उरुळी देवाची येथे महिलेच्या गळ्यातील गंठण हिसकावले

 

पुणे: पायी चाललेल्या महिलेच्या गळ्यातील ९० हजार रुपये किमतीचे सोन्याचे गंठण दुचाकीवरून आलेल्या दोन अनोळखी चोरट्यांनी हिसकावून नेल्याची घटना उरुळी देवाची येथे घडली आहे. याप्रकरणी फुरसुंगी पोलीस ठाण्यात गुन्हा दाखल करण्यात आला आहे.

याबाबत उरुळी देवाची येथे राहणाऱ्या ५३ वर्षीय महिलेने फिर्याद दिली आहे. पोलिसांनी दिलेल्या माहितीनुसार, फिर्यादी १ जून रोजी सायंकाळी ८ वाजण्याच्या सुमारास धनगरवस्ती रोडने सातव बिल्डिंग समोरून पायी जात होत्या. त्यावेळी दुचाकीवरून आलेल्या दोन अनोळखी इसमांनी त्यांच्या पाठीमागून जवळ येऊन त्यांच्या गळ्यातील ९० हजार रुपये किमतीचे सोन्याचे गंठण जबरदस्तीने हिसका मारून चोरून नेले.

घटनेनंतर फिर्यादीने फुरसुंगी पोलीस ठाण्यात तक्रार दाखल केली. पोलिसांनी दोन अज्ञात दुचाकीस्वार चोरट्यांविरोधात भारतीय न्याय संहिता कलम ३०४(२) आणि ३(५) अन्वये जबरी चोरीचा गुन्हा नोंदवला आहे. आरोपी अद्याप फरार असून पोलीस त्यांचा शोध घेत आहेत.

या प्रकरणाचा पुढील तपास पोलीस उपनिरीक्षक महेश नलावडे करत आहेत. रस्त्यावरून पायी जाताना नागरिकांनी सतर्क राहावे आणि मौल्यवान दागिने घालणे टाळावे, असे आवाहन पोलिसांनी केले आहे.

---------------------------------------------------------------------------------------------------

#PuneCrime #ChainSnatching #Robbery #Fursungi #UruliDevachi #PuneNews