पोलादपूर पोलिसांची धडक कारवाई; कशेडी घाटातील खुनाचा उलगडा करत एका जोडप्याच्या मुसक्या आवळल्या

प्रेमाच्या जाळ्यात ओढून अपेक्षित पैसा न मिळाल्याने पती-पत्नीने केला खून
 दोन महिन्यांपासून फरारी असलेल्या आरोपींना कर्नाटक सीमेवरून पकडले

खेड, ९ जुलै (प्रतिनिधी): पोलादपूर पोलिसांनी ३० एप्रिल रोजी जुन्या मुंबई-गोवा महामार्गावरील कशेडी घाटात सापडलेल्या अज्ञात मृतदेह प्रकरणाचा यशस्वीपणे छडा लावला आहे. प्रेमसंबंधातून अपेक्षित पैसा न मिळाल्याने एका प्रौढाचा खून करून मृतदेह दरीत फेकल्याचे निष्पन्न झाले आहे. या प्रकरणात एका महिलेसह दोन मुख्य आरोपींना अटक करण्यात आली असून, ते गेल्या दोन महिन्यांपासून कर्नाटक सीमावर्ती भागात लपून राहत होते.

खून झालेल्या व्यक्तीची ओळख: खून झालेल्या प्रौढाचे नाव सुनील दादा हसे (वय ५४, रा. अंबड, ता. अकोले, जि. अहिल्यानगर) असे आहे.

अटक करण्यात आलेले आरोपी: या प्रकरणात वंदना दादासाहेब पुणेकर (वय ३६, रा. जयसिंगपूर, ता. कोल्हापूर) आणि तिचा पती मोहन पांडुरंग सोनार (वय ५४, रा. बोरसूत, ता. संगमेश्वर, जि. रत्नागिरी) या दोघांना अटक करण्यात आली आहे.

घटनेचा तपशील: ३० एप्रिल २०२५ रोजी जुन्या मुंबई-गोवा महामार्गावरील कशेडी घाटातील दरी भागात एका अज्ञात पुरुषाचा सडलेला मृतदेह आढळून आला होता. मृतदेह कुजलेल्या अवस्थेत असल्याने परिसरात दुर्गंधी पसरली होती. भोगावच्या पोलीस पाटील शुभांगी राकेश उतेकर यांनी पोलिसांना माहिती दिल्यानंतर, सहायक पोलीस निरीक्षक रावडे यांच्या नेतृत्वाखालील पथकाने पंचनामा करून तपास सुरू केला.

तांत्रिक विश्लेषण आणि गोपनीय माहितीच्या आधारे अवघ्या चार दिवसांत पोलादपूर पोलिसांनी अक्षय जाधव या तरुणाला ताब्यात घेतले. त्याच्याकडून मिळालेल्या माहितीवरून मृत व्यक्तीची ओळख सुनील दादा हसे अशी पटली.

खुनाचे कारण आणि कट: तपासादरम्यान सुनील हसे यांच्या खुनामागे वंदना दादासाहेब पुणेकर आणि तिचा पती मोहन पांडुरंग सोनार यांचा सहभाग असल्याचे उघड झाले. सुनील हसे हे आपली वॉक्सवॅगन कार (एमएच १५ डीएस ८००५) भाड्याने देऊन स्वतः चालवत उपजीविका करत होते. गाडीत लिफ्ट देताना त्यांची ओळख वंदना पुणेकर हिच्याशी झाली. सुनील हसे श्रीमंत असल्याचा समज झाल्याने वंदनाने त्यांना विश्वासात घेऊन त्यांच्यावर आर्थिक हेतुने डोळा ठेवला. मात्र, अपेक्षित पैसा न मिळाल्याने वंदनाने आपल्या पती मोहनच्या मदतीने सुनील हसे यांचा खून करण्याचा कट रचला. २७ एप्रिल रोजी सकाळच्या सुमारास त्यांनी सुनील हसे यांना गुंगीचे औषध देऊन गाडीतच गळा आवळून ठार मारले आणि मृतदेह कशेडी घाटातील दरीत टाकून दिला.

पोलिसांची कारवाई: घटनेनंतर वंदना आणि मोहन हे दोघे कर्नाटक सीमावर्ती भागात फरार झाले होते. रायगड अधीक्षक आंचल दलाल, अपर अधीक्षक अभिजीत शिवथरे आणि महाड उपविभागीय अधिकारी शंकर काळे यांच्या मार्गदर्शनाखाली पोलादपूर पोलिसांच्या पथकाने या दोघांना मोठ्या कौशल्याने अटक केली. या पथकात सहायक  निरीक्षक आनंद रावडे, पो.ह. तुषार सुतार, पो.ना. अनुजित शिंदे आणि महिला पोलीस शिपाई बनसोडे यांचा समावेश होता.

या खुनाच्या प्रकरणात पोलादपूर पोलिसांनी केवळ मृतदेहाची ओळख पटवून तपासाची दिशा स्पष्ट केली नाही, तर तीनही आरोपींना अटक करून संपूर्ण कटाचा उलगडा केला आहे. पोलिसांनी भारतीय न्यायसंहिता (BNS) कलम १०३(१), २३८, ३(५) अन्वये गुन्हा दाखल केला असून, अटक केलेल्या आरोपींना न्यायालयात हजर करण्यात आले आहे. या यशस्वी तपासाबद्दल तालुक्यातून पोलिसांचे विशेष अभिनंदन होत आहे.