भामा आसखेड पाणीपुरवठा योजनेच्या वेळेत बदल

पुणे, २५ जुलै: पुणे महानगरपालिकेच्या भामा आसखेड पाणीपुरवठा योजनेअंतर्गत वितरण व्यवस्थेत बदल करण्यात येणार आहे. विमाननगर, लोहगाव हरणतळे, धानोरी आणि कलवड येथील टाक्या नव्याने कार्यान्वित झाल्याने सद्यस्थितीतील पाणीपुरवठ्याच्या वेळेत बदल करण्याची आवश्यकता निर्माण झाली आहे. हा बदल नियमित करण्यासाठी गुरुवार, ३१ जुलै २०२५ पासून प्रायोगिक तत्वावर पाणीपुरवठ्याच्या वेळेत बदल करण्यात येणार आहे.

सविस्तर बातमी

पुणे महानगरपालिकेच्या माहिती व जनसंपर्क कार्यालयाने दिलेल्या प्रेसनोटनुसार, भामा आसखेड प्रकल्पातून पाणीपुरवठा होणाऱ्या भागांतील नागरिकांनी पाणीपुरवठ्याच्या या बदलाची नोंद घ्यावी आणि पुणे महानगरपालिकेस सहकार्य करावे, असे आवाहन करण्यात आले आहे.

या बदलामुळे विश्रांतवाडी, धानोरी, टिंगरेनगर, लोहगाव, विमाननगर, महाराष्ट्र हौसिंग बोर्ड, नागपूरचाळ, वडगावशेरी (अंशतः), खराडी (अंशतः), चंदननगर (अंशतः) या ठिकाणच्या पाणीपुरवठ्याच्या वेळेत काही प्रमाणात बदल संभवतो.