कुंडमळा येथील इंद्रायणी नदीवरील पूल कोसळून मोठा अपघात, २५ ते ३० पर्यटक नदीत बुडाल्याची भीती (बातमी अपडेट होत आहे...)

मावळ (पुणे जिल्हा), १५ जून: तळेगाव दाभाडे परिसरातील प्रसिद्ध पर्यटनस्थळ कुंडमळा येथे आज दुपारी एक भीषण दुर्घटना घडली. इंद्रायणी नदीवरील जुना पूल अचानक कोसळल्याने २५ ते ३० पर्यटक नदीत बुडाल्याची भीती व्यक्त होत आहे. रविवार असल्याने या ठिकाणी मोठ्या संख्येने पर्यटक भेट देण्यासाठी आले होते.

दुपारच्या सुमारास घडलेल्या या दुर्घटनेची माहिती मिळताच स्थानिक पोलीस, जिल्हा प्रशासन आणि आपदा व्यवस्थापन पथकाने तत्काळ कारवाई केली. युद्धपातळीवर बचावकार्य सुरू करण्यात आले असून, आपदा व्यवस्थापन दल आणि स्थानिकांच्या मदतीने बचावकार्य सुरू आहे.

गेल्या दोन दिवसांपासून मावळ परिसरात सुरू असलेल्या मुसळधार पावसामुळे इंद्रायणी नदीच्या पाणीपातळीत झपाट्याने वाढ झाली आहे. या कारणामुळे बचावकार्य अधिक कठीण झाले आहे. तरीही अधिकारी आणि स्वयंसेवक संघटित प्रयत्न करत आहेत.

स्थानिक लोकांच्या म्हणण्यानुसार, हा पूल जुना झाला होता आणि त्याची दुरुस्ती आवश्यक होती. मात्र, अचानक कोसळल्याने हा मोठा अपघात झाला. 

या दुर्घटनेत सापडलेल्या पर्यटकांच्या कुटुंबीयांमध्ये चिंता आणि अस्वस्थता पसरली आहे. अनेक जण घटनास्थळी गर्दी करून आपल्या नातेवाईकांची चौकशी करत आहेत. सध्या परिस्थिती गंभीर असून, आणखी काही तास बचावकार्य चालू राहण्याची शक्यता आहे.

अपडेट

कुंडमळा पूल दुर्घटनेतील ३ मृतदेह हाती; रात्रीच्या अंधारामुळे बचावकार्यात अडथळे,

---

मावळ, दि. १५ जून २०२५ (सायंकाळ): मावळ तालुक्यातील तळेगाव दाभाडेजवळील प्रसिद्ध पर्यटनस्थळ कुंडमळा येथे इंद्रायणी नदीवरील जुना पूल आज (रविवार) सायंकाळी ४ वाजण्याच्या सुमारास कोसळल्याने भीषण दुर्घटना घडली आहे. या दुर्घटनेत सुमारे २५ ते ३० पर्यटक नदीच्या प्रवाहात वाहून गेल्याची भीती व्यक्त केली जात होती, त्यापैकी आतापर्यंत ३ जणांचे मृतदेह हाती लागले आहेत.

घटनेची माहिती मिळताच स्थानिक पोलीस, ग्रामस्थ आणि आपत्कालीन पथकांनी युद्धपातळीवर बचावकार्य सुरू केले आहे. मात्र, रात्रीच्या अंधारामुळे आणि मावळ परिसरात सुरू असलेल्या मुसळधार पावसामुळे इंद्रायणी नदीच्या पाणीपातळीत मोठ्या प्रमाणात वाढ झाली आहे, ज्यामुळे बचावकार्यात मोठे अडथळे येत आहेत.

रविवारी सुट्टीचा दिवस असल्याने कुंडमळा परिसरात पर्यटकांची मोठी गर्दी होती. त्यामुळे पूल कोसळताच अनेक जण थेट नदीच्या वेगात प्रवाहात वाहून गेले. पोलीस आणि बचाव पथकांकडून रात्रभर शोधमोहीम सुरू ठेवण्याचे प्रयत्न सुरू आहेत, जेणेकरून अडकलेल्या किंवा वाहून गेलेल्या व्यक्तींना शोधता येईल. या दुर्घटनेमुळे परिसरात शोककळा पसरली असून, बुडालेल्या पर्यटकांच्या नातेवाईकांमध्ये चिंतेचे आणि भीतीचे वातावरण आहे.

प्रशासनाने नागरिकांना नदीकाठी न जाण्याचे आवाहन केले असून, बचावकार्यासाठी आवश्यक ती सर्व मदत पुरवली जात आहे.

------------------------------------------------------------------------------------------------------------

कुंडमळा पूल दुर्घटनेत ३ मृत्यू, ४७ जखमी; १०८ सेवेची प्रशंसनीय तत्परता

मावळ, १५ जून: तळेगाव दाभाडे येथील कुंडमळा पर्यटनस्थळावर आज दुपारी घडलेल्या साकव पूल दुर्घटनेमध्ये तीन जणांचा मृत्यू झाला असून ४७ जण जखमी झाले आहेत. या भीषण अपघातानंतर १०८ आपत्कालीन वैद्यकीय सेवेने अत्यंत कार्यक्षमतेने बचावकार्य करून अनेकांचे प्राण वाचवले आहेत.

मृत्यू पावलेल्यांमध्ये कोल्हापूरचे रोहित माने (३५) व त्यांचा ५ वर्षांचा मुलगा विहान माने तसेच पुण्याचे चंद्रकांत साठले (६५) यांचा समावेश आहे. या दुर्दैवी घटनेने दोन्ही कुटुंबांना मोठा धक्का बसला आहे.

पूल कोसळल्याच्या वृत्ताने १०८ नियंत्रण कक्षात हालचाली सुरू झाल्या. जिल्हा व्यवस्थापक डॉ. प्रियांक जावळे आणि रोहित ढोमसे यांच्या नेतृत्वाखाली तत्काळ सात रुग्णवाहिका घटनास्थळी रवाना करण्यात आल्या. अरुंद रस्त्यांच्या अडचणी असूनही, आपत्कालीन पथकाने १५-२० मिनिटांच्या आत घटनास्थळावर पोहोचून बचावकार्य सुरू केले.

सुमारे २०-२५ गंभीर जखमींना तळेगाव जनरल हॉस्पिटल आणि अथर्व हॉस्पिटल यासारख्या ट्रॉमा केंद्रांमध्ये तातडीने दाखल करण्यात आले. काही जखमींना स्थानिक नागरिकांनी खाजगी वाहनांमधून रुग्णालयात नेण्यात मदत केली. या बचावकार्यासाठी मावळ परिसरातील विविध केंद्रांवरून रुग्णवाहिका एकत्रित करण्यात आल्या. तळेगाव दाभाडे, वडगाव मावळ, कामशेत, देहूगाव, निगडी आणि पवननगर येथील केंद्रांवरून रुग्णवाहिका पाठवण्यात आल्या. मुंबई-पुणे द्रुतगती मार्गावरील उर्से टोल प्लाझावरील रुग्णवाहिकाही या कार्यात सहभागी झाली. 

या आपत्कालीन परिस्थितीत डॉक्टर आणि आरोह्य कर्मचारयांनी घटनास्थळावरच प्राथमिक वैद्यकीय सेवा पुरवली. रुग्णवाहिका चालकांनी देखील अत्यंत धैर्याने आणि कुशलतेने आपली जबाबदारी पार पाडली.

तहसील कार्यालय मावळ येथे २४ तास कार्यरत मदत कक्ष स्थापन करण्यात आला आहे. या दुर्घटनेशी संबंधित कोणतीही मदत आवश्यक असलेल्या नागरिकांनी कक्षाशी ०२११४–२३५४४० या क्रमांकावर संपर्क साधावा, असे आवाहन करण्यात आले आहे.

------------------------------------------------------------------------------------------------------------------------

मृतांच्या कुटुंबांना ५ लाख मदत; जखमींचा खर्च शासन उचलणार - गिरीश महाजन

मावळ, १५ जून: कुंडमळा येथील पूल दुर्घटनेनंतर राज्याचे जलसंपदा तथा आपत्ती व्यवस्थापन मंत्री गिरीश महाजन यांनी आज सायंकाळी घटनास्थळी भेट देऊन पीडित कुटुंबांसाठी मोठी आर्थिक मदत जाहीर केली आहे. मृत्यू झालेल्या प्रत्येक व्यक्तीच्या कुटुंबाला पाच लाख रुपयांची नुकसान भरपाई मिळणार असून, जखमी व्यक्तींच्या संपूर्ण वैद्यकीय उपचाराचा खर्च राज्य शासन उचलणार आहे.

मंत्री महाजन यांनी घटनास्थळावर पोहोचून सुरू असलेल्या बचावकार्याचा थेट आढावा घेतला. त्यांच्यासोबत विभागीय आयुक्त डॉ. चंद्रकांत पुलकुंडवार, पिंपरी-चिंचवड शहर पोलीस आयुक्त विनयकुमार चौबे, जिल्हाधिकारी जितेंद्र डुडी, जिल्हा परिषदेचे मुख्य कार्यकारी अधिकारी गजानन पाटील आणि उपविभागीय अधिकारी सुरेंद्र नवले यांसह अनेक प्रशासकीय अधिकारी उपस्थित होते.

घटनास्थळी एनडीआरएफ पथक, आपदा मित्र संघटना, पुणे, पिंपरी-चिंचवड आणि पीएमआरडीएचे अग्निशमन दल तसेच स्थानिक बचाव संस्थांचे कार्यकर्ते युद्धपातळीवर कार्यरत आहेत. मंत्री महाजन यांनी या बचावकार्यात स्थानिक नागरिकांनी दिलेल्या सहकार्याचे विशेष कौतुक केले.

या गंभीर दुर्घटनेच्या संपूर्ण चौकशीचे आदेश देण्यात आले आहेत. पूल कोसळण्याची नेमकी कारणे शोधून जबाबदार व्यक्तींवर कारवाई करण्याचे निर्देश दिले आहेत. तसेच भविष्यात अशा दुर्घटना टाळण्यासाठी आवश्यक उपाययोजना करण्याचे आदेश देण्यात आले आहेत.

मंत्री महाजन यांनी या दुर्घटनेला अत्यंत दुर्दैवी असे संबोधित करताना, पर्यटकांनी पर्यटनस्थळांवर जाताना योग्य खबरदारी घेण्याचे आवाहन केले आहे. तसेच शासन अशा घटनांबाबत सतर्कता बाळगत असल्याचे त्यांनी स्पष्ट केले.

"हे अत्यंत दुर्दैवी आहे की रविवारच्या आनंदाच्या सहलीत तीन कुटुंबांना अशा मोठ्या शोकाला सामोरे जावे लागले. शासन पीडित कुटुंबांच्या पाठीशी उभे राहील," असे महाजन यांनी मीडियाशी बोलताना सांगितले.

या दुर्घटनेनंतर राज्याचे मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री तथा जिल्ह्याचे पालकमंत्री अजित पवार यांनी मृत्यू पावलेल्यांच्या कुटुंबांप्रती शोक व्यक्त केला आहे. 

--------------------------------------------------------------------------------------------------------------------

Bridge Collapse, Tourist Accident, Rescue Operation, Maharashtra, Maval, River Incident

 #BridgeCollapse #MavalAccident #TouristSafety #RescueOperation #Maharashtra #IndrayaniRiver #EmergencyResponse #PuneNews #TouristAccident #InfrastructureFailure