भाड्याच्या जागांना 'रामराम'; शासकीय कार्यालये आता स्वमालकीच्या इमारतींमध्ये - अजित पवार

पुणे, २६ जून २०२५: राज्यातील सर्व शासकीय कार्यालये भाड्याच्या जागांऐवजी स्वमालकीच्या इमारतींमध्ये स्थलांतरित करण्यासाठी विशेष मोहीम राबविण्याचे निर्देश उपमुख्यमंत्री अजित पवार यांनी दिले आहेत. आज मंत्रालयात 'उपमुख्यमंत्र्यांच्या प्रकल्प सनियंत्रण कक्षा'च्या बैठकीत ते बोलत होते.

आवश्यक निधीची तरतूद करून इमारतींच्या बांधकामाला प्राधान्य देण्याचे आवाहन पवार यांनी केले. तसेच, राज्यात पायाभूत सुविधांच्या प्रकल्पांना गती देताना नागरिकांना कोणताही त्रास होणार नाही, याची काळजी घेण्याचे निर्देशही त्यांनी अधिकाऱ्यांना दिले.

या बैठकीत 'अहिल्यानगर-बीड-परळी' रेल्वेमार्गाच्या कामाला गती देण्यासोबतच, कोकणातील पर्यटनाला चालना देणाऱ्या रेवस ते रेडी किनारा महामार्गाच्या कामालाही गती देण्याच्या सूचना उपमुख्यमंत्री अजित पवार यांनी दिल्या. यावेळी त्यांनी प्रगतीपथावर असलेल्या विविध विकासकामांचा सविस्तर आढावा घेतला. शासकीय कार्यालयांचे स्वमालकीच्या इमारतींमध्ये स्थलांतरण केल्याने सरकारी खर्चात बचत होईल आणि प्रशासकीय कामकाजात अधिक सुसूत्रता येईल, अशी अपेक्षा आहे.