२०१२ च्या आझाद मैदान दंगलीची पुनरावृत्ती टाळण्यासाठी ‘पॅलेस्टाईन समर्थन’ मोर्चावर बंदी घाला! - हिंदू संघटनांची शासनाकडे मागणी (VIDEO)

 

मुंबई: २०१२ साली आझाद मैदानात झालेल्या दंगलीची पुनरावृत्ती टाळण्यासाठी, १८ जून २०२५ रोजी नियोजित 'गाझा-पॅलेस्टाईन समर्थन' मोर्च्यावर तातडीने बंदी घालावी, अशी मागणी हिंदु राष्ट्र समन्वय समितीने महाराष्ट्र शासनाकडे केली आहे. मुख्यमंत्री, गृहमंत्री, पोलीस महासंचालक आणि मुंबईचे सहपोलीस आयुक्त (कायदा व सुव्यवस्था) सत्यनारायण चौधरी यांना याबाबत निवेदन सादर करण्यात आले. सत्यनारायण चौधरी यांनी 'आम्हाला याची माहिती असून आम्ही योग्य ती कार्यवाही करू' असे आश्वासन दिल्याचे समितीने सांगितले.

२०१२ च्या दंगलीची दाहकता: 

हिंदु राष्ट्र समन्वय समितीने आपल्या निवेदनात २०१२ मध्ये म्यानमारमधील कथित अत्याचारविरोधात आझाद मैदानावर झालेल्या मोर्चाची आठवण करून दिली. हा मोर्चा नंतर दंगलीत परिवर्तित झाला होता, ज्यात 'अमर जवान ज्योती'ची विटंबना, पोलीस आणि मीडियाच्या गाड्यांची जाळपोळ, सार्वजनिक मालमत्तेची हानी, तसेच महिला पोलीस कर्मचाऱ्यांवर हल्ले यांसारख्या गंभीर घटना घडल्या होत्या.

मोर्चामागील हेतूवर प्रश्नचिन्ह: 

या मोर्चाबाबत अभिनेत्री स्वरा भास्कर यांनी ट्विटरवरून माहिती दिली असून, डाव्या संघटनांनी याचे आयोजन केले आहे. हिंदु राष्ट्र समन्वय समितीने आरोप केला आहे की, या मोर्चाचे स्वरूप एकतर्फी आहे, जे भारताच्या परराष्ट्र धोरणाविरोधात आणि इस्रायलसारख्या मित्र राष्ट्राविरोधात आहे. हमास या दहशतवादी संघटनेने केलेल्या हिंसाचारावर हे आंदोलक मौन बाळगतात आणि उलट भारतातील मुस्लिम समाजाला चिथावणी देण्याचे काम करतात, असा गंभीर आरोप समितीने केला आहे.

कायदा-सुव्यवस्थेचा धोका आणि दुटप्पी भूमिका: 

समितीने म्हटले आहे की, या आंदोलनामुळे मुंबईत पुन्हा धार्मिक तेढ आणि कायदा-सुव्यवस्थेचा प्रश्न निर्माण होऊ शकतो. हिंदूंवरील अत्याचार, काश्मिरी विस्थापन, बांगलादेशातील हिंसा किंवा भारतावरील दहशतवादी हल्ले यांवर हेच आंदोलक कधीही रस्त्यावर उतरले नाहीत, याकडेही समितीने लक्ष वेधले. हे आंदोलन मानवतावादी नसून भारतविरोधी, हिंदूविरोधी आणि अप्रत्यक्षपणे दहशतवादास समर्थन देणारे असल्याचा समितीचा दावा आहे.

त्यामुळे, या मोर्च्यावर बंदी घालावी आणि आयोजकांवर कठोर कारवाई करावी, अशी समितीची ठाम मागणी आहे. मुंबईकरांच्या सुरक्षेच्या आणि सामाजिक सलोख्याच्या दृष्टीने हे पाऊल अत्यावश्यक असल्याचे त्यांनी नमूद केले.

निवेदन सादर करताना उपस्थित मान्यवर: 

हे निवेदन सादर करताना हिंदु राष्ट्र समन्वय समितीचे संयोजक सुभाष अहिर, महाराष्ट्र मंदिर महासंघाचे संघटक विलास निकम, मुंबई उच्च न्यायालयाच्या अधिवक्त्या सुरभि सावंत, अधिवक्ता प्रथमेश गायकवाड, बजरंग दलाचे उदयभान तिवारी, कायदेशीर सल्लागार सानिया शेवाळे, मानव सेवा प्रतिष्ठानचे  सिद्धार्थ पाटील, भाजपचे मलबार हिल महामंत्री संतोष पालेकर, हिंदु जनजागृती समितीचे मुंबई समन्वयक बळवंत पाठक,  रविंद्र दासरी, मधुसूदन आले आणिसतीश सोनार हे उपस्थित होते.

---------------------------------------------------------------------------------------------------------

#Mumbai #AzadMaidan #PalestineRally #HinduOrganizations #LawAndOrder #RiotPrevention #Maharashtra #AntiTerrorism #IndianPolitics #PublicSafety