करोडो रुपयांच्या 'डिवाईन पॉवर' फसवणुकीचा मुख्य सूत्रधार अजय उसारे गजाआड

 

'डिवाईन पॉवर फॉरेक्स ट्रेडिंग'च्या माध्यमातून केली होती नागरिकांची कोट्यवधी रुपयांची फसवणूक.
 ३ वर्षांपासून दुबई, नेपाळमध्ये लपून होता

ठाणे: हजारो नागरिकांना 'डिवाईन पॉवर फॉरेक्स ट्रेडिंग'मध्ये गुंतवणुकीवर आकर्षक नफा देण्याचे आमिष दाखवून करोडो रुपयांची फसवणूक करणाऱ्या टोळीचा मुख्य सूत्रधार आणि संचालक अजय उसारे याला ठाणे सायबर पोलिसांनी अखेर गजाआड केले आहे. सुमारे तीन वर्षांपासून आपली ओळख आणि अस्तित्व लपवून दुबई आणि नेपाळ यांसारख्या ठिकाणी तो वास्तव्यास होता. ही मोठी कारवाई दिनांक २४ जून २०२५ रोजी उघडकीस आली आहे.

मिळालेल्या माहितीनुसार, सन २०२२ मध्ये ओरियाना बिझनेस पार्क, ऑफिस क्र. ४०२, रोड नं. २२, वागळे इस्टेट, ठाणे येथे 'डिवाईन पॉवर' या कंपनीचे कार्यालय उघडण्यात आले होते. या कंपनीने विविध योजनांमध्ये गुंतवणूक केल्यास पुढील १५ महिने दरमहा १५ टक्के व्याज देण्याचे आकर्षक आमिष गुंतवणूकदारांना दाखवले होते. या आमिषाला बळी पडून फिर्यादी आणि इतर ९१ साक्षीदार गुंतवणूकदारांनी एकूण ७,१४,९३,३४९/- रुपये या कंपनीत गुंतवले होते. मात्र, प्रत्यक्षात त्यांची मोठी आर्थिक फसवणूक झाली.

या फसवणुकीप्रकरणी वागळे इस्टेट पोलीस ठाणे येथे गु.र.नं. २४२/२०२२ अंतर्गत भारतीय दंड संहिता कलम ४२० (फसवणूक), ४०६ (विश्वासघात), ४०९ (लोकसेवकाकडून विश्वासघात), ३४ (सामान्य उद्देश), १२० (ब) (गुन्हेगारी कट) सह महाराष्ट्र ठेवीदारांच्या (वित्तिय संस्थामधील) हितसंबंधाचे संरक्षण अधिनियम १९९९ चे कलम ३ व ४ अन्वये गुन्हा दाखल करण्यात आला होता. या गुन्ह्याचा तपास दिनांक ७ ऑक्टोबर २०२४ पासून सायबर पोलीस ठाणे करीत होते.

सदर गुन्ह्याचा मुख्य सूत्रधार अजय उसारे हा गुन्हा केल्यापासून मागील तीन वर्षांपासून पोलिसांच्या हातावर तुरी देऊन फरार होता. तो सतत आपली ओळख बदलून आणि आपले अस्तित्व लपवून दुबई आणि नेपाळ या देशांमध्ये राहत होता. सायबर पोलीस ठाणे येथील तपास पथकातील निरीक्षक श्रीमती प्रियांका शेळके, सहायक निरीक्षक प्रदीप सरफरे, चेतन पाटील, नाईक धीरज गायकवाड, प्रविण आव्हाड यांनी तांत्रिक तपासान्वये त्याचा कसून शोध घेतला. अथक प्रयत्नांनंतर, त्यांनी आरोपी अजय उसारे याला डेहराडून, उत्तराखंड येथून ताब्यात घेतले आणि दिनांक १३ जून २०२५ रोजी रात्री २०:०६ वाजता त्याला अटक केली. अटक आरोपीची दिनांक २६ जून २०२५ पर्यंत पोलीस कस्टडी रिमांड मंजूर आहे.

या गुन्ह्यात यापूर्वीही ५ आरोपींना अटक करण्यात आली असून, सुमारे ८ कोटी रुपयांची मालमत्ता संरक्षित करण्यात आलेली आहे. गुन्ह्याचा पुढील तपास मपोनि प्रियांका शेळके करीत आहेत.

ही कामगिरी उप आयुक्त, आर्थिक गुन्हे शाखा/सायबर  पराग मणेरे यांच्या मार्गदर्शनाखाली सहाय्यक आयुक्त, दत्तात्रय पाबळे, सायबर पोलीस ठाण्याचे वरिष्ठ निरीक्षक प्रकाश वारके, निरीक्षक प्रियांका शेळके, सहायक निरीक्षक मंगलसिंग चव्हाण, प्रदिप सरफरे, चेतन पाटील, उपनिरीक्षक अविनाश बाबरेकर, अंमलदार गणेश ईलग, राजेंद्र नेगी, प्रविण इंगळे आणि  धीरज गायकवाड यांनी केली आहे. या यशस्वी कारवाईमुळे हजारो गुंतवणूकदारांना न्याय मिळण्याची आशा निर्माण झाली आहे.

Financial Fraud, Investment Scam, Cyber Crime, Arrest, Thane Police, Divine Power Forex Trading, Money Laundering.

 #ThanePolice #CyberCrime #FinancialFraud #ScamArrest #DivinePower #InvestmentScam #JusticeServed