आंतरराष्ट्रीय योग दिन महोत्सव: पिंपरी-चिंचवडमध्ये 'इंटिग्रेटेड योग साधना चिकित्सा शिबिरा'ची यशस्वी सांगता

पतंजलि परिवार आणि शर्मिला बाबर यांच्या संयुक्त विद्यमाने योग शिबिर यशस्वी

पिंपरी, २१ जून २०२५: दरवर्षी २१ जून रोजी जगभरात साजरा होणाऱ्या 'आंतरराष्ट्रीय योग दिना' निमित्त, पिंपरी-चिंचवडमध्ये आयोजित करण्यात आलेल्या 'इंटिग्रेटेड योग साधना चिकित्सा शिबिरा'ची आज यशस्वी सांगता झाली. योगाचे महत्त्व आणि त्याचे शारीरिक, मानसिक तसेच आध्यात्मिक फायदे लोकांपर्यंत पोहोचवण्याच्या उद्देशाने, पतंजलि परिवार युवा भारत, पिंपरी-चिंचवड आणि माजी नगरसेविका शर्मिलाताई राजेंद्र बाबर यांच्या संयुक्त विद्यमाने हे शिबिर १५ जून ते २१ जून या कालावधीत दुर्गा देवी उद्यान, दुर्गा टेकडी, निगडी येथे आयोजित करण्यात आले होते.

गेले सात दिवस, रोज सकाळी ५:३० ते ७:३० वाजेपर्यंत, योग शिक्षक आचार्य श्री. अतुल कटारे यांच्या मार्गदर्शनाखाली हे शिबिर पार पडले. आज, शिबिराच्या शेवटच्या दिवशी योगसाधना करण्यासाठी आमदार सौ. उमाताई खापरे, आमदार श्री. अमितजी गोरखे, श्री. राजेंद्र बाबर, श्री. जयदीप खापरे हे मान्यवर उपस्थित होते. त्यांच्यासोबतच दुर्गा टेकडीवरील सूर्य नमस्कार ग्रुप, सुप्रभात ग्रुप, जय हरी ग्रुपचे सर्व सन्माननीय सदस्य आणि निसर्गप्रेमी नागरिक मोठ्या संख्येने उपस्थित होते.

या शिबिरामुळे योग आणि आरोग्याबाबत जनजागृती झाली असून, नागरिकांना योगाचे दैनंदिन जीवनातील महत्त्व पटवून देण्यास मदत झाली.