"मच्छीमारांनो, आधुनिक तंत्रज्ञान आत्मसात करा"; महेंद्र घरत यांचे आवाहन

 

विठ्ठल-रखुमाई मत्स्य शेतकरी उत्पादक सहकारी संस्थेचे उद्घाटन; खाडीकिनाऱ्यावरील अतिक्रमणांवरून केंद्र सरकारवर टीका

'विकासाच्या नावाखाली समुद्राला हटवू नका', गणेशपुरी ग्रामस्थांना कायम पाठिंब्याचे आश्वासन

उरण, ११ जुलै २०२५: "पूर्वीसारखी आता मासेमारी राहिलेली नाही. काळ झपाट्याने बदलतोय, तंत्रज्ञानाचा वेग प्रचंड आहे. त्यामुळे मासेमारी करताना मच्छीमारांनी नवीन तंत्रज्ञान आत्मसात करणे गरजेचे आहे," असे आंतरराष्ट्रीय कामगार नेते आणि काँग्रेसचे रायगड जिल्हाध्यक्ष महेंद्र  घरत यांनी उरण येथे बोलताना सांगितले. गुरुवारी (दि. १०) त्यांच्या हस्ते विठ्ठल-रखुमाई मत्स्य शेतकरी उत्पादक सहकारी संस्थेचे उलवे नोडमध्ये उद्घाटन झाले, त्यावेळी ते बोलत होते.

तंत्रज्ञान आत्मसात करण्याची गरज व सरकारवर टीका: 

घरत यांनी तरुणांना आणि नवयुवकांना नवीन तंत्रज्ञान आत्मसात करून मत्स्य व्यवसायात उतरण्याचे आवाहन केले. त्याचबरोबर, विकासाच्या नावाखाली समुद्राला हटवण्याचे प्रकार सुरू असल्याचा आरोप करत, त्यांनी केंद्र सरकारवर जोरदार टीका केली. "निसर्गाच्या नादी कुणी लागू नये. जेवढा तुम्ही समुद्रात भराव कराल, त्यापेक्षा दुप्पट वेगाने समुद्रही आपल्याला एक ना एक दिवस गिळल्याशिवाय राहणार नाही," असा इशारा त्यांनी दिला. अनेक ठिकाणी खाडीकिनारे बुजवल्याने स्थानिक मच्छीमारांवर उपाशीपोटी राहण्याची वेळ आल्याचे दुःख त्यांनी व्यक्त केले.

गणेशपुरीसारख्या गावाचे उदाहरण देत ते म्हणाले, "गणेशपुरीसारखे गाव समुद्रकिनारी होते, आता त्यांचे स्थलांतर काँक्रिटच्या जंगलात केले आहे. त्यामुळे त्यांना मासेमारी करण्यासाठी जाताना होणारा मनस्ताप वातानुकूलित दालनात बसून प्लॅनिंग करणाऱ्या अधिकाऱ्यांना कळणार कसा?"

कोळी समाजाला एकत्र येण्याचे आवाहन व पाठिंबा: 

घरत यांनी कोळी समाजाला एकत्र येण्याचे आवाहन केले, नवीन जेट्टीसाठी प्रयत्न करण्याचे आश्वासन दिले, तसेच एकमेकांना सहकार्य करण्याचे आवाहन केले. गणेशपुरी ग्रामस्थांना सिडकोसोबत लढल्यानेच घरांचे प्लॉट मिळाल्याचे सांगत, यापुढेही गणेशपुरी ग्रामस्थांच्या मागे खंबीरपणे उभा असल्याचे त्यांनी नमूद केले.

इतर मान्यवरांची मते: 

यावेळी अलिबागचे मत्स्य आयुक्त संजय पाटील म्हणाले की, "पालघर, सातपाटी येथील मच्छीमार सोसायट्या खूप चांगल्याप्रकारे काम करीत आहेत, त्यांचे कामकाज पाहण्यासाठी अभ्यास दौरे काढा. मासेमारी हा व्यवसाय करताना त्याचाही अभ्यास करा, आता प्रचंड स्पर्धा आहे. मच्छीमार महिलांसाठी अनेक योजना आहेत. कोकणी माणूस मत्स्य कार्यालयात यायला कंटाळा करतो, आपण पत निर्माण करा आणि शासकीय योजनांचा फायदा घ्या. समुद्राप्रती आदर, प्रेम हवेच."

महाराष्ट्र फिशरमन काँग्रेस कमिटीचे अध्यक्ष मार्तंड नाखवा यांनी महेंद्रशेठ घरत यांच्यामुळेच विठ्ठल-रखुमाई ही सहकारी संस्था सुरू झाल्याचे सांगितले आणि गुरुपौर्णिमेनिमित्त हीच त्यांना भेट असल्याचे ते समजतात असे म्हटले. त्यांनी महेंद्रशेठ घरत यांच्या नेतृत्वात सिडकोविरुद्ध लढण्याचे आश्वासनही दिले.

या कार्यक्रमाला मत्स्य परवाना अधिकारी सुरेश बागुलगावे, विठ्ठल-रखुमाई मत्स्य शेतकरी उत्पादक सहकारी संस्थेचे अध्यक्ष परशुराम डोलकर, साई संस्थान वहाळचे रविशेठ पाटील, राजेंद्र पाटील, विजय शिरढोणकर, माजी सरपंच सुजित मोकल, रुपेश मोहिते, सुगंधा कोळी, नयना कोळी, जोमा कोळी आदी मान्यवर उपस्थित होते.