी ए ३५ मोबाईल हिसकावून पळ काढला होता. याप्रकरणी विश्रामबाग पोलीस ठाण्यात गुन्हा दाखल करण्यात आला होता.

वरिष्ठ पोलीस निरीक्षक संतोष पांढरे यांनी या गुन्ह्याचा तपास तातडीने सुरू करण्याचे आदेश दिले होते. तपास पथकाने गोपनीय बातमीदारांच्या मदतीने तपास केला असता, आरोपी खडक परिसरात असल्याची माहिती पोलीस अंमलदार आशिष खरात, अनिस शेख, राहुल मोरे आणि शिवदत्त गायकवाड यांना मिळाली. ही माहिती सहायक पोलीस निरीक्षक राजेश उसगावकर यांना देण्यात आली.

या माहितीच्या आधारे पोलिसांनी खडक परिसरातून रियान मुझम्मील खान (वय १९), आयान जावेद शेख (वय १९) आणि एका विधीसंघर्षग्रस्त बालकाला ताब्यात घेतले. आरोपींकडून चोरीला गेलेला १० हजार रुपये किमतीचा सॅमसंग गॅलेक्सी मोबाईल फोन आणि गुन्हा करण्यासाठी वापरलेली २५ हजार रुपये किमतीची जुनी सुझुकी ॲक्सेस १२५ स्कूटर (क्रमांक MH 12 TW 9973) जप्त करण्यात आली आहे.