निफाडचे सहकार महर्षी रमेशचंद्र घुगे यांचा शेकडो समर्थकांसह भाजपात प्रवेश

नाशिक, मंगळवार २० मे २०२५ : नाशिक जिल्ह्यातील निफाड तालुक्यातील नामवंत सहकार क्षेत्रातील नेते रमेशचंद्र घुगे यांनी आज त्यांच्या शेकडो कार्यकर्त्यांसह भारतीय जनता पार्टीत प्रवेश केला. भाजपा प्रदेशाध्यक्ष आणि महसूल मंत्री चंद्रशेखर बावनकुळे यांच्या प्रमुख उपस्थितीत हा पक्षप्रवेश सोहळा पार पडला.

कार्यक्रमाला प्रदेश सरचिटणीस ॲड. माधवी नाईक, आमदार विक्रांत पाटील, प्रदेश सरचिटणीस विजय चौधरी, माध्यम विभाग प्रमुख नवनाथ बन यांच्यासह पक्षाचे अनेक पदाधिकारी उपस्थित होते.

या प्रसंगी भाजपा प्रदेशाध्यक्ष बावनकुळे यांनी घुगे यांच्यासह सर्व नवागतांचे पक्षात स्वागत केले. त्यांनी सांगितले की, "भाजपाची ध्येयधोरणे ही जनसामान्यांच्या कल्याणासाठी आहेत. पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या कणखर नेतृत्वाखाली विकसित भारत आणि विकसित महाराष्ट्र घडविण्याचा आमचा संकल्प आहे. घुगे यांच्यासारख्या अनुभवी सहकार क्षेत्रातील नेत्याच्या आगमनाने भाजपाला निश्चितच बळकटी मिळणार आहे."

बावनकुळे यांनी नवागतांना पक्षात योग्य तो सन्मान राखला जाईल अशी ग्वाही दिली.

रमेशचंद्र घुगे यांनी सहकार क्षेत्रात केलेल्या कामगिरीची दखल घेत बावनकुळे म्हणाले, "भाग्यश्री सहकारी पतसंस्था, ज्ञानदीप बहुउद्देशीय विकास सेवा संस्था, शेतीमाल खरेदी विक्री व प्रक्रीया सहकारी संस्था, नाशिक जिल्हा कांदा बटाटा उत्पादक संघ, नाशिक खादी व ग्रामोद्योग उत्पादक संघ तसेच नाशिक जिल्हा सहकारी पतसंस्थेचे संचालक अशा विविध संस्थांच्या माध्यमातून सहकार चळवळ बळकट करणारे घुगे यांचे योगदान महत्त्वपूर्ण आहे."

आपल्या भाषणात रमेशचंद्र घुगे यांनी कोणत्याही पदाची अपेक्षा न ठेवता केवळ जनतेच्या हितासाठी भाजपामध्ये प्रवेश करत असल्याचे स्पष्ट केले. त्यांच्यासोबत पक्षात प्रवेश केलेल्यांमध्ये खंडेराव चव्हाण, रामदास सानप, विठ्ठलराव गचाले, सुरेश कातकाडे, विजय कातकाडे यांच्यासह अनेक कार्यकर्त्यांचा समावेश होता.