पावसाळ्यापूर्वी नागरिकांसाठी आमदार शंकर जगताप थेट मैदानात; कामांची पाहणी

 

 मान्सूनपूर्व कामांची 'ऑनफिल्ड' पाहणी

चिंचवड, दि. २० मे २०२५: आगामी पावसाळ्यात नागरिकांना कोणत्याही प्रकारचा त्रास होऊ नये, यासाठी चिंचवड विधानसभा मतदारसंघाचे आमदार शंकर जगताप यांनी आज थेट रस्त्यावर उतरून मान्सूनपूर्व कामांची पाहणी केली. त्यांनी मतदारसंघातील विविध भागांना भेटी देऊन तेथील नालेसफाई, रस्त्यांवरील खड्डे, अतिक्रमण, पाणी निचऱ्याची समस्या आणि वाहतूक व्यवस्थेतील अडचणींचे प्रत्यक्ष निरीक्षण केले आणि प्रशासनाला तातडीने उपाययोजना करण्याचे आदेश दिले.

आमदार जगताप यांनी पुनावळे, किवळे, वाकड आणि परिसरातील अनेक भागांचा दौरा केला. या पाहणीदरम्यान त्यांनी संबंधित विभागाच्या अधिकाऱ्यांशी चर्चा करून कामे जलद गतीने पूर्ण करण्याचे निर्देश दिले.

पुनावळे परिसरातील तातडीचे उपाय:

पुनावळे अंडरपासखाली रस्त्यावर पडलेल्या खड्ड्यांची तातडीने दुरुस्ती करण्याचे आदेश आमदार जगताप यांनी दिले. तसेच, जलवाहिन्यांची स्वच्छता करून नवीन स्ट्रॉम वॉटर लाईन टाकण्याची सूचनाही त्यांनी केली. भारत पेट्रोल पंपासमोरील पाणी साचण्याची समस्या लक्षात घेऊन, तिथे नवीन स्ट्रॉम वॉटर लाईन टाकण्याचा निर्णय घेण्यात आला. यासोबतच, पुनावळे सर्व्हिस रोडवरील अतिक्रमण तात्काळ हटवण्याचे निर्देश प्रशासनाला देण्यात आले.

किवळे आणि समीर लॉन्स परिसरातील उपाययोजना:

समीर लॉन्स अंडरपासजवळ जुन्या स्ट्रॉम वॉटर लाईनमुळे निर्माण होणारा अडथळा दूर करण्यासाठी नवीन लाईन टाकण्याचे आदेश आमदार जगताप यांनी दिले. किवळे परिसरातील नाल्यांमध्ये साचलेला गाळ साफ करून स्क्रिनिंगचे अर्धवट राहिलेले काम तातडीने पूर्ण करण्याच्या सूचना त्यांनी पर्यावरण विभागाला दिल्या.

वाहतूक नियोजन आणि स्मशानभूमीचे काम:

मुकाई चौक ते वाकडदरम्यान होणारी वाहतूक कोंडी कमी करण्यासाठी आमदार जगताप यांनी मुकाई चौकातून वाकडकडे जाणारी वाहतूक एकेरी करण्याचे आदेश बीआरटीएस आणि स्थापत्य विभागाला दिले. याव्यतिरिक्त, वाल्हेकरवाडीतील अपूर्ण स्मशानभूमीच्या कामांची पाहणी करून ते काम त्वरित पूर्ण करण्याचे निर्देश त्यांनी दिले.

सोसायट्यांमधील पाणी साचण्याच्या समस्यांवर तोडगा:

गोखले वृंदावन आणि शांतीवन सोसायटीसमोरील स्ट्रॉम वॉटर लाईनमुळे सोसायटीच्या प्रवेशद्वारावर पाणी साचत असल्याने, तिथे रॅम्प तयार करण्याचे आदेश देण्यात आले. चापेकर चौक ते वाल्हेकरवाडी कॉर्नरपर्यंत स्ट्रॉम वॉटर लाईन टाकून नव्याने रस्ता तयार करण्याचे निर्देशही त्यांनी दिले. सिल्वर गार्डन सोसायटी परिसरात स्ट्रॉम वॉटर लाईन नसल्यामुळे निर्माण होणाऱ्या पाणी साचण्याच्या समस्येवर तातडीने उपाययोजना करण्याचे आदेश आमदार जगताप यांनी प्रशासनाला दिले.

एनएचएआयच्या प्रलंबित कामांवर सूचना:

राष्ट्रीय महामार्ग प्राधिकरणा (NHAI) मार्फत सुरू असलेल्या सर्व्हिस रोडच्या कामांची पाहणी करताना आमदार जगताप यांनी संबंधित अधिकाऱ्यांना कामे लवकरात लवकर पूर्ण करून पावसाळ्यातील पाण्याचा योग्य निचरा होईल, याची खात्री करण्याचे आदेश दिले.

या पाहणी दौऱ्यात आमदार शंकर जगताप यांनी नागरिकांच्या समस्याही ऐकून घेतल्या आणि पावसाळ्यापूर्वी सर्व आवश्यक पायाभूत सुविधा वेळेत पूर्ण करण्यावर भर दिला जाईल, असे आश्वासन दिले.

या दौऱ्यात माजी सत्तारूढ पक्षनेते नामदेव ढाके, माजी उपमहापौर सचिन चिंचवडे, माजी नगरसेविका संगीता भोंडवे, अश्विनी चिंचवडे यांच्यासह अनेक माजी नगरसेवक, पदाधिकारी आणि प्रशासकीय अधिकारी उपस्थित होते.

----------------------------------------------------------------------------

#ShankarJagtap #Chinchwad #PreMonsoonPrep #Infrastructure #RoadSafety #WaterDrainage #TrafficManagement #PuneNews