पुणे: पर्यावरण संवर्धन क्षेत्रात आंतरराष्ट्रीय स्तरावर कार्यरत असलेल्या पुणेस्थित 'तेर पॉलिसी सेंटर' या संस्थेला १५ वर्षे पूर्ण झाल्यानिमित्त विविध पर्यावरणपूरक उपक्रमांचे आयोजन करण्यात आले आहे. हे उपक्रम १५ जून २०२५ ते २८ जून २०२५ या कालावधीत होतील, अशी माहिती संस्थेच्या संस्थापक डॉ. विनिता आपटे आणि प्रकल्प व्यवस्थापक सागर लखोटीया यांनी पत्रकार परिषदेत दिली. या उपक्रमांमध्ये 'तेर एन्व्हायरॉथॉन – रन फॉर एन्व्हायर्नमेंट' हा प्रमुख उपक्रम असेल, तसेच व्याख्याने, चित्रकला स्पर्धा आणि चर्चासत्रांचेही आयोजन करण्यात आले आहे.
कार्यक्रमांची सविस्तर रूपरेषा:
- १५ जून २०२५, रविवार: पहाटे ४.३० वाजता पुणे ग्रामीण पोलिसांच्या हॉकी मैदान (पाषाण रस्ता) येथून 'तेर एन्व्हायरॉथॉन' ला सुरुवात होईल. या उपक्रमास पुणे ग्रामीणचे पोलिस आयुक्त संदीपसिंह गिल्ल प्रमुख पाहुणे म्हणून उपस्थित राहणार आहेत. पर्यावरण जागृतीसाठी श्रीनगर ते खारडुंगला अशी दौड करणारे कर्नल भूपेंद्र सुब्बू, बसंत प्रधान, अनुप बनिया, लव बर्मन यांची विशेष उपस्थिती असणार आहे.
- २१ जून २०२५, शुक्रवार: पाईट (जिल्हा पुणे) येथे सकाळी ९ ते ११ या वेळेत योग दिनानिमित्त प्रात्यक्षिके आणि कौस्तुभ केळकर यांचे व्याख्यान आयोजित केले आहे.
- २२ जून २०२५, रविवार: इंद्रधनुष्य पर्यावरण केंद्र (राजेंद्रनगर, पुणे) येथे चित्रकला स्पर्धा घेतली जाईल.
- २४ जून २०२५, मंगळवार: कोडीत येथे 'बायो फर्टिलायझर्स' या विषयावर कौस्तुभ केळकर यांचे व्याख्यान, तर 'मधमाशा आणि निसर्ग' या विषयावर डॉ. प्रशांत सावंत यांचे व्याख्यान आयोजित करण्यात आले आहे.
- २८ जून २०२५, शुक्रवार (समारोप): सायंकाळी ६ ते ८ या वेळेत एस.एम. जोशी सभागृह, नवी पेठ येथे समारोपाचा कार्यक्रम होईल. यात 'शाश्वत पर्यावरण आणि अन्न सुरक्षा' या विषयावर चर्चासत्र आयोजित केले आहे, ज्यात अजय फाटक, डॉ. विनिता आपटे आणि शिरीष जोशी सहभागी होतील. यानंतर चित्रकला स्पर्धेचा बक्षीस समारंभ आणि निमंत्रितांसाठी अल्पोपहार असेल.
१५ वर्षांची पर्यावरण संवर्धनाची वाटचाल:
डॉ. विनिता आपटे यांनी यावेळी संस्थेच्या १५ वर्षांच्या वाटचालीवर प्रकाश टाकला. 'तेर पॉलिसी सेंटर' ही संस्था संयुक्त राष्ट्र संघाच्या स्वयंसेवी संस्थांच्या कार्यक्रमांची भागीदार असून, विशेष निरीक्षक दर्जा असलेली आर्थिक सल्लागार संस्था नेचर फंड (जर्मनी), एफ.एच.आय.-३६० (वॉशिंग्टन), नेट झिरो (आफ्रिका, टांझानिया) अशा अनेक आंतरराष्ट्रीय संस्थांशी संलग्नित आहे.
तेर पॉलिसी सेंटर गेल्या १५ वर्षांपासून जंगल वाढवणे, विहिरींचे पुनरुज्जीवन करणे, पर्यावरण शिक्षण व पर्यावरण जागृतीसाठी कार्यरत आहे. संस्थेने आजपर्यंत पुण्यासह महाराष्ट्र, गुजरात, कर्नाटक, आसाम, भुवनेश्वर, गोवा, राजस्थान यांसारख्या विविध ठिकाणी ५ लाखांपेक्षा जास्त वृक्ष लावून त्यांची जोपासना केली आहे. शालेय वयापासून पर्यावरणाबद्दल प्रेम निर्माण व्हावे यासाठी 'ग्रीन ऑलिम्पियाड' हा उपक्रम आयोजित केला जातो. तसेच, वारजे टेकडी नागरी वन प्रकल्पासारख्या उपक्रमांमध्ये संस्थेचा पुढाकार असतो. पर्यावरण संवर्धन आणि संरक्षण क्षेत्रात योगदान देणाऱ्या तरुण संशोधकांना 'डॉ. ए.पी.जे. अब्दुल कलाम यंग रिसर्च फेलोशिप' दिली जाते. राष्ट्रीय आणि आंतरराष्ट्रीय परिषदांचेही आयोजन केले जाते.
२०१० पासून संस्थेचा हवामान बदलाच्या परिषदांमध्ये विशेष सहभाग असतो. गेली काही वर्षे या परिषदेत शामियाना घेणारी 'तेर पॉलिसी सेंटर' ही भारतातील एकमेव संस्था आहे. सध्या संपूर्ण भारतातील २०० पेक्षा जास्त ग्रामपंचायती आणि स्वयंसेवी संस्थांसोबत संस्थेचे काम सुरू आहे. २८ जून रोजी संस्थेला १५ वर्षे पूर्ण होत असल्याने केवळ पुण्यातच नव्हे, तर ज्या गावांमध्ये संस्थेने भरीव काम केले आहे, अशा पाईट, कोडीत, पुलिकत, गुजरात आणि पंजाब येथेही हवामान बदलाविषयी जनजागृती करण्यासाठी कार्यक्रम आयोजित करण्यात आले आहेत. या कार्यक्रमांची सुरुवात १५ जून रोजी 'इन्व्हिरोथन'ने होईल.
Ter Policy Center, Environmental Initiatives, Pune Events, Anniversary Celebration, Environment Conservation, Green Marathon
#TerPolicyCenter #EnvironmentConservation #PuneEvents #Envirothon #EnvironmentalAwareness #GreenInitiatives #Pune #ClimateAction
Reviewed by ANN news network
on
६/१३/२०२५ ०५:३८:०० PM
Rating:
कोणत्याही टिप्पण्‍या नाहीत: