राष्ट्रपतींकडून उज्ज्वल निकम, सदानंदन मास्टर, हर्षवर्धन श्रृंगला आणि मीनाक्षी जैन यांची राज्यसभेवर नियुक्ती

 

 पुणे: राष्ट्रपती द्रौपदी मुर्मू यांनी प्रख्यात वकील उज्ज्वल देवराव निकम, सामाजिक कार्यकर्ते सदानंदन मास्टर, माजी परराष्ट्र सचिव हर्षवर्धन श्रृंगला आणि इतिहासकार व शिक्षणतज्ञ मीनाक्षी जैन यांची राज्यसभेवर नियुक्ती केली आहे. या निर्णयाची माहिती गृह मंत्रालयाने एका अधिसूचनेद्वारे दिली आहे.  

महाराष्ट्राचे सुपुत्र असलेले श्री. उज्ज्वल निकम हे मुंबईतील दहशतवादी हल्ल्याच्या प्रकरणातील सरकारी वकील म्हणून त्यांच्या कामासाठी ओळखले जातात. केरळचे सदानंदन मास्टर यांचे शिक्षण क्षेत्रात महत्त्वपूर्ण योगदान राहिले आहे, तर श्री. हर्षवर्धन श्रृंगला यांनी अमेरिका, बांगलादेश आणि थायलंडमध्ये राजदूत म्हणूनही कार्य केले आहे. सुश्री मीनाक्षी जैन या दिल्ली विद्यापीठाच्या गार्गी कॉलेजमध्ये इतिहासाच्या सहयोगी प्राध्यापिका म्हणून कार्यरत होत्या.   

पंतप्रधान नरेंद्र मोदी यांनी या चारही मान्यवरांना राज्यसभेवर नामित झाल्याबद्दल सोशल मीडियाद्वारे अभिनंदन केले आहे. त्यांनी म्हटले की, उज्ज्वल निकम यांचे संविधान आणि कायद्याच्या क्षेत्रात अनुकरणीय योगदान आहे. हर्षवर्धन श्रृंगला यांचा एक मुत्सद्दी, बौद्धिक आणि रणनीतिक विचारवंत म्हणून असलेला प्रवास कौतुकास्पद आहे.

सदानंदन मास्टर यांचे अभिनंदन करताना पंतप्रधान मोदी म्हणाले की, त्यांचे संपूर्ण जीवन समर्पणाचे प्रतीक आहे आणि त्यांनी अन्यायासमोर कधीही मान झुकू दिली नाही. मीनाक्षी जैन यांनी एक शिक्षणतज्ञ, विदुषी आणि इतिहासकार म्हणून स्वतःची एक विशिष्ट ओळख निर्माण केली आहे, असेही पंतप्रधानांनी नमूद केले.   

Rajya Sabha Nomination, Ujjwal Nikam, Sadanandan Master, Harsh Vardhan Shringla, Meenakshi Jain, President of India 

#RajyaSabha #PresidentOfIndia #UjjwalNikam #IndianPolitics #Nominations