पुणे: भारतीय विद्या भवन आणि इन्फोसिस फाऊंडेशन यांच्या संयुक्त विद्यमाने सांस्कृतिक प्रसार कार्यक्रमांतर्गत 'गीत अथर्वशीर्ष' या विशेष कार्यक्रमाचे आयोजन करण्यात आले आहे. हा कार्यक्रम शनिवार, २ ऑगस्ट २०२५ रोजी सायंकाळी ६ वाजता भारतीय विद्या भवनच्या सरदार महादेव बळवंत नातू सभागृह (सेनापती बापट रस्ता) येथे होणार आहे.
घराघरात पठण केले जाणारे गणपती अथर्वशीर्ष एका नव्या स्वरूपात रसिकांसमोर येणार आहे. अथर्वशीर्षातील प्रत्येक ऋचेचा अर्थ उलगडून सांगणारे कवी मधुकर जोशी यांचे काव्य पं. कमलाकर जोशी यांनी स्वरबद्ध केले आहे. मराठी भाषेतून काव्यात्मकतेने सजलेले, प्रासादिक रागदारीच्या स्वरांनी नटलेले आणि नृत्याचा नवा आयाम लाभलेले हे अथर्वशीर्ष गायन व भरतनाट्यम शैलीतील नृत्याद्वारे सादर केले जाईल. सांस्कृतिक प्रसार कार्यक्रमांतर्गत सादर होणारा हा २५५ वा कार्यक्रम आहे, अशी माहिती भारतीय विद्या भवनचे सचिव प्रा. नंदकुमार काकिर्डे यांनी पत्रकाद्वारे दिली आहे.
या कार्यक्रमात शुभदा आठवले आणि संपदा थिटे यांचे गायन असेल, तर नृत्य रचना डॉ. मीनल कुलकर्णी यांची आहे. स्वराली गोखले निवेदन करतील. वेधा पोळ (व्हायोलिन), पवन झोडगे (पखवाज), जयेश शेंबेकर (तबला), प्रवीण ढवळे (टाळ) हे सहकलाकार साथसंगत करतील. कार्यक्रमाचे व्यवस्थापन केदार अभ्यंकर यांचे आहे. समूह स्वरासाठी श्रेया, ऋचा, प्रज्ञा, नीता आणि केतकी तर नृत्यसंचात यशदा, समा, जान्हवी आणि शांभवी सहभागी होणार आहेत.
रसिक प्रेक्षकांसाठी हा कार्यक्रम खुला असून, उपस्थित राहण्याचे आवाहन आयोजकांनी केले आहे.
Cultural Event, Music, Dance, Spirituality, Pune, Maharashtra, India, Marathi, Bharatnatyam, Ganpati Atharvashirsha.
#GeetAtharvashirsha #PuneEvents #BharatiyaVidyaBhavan #InfosysFoundation #CulturalProgram #Ganpati #Atharvashirsha #Bharatanatyam #MarathiCulture #PuneArts
Reviewed by ANN news network
on
७/३०/२०२५ १२:३६:०० PM
Rating:
कोणत्याही टिप्पण्‍या नाहीत: