ऑनलाईन जुगाराच्या व्यसनाने घडवला गुन्हा! सोनसाखळी खेचणाऱ्या दोघांना अटक

मुंबई, २६ जुलै: मुंबईतील माटुंगा परिसरात एका ७४ वर्षीय ज्येष्ठ महिलेच्या गळ्यातील सोनसाखळी खेचून पसार झालेल्या दोन आरोपींना माटुंगा पोलिसांनी अटक केली आहे. ऑनलाईन जुगारात पैसे हरल्याने त्यांनी हा गुन्हा केल्याचे समोर आले आहे. या कारवाईत पोलिसांनी ९० हजार रुपयांची सोन्याची लगड आणि दीड लाखांची के.टी.एम. दुचाकी असा एकूण २ लाख ४० हजार रुपयांचा मुद्देमाल हस्तगत केला आहे.

सविस्तर बातमी

१९ जुलै २०२५ रोजी रात्री ८.४० वाजण्याच्या सुमारास माटुंगा पोलीस ठाण्याच्या हद्दीत जैन मंदिरातून दर्शन घेऊन पायी घरी जात असलेल्या श्रीमती विजया हरिया (वय ७४) यांच्या गळ्यातील सोन्याची चेन दुचाकीवरून आलेल्या दोन अनोळखी इसमांनी खेचून पळ काढला होता. या घटनेनंतर माटुंगा पोलीस ठाण्यात भा. न्या. सं. २०२३ च्या कलम ३०९ (४) आणि ३(५) अन्वये गुन्हा दाखल करण्यात आला होता.

गुन्ह्याचा तपास करत असताना पोलिसांनी तांत्रिक तपासाच्या आधारे मोहित अशोक संगिशेट्टी (वय २२, रा. कुर्ला पश्चिम) आणि रोहित ओमसिंग गौंड (वय १९, रा. कुर्ला पश्चिम) या दोन आरोपींना अटक केली. हे दोघेही ऑनलाईन जुगाराचे व्यसनी असून, त्यात हरलेले पैसे मिळवण्यासाठी त्यांनी सोनसाखळी चोरीचा मार्ग अवलंबल्याचे प्राथमिक तपासात उघड झाले आहे.

अटक करण्यात आलेल्या आरोपींकडून पोलिसांनी ९.८० ग्रॅम वजनाची सोन्याची लगड (किंमत ९०,००० रुपये) आणि गुन्ह्यासाठी वापरलेली काळ्या-सफेद रंगाची के.टी.एम. कंपनीची ड्युक २०० (क्रमांक एम. एच. ०३-डी.टी.-३६२५, अंदाजित किंमत १,५०,००० रुपये) अशी एकूण २ लाख ४० हजार रुपयांची मालमत्ता जप्त केली आहे.

ही कामगिरी माटुंगा पोलीस ठाण्याचे गुन्हे प्रकटीकरण अधिकारी उप निरीक्षक सुनील पाटील, तसेच शिपाई जुवाटकर, देशमाने, मेटकर, तोडासे, बहादुरी, सोनवलकर यांनी केली आहे. गुन्ह्याचा पुढील तपास उप निरीक्षक सुनील पाटील करत आहेत.