पिंपरी-चिंचवडच्या विकास आराखड्यावर आक्षेप नोंदवा; 'नागरी हक्क कृती समिती'चे नागरिकांना आवाहन (VIDEO)

 

 हरकती नोंदवण्यासाठी १८ जुलैपर्यंत मुदत; नागरिक कृती समितीचा पुढाकार

मोहननगरसह परिसरातील नागरिक २३ जूनला महापालिकेवर धडकणार, हरकती नोंदवणार

पिंपरी-चिंचवड: पिंपरी-चिंचवड महानगरपालिकेने जाहीर केलेल्या प्रारूप विकास आराखड्या (डीपी) बाबत नागरिकांना सूचना व हरकती नोंदवण्यासाठी १८ जुलै २०२५ पर्यंत अंतिम मुदत आहे. यासाठी मिळालेल्या ६० दिवसांपैकी ३० दिवसांचा कालावधी यापूर्वीच संपला असून, उर्वरित वेळेत नागरिकांनी मोठ्या संख्येने आपल्या हरकती व सूचना दाखल कराव्यात, असे आवाहन 'नागरी हक्क कृती समिती'ने केले आहे.

मारुती भापकर आणि महादेव नेर्लेकर यांच्या नेतृत्वाखालील नागरी हक्क कृती समितीने मोहननगर, रामनगर आणि काळभोरनगर येथील नागरिकांना विकास आराखड्याबाबतच्या सूचना व हरकतींची प्रत उपलब्ध करून दिली आहे. नागरिकांनी आपल्या सद्सद्विवेकबुद्धीने या मसुदा प्रतीमध्ये आवश्यक ते बदल करून, त्याची झेरॉक्स प्रत आपल्या आजूबाजूच्या लोकांना देऊन त्यांच्या स्वाक्षऱ्या गोळा कराव्यात, असे आवाहन समितीने केले आहे. प्रत्येक नागरिकाने वैयक्तिकरित्या हरकती नोंदवून आपल्या विभागातून जास्तीत जास्त हरकती दाखल होणे महत्त्वाचे आहे, असे समितीचे म्हणणे आहे.

या सर्व स्वाक्षरी केलेल्या, पत्ता आणि मोबाईल नंबरसह असलेल्या हरकती पिंपरी येथील महापालिका मुख्यालयाच्या मुख्य प्रवेशद्वारावर सोमवार, दिनांक २३ जून २०२५ रोजी सकाळी ११.०० वाजता मोठ्या संख्येने एकत्र जमून नोंदवण्यात येणार आहेत.

या प्रक्रियेत मोहननगर, रामनगर, महात्मा फुलेनगर, दत्तनगर, विद्यानगर, चिंचवड स्टेशन, आनंदनगर, साईबाबानगर, इंदिरानगर, शंकरनगर, परशुरामनगर येथील नागरिकांनी मोठ्या संख्येने सहभागी व्हावे, असे आवाहन नागरी हक्क कृती समितीने केले आहे.

-----------------------------------------------------------------------------------------------------------------------

Pimpri Chinchwad, Development Plan, DP, Objections, Suggestions, Citizen Participation, Nagar Hakka Kruti Samiti, Maruti Bhapkar, Mahadev Nerlekar, Urban Planning

 #PimpriChinchwad #PCCMC #DevelopmentPlan #DPHarkati #CitizenRights #UrbanPlanning #PuneNews #PublicParticipation #MarutiBhapkar