पुण्यातील रमणबाग प्रशाला, एन.ई.एम.एस. आणि नवीन मराठी शाळेत आंतरराष्ट्रीय योग दिन उत्साहात साजरा

 

हजारो विद्यार्थ्यांचा योग प्रात्यक्षिकांमध्ये सहभाग; आरोग्यदायी जीवनासाठी योगाचे महत्त्व अधोरेखित

आमदार हेमंत रासने, क्रीडा भारतीचे दीपक मेहंदळे यांच्यासह मान्यवरांची उपस्थिती

पुणे, २१ जून २०२५: आज, शनिवार, २१ जून २०२५ रोजी पुण्यात ११ वा आंतरराष्ट्रीय योग दिन विविध शाळांमध्ये मोठ्या उत्साहात साजरा करण्यात आला. न्यू इंग्लिश स्कूल रमणबाग प्रशाला, डेक्कन एज्युकेशन सोसायटीची एन.ई.एम.एस. शाळा आणि नवीन मराठी शाळा येथे हजारो विद्यार्थ्यांनी योगासने आणि प्राणायामाची प्रात्यक्षिके सादर केली.

रमणबाग प्रशालेत योग दिन: 

रमणबाग प्रशालेत शालाप्रमुख चारुता प्रभुदेसाई यांनी प्रास्ताविकातून 'योगसाधनेने स्वतःचे आणि पर्यायाने सामाजिक स्वास्थ्य उत्तम राहते', असे सांगितले. क्रीडा भारती महाराष्ट्र प्रांत संपर्कप्रमुख दीपक मेहंदळे यांनी प्रमुख पाहुणे म्हणून विद्यार्थ्याना मार्गदर्शन केले. त्यांनी मनाची एकाग्रता आणि निरोगी आरोग्यासाठी योगासनांचे महत्त्व पटवून दिले. विद्यार्थ्यांनी ताडासन, त्रिकोणासन, वृक्षासन, हलासन, पवनमुक्तासन, बालासन, पद्मासन अशा विविध योगासनांची प्रात्यक्षिके कुशलतेने सादर केली. मनीष चलवादीया या विद्यार्थ्याने अवघड असे 'द्विपादग्रीवासन' सहजपणे करून दाखविल्याबद्दल मुख्याध्यापकांनी त्याचे विशेष कौतुक केले. क्रीडा शिक्षक रमेश शेलार यांनी सूत्रसंचालन केले, तर महेश जोशी यांनी आभार मानले.

एन.ई.एम.एस. शाळेत योग आणि संगीत दिनाचा संगम:

शनिवार पेठेतील डेक्कन एज्युकेशन सोसायटीच्या एन.ई.एम.एस. शाळेत योग दिनासोबतच जागतिक संगीत दिनही उत्साहात साजरा करण्यात आला. कसबा विभागाचे आमदार श्री. हेमंत रासने, योगाचार्य डॉ. विदुला शेंडे आणि योग संस्था पुणेचे सहसचिव विक्रांत राजवाडे हे प्रमुख पाहुणे म्हणून उपस्थित होते. शाळेचे मुख्याध्यापक प्रीतम जोशी, हेमांगी देशमुख आणि शिल्पा कुलकर्णी यांच्यासह शिक्षकवृंद उपस्थित होते.

आमदार हेमंत रासने यांनी 'योग आणि स्वच्छता या दोन्ही गोष्टी आपल्याला विकासाकडे नेणाऱ्या आहेत' असे मत मांडले. त्यांनी विद्यार्थ्यांना कोणत्याही क्षेत्रात मेहनतीने उच्च स्थान मिळवण्याचा सल्ला दिला. डॉ. विदुला शेंडे यांनी कपालभाती, अनुलोम-विलोम, भस्त्रिका, भ्रामरी यांसारखे प्राणायाम प्रकार विद्यार्थ्यांकडून करून घेतले. आमदार हेमंत रासने आणि मुख्याध्यापकांनीही विद्यार्थ्यांसोबत काही योगासने केली. जागतिक संगीत दिनाचे औचित्य साधून इयत्ता ७ वी च्या विद्यार्थ्यांनी आहार आणि व्यायामाचे महत्त्व सांगणारे 'हसरी शतवर्षे जयगान' हे गीत सादर केले. संगीत शिक्षिका अश्विनी पटवर्धन यांनी मुलांना मार्गदर्शन केले.

नवीन मराठी शाळेत मोठ्या संख्येने विद्यार्थ्यांचा सहभाग: 

डेक्कन एज्युकेशन सोसायटीच्या नवीन मराठी शाळेतही आंतरराष्ट्रीय योग दिन मोठ्या उत्साहात साजरा झाला. शाळा समिती अध्यक्ष राजेंद्र जोग यांच्या मार्गदर्शनाखाली हा कार्यक्रम आयोजित करण्यात आला होता. मुख्याध्यापिका कल्पना वाघ यांनी विद्यार्थ्यांना नियमित योगासने करून शरीर व मन बळकट करण्याचे आवाहन केले.

इयत्ता पहिली ते चौथीच्या सुमारे बाराशे पन्नास विद्यार्थ्यांनी शिक्षकांच्या मार्गदर्शनानुसार अनुलोम विलोम, कपालभाती, ताडासन, वृक्षासन, धनुरासन, त्रिकोणासन इत्यादी योगासने केली आणि सूर्यनमस्कार घातले. त्यांनी नियमित योगासने व व्यायाम करण्याचा संकल्प केला. शिक्षक व शिक्षकेतर कर्मचाऱ्यांनीही योगासने केली. पालक सभेतही योगासनांचे महत्त्व सांगण्यात आले, ज्यामुळे अनेक पालकांनीही योगासने करून त्यांचे फोटो सोशल मीडियावर अपलोड केले. इरा कावरे या इयत्ता चौथीत शिकणाऱ्या विद्यार्थिनीने आणि शिक्षिका अर्चना देव यांनी योगदिनाची माहिती दिली. सुषमा घडशी यांनी सूत्रसंचालन केले, तर मनीषा कदम यांनी योगगीत सादर केले.

=============================================================

Pune, International Yoga Day, Ramanbagh Prashala, New English School, N.E.M.S. School, Navi Marathi Shala, Yoga Demonstration, Students, Teachers, Hemant Rasane, Deepak Mehendale, Vidula Shende, Physical Health, Mental Well-being, World Music Day, Surya Namaskar, Pranayama.

#YogaDay2025 #Pune #InternationalYogaDay #SchoolYoga #StudentHealth #YogaInSchools #Maharashtra #Fitness