आषाढी वारी यशस्वी करा; सर्व विभागांनी समन्वयाने काम करा - मुख्यमंत्री देवेंद्र फडणवीस

मुंबई, दि. २८ (प्रतिनिधी): पंढरपूरची ‘आषाढी वारी’ ही महाराष्ट्राची वैभवशाली परंपरा आहे. यावर्षी पावसाचे आगमन लवकर झाले असल्याने, सर्व मानाच्या पालख्या आणि वारकऱ्यांसाठी पाणी, आरोग्य सुविधा, फिरती शौचालये आणि पोलीस बंदोबस्ताचे योग्य नियोजन करणे आवश्यक आहे. वारी यशस्वी करण्यासाठी सर्व विभागांनी समन्वयाने प्रयत्न करावेत, असे निर्देश मुख्यमंत्री देवेंद्र फडणवीस यांनी दिले.

सह्याद्री अतिथीगृह येथे आषाढी एकादशी वारीच्या पूर्वतयारी आढावा बैठकीत मुख्यमंत्री बोलत होते. या बैठकीला उपमुख्यमंत्री एकनाथ शिंदे, ग्रामविकास मंत्री जयकुमार गोरे, आरोग्यमंत्री प्रकाश आबिटकर, नगरविकास राज्यमंत्री माधुरी मिसाळ, आमदार अभिजित पाटील, मुख्य सचिव सुजाता सौनिक, विठ्ठल रुक्मिणी मंदिर समितीचे सहअध्यक्ष गहिनीनाथ महाराज औसेकर आणि आध्यात्मिक आघाडीचे तुषार भोसले यांच्यासह विविध विभागांचे वरिष्ठ अधिकारी आणि मानाच्या १० दिंड्यांचे प्रतिनिधी उपस्थित होते.

पुण्याच्या प्रभारी विभागीय आयुक्त कविता द्विवेदी यांनी वारीच्या तयारीची माहिती दिली. त्यानंतर दिंडी प्रतिनिधी आणि विश्वस्तांनी सूचना व अडचणी मांडल्या. पुणे शहरात स्वागत मंडपांवर आणि लाऊडस्पीकरवर बंदी, पालख्यांसाठी जादा पोलीस बंदोबस्त, अरुंद रस्त्यांचे रुंदीकरण, वाखरी मॉडेल वारकरी तळ, ॲम्ब्युलन्स, दर्शन पासची संख्या, वॉटरप्रूफ तंबू, पाणी टँकर, औषध साठा, पालखी मार्गाचा विकास आणि फिरती शौचालये यांसारख्या विषयांवर चर्चा झाली.

मुख्यमंत्री फडणवीस यांनी सांगितले की, वारीचे योग्य नियोजन करण्यासाठी शासन सर्वतोपरी प्रयत्नशील आहे. पुणे आणि पिंपरी चिंचवड आयुक्तांनी पालख्यांच्या स्वागतासाठी वेगळी व्यवस्था करावी. रस्त्याच्या बाजूला मंडप टाकून स्वागत करावे, पण पालख्यांना विलंब होऊ नये, याची काळजी घ्यावी. वारीच्या यशस्वी नियोजनासाठी आपत्ती व्यवस्थापनाने दक्ष राहावे.

राज्यातील विविध भागांतून येणाऱ्या पालख्यांसाठी नाशिक, छत्रपती संभाजीनगर आणि अमरावती विभागीय आयुक्तांनी समन्वय साधून उपाययोजना कराव्यात. स्थानिक प्रशासनाने रस्ते, पाणी, वीज, पोलीस बंदोबस्त आणि आरोग्य सुविधा पुरवण्यासाठी तातडीने बैठका घेऊन नियोजन करावे, असे निर्देश मुख्यमंत्र्यांनी दिले. पोलीस महासंचालकांनी पोलीस अधिकाऱ्यांशी समन्वय साधून पालख्यांच्या बंदोबस्ताची, वाहतुकीची आणि अपघातांची काळजी घ्यावी.

वाखरी येथे सर्व संतांच्या मानाच्या पालख्या एकत्र येतात. येथे प्रचंड गर्दी लक्षात घेऊन सोलापूर जिल्हा प्रशासनाने योग्य नियोजन करावे. नामदेव महाराज यांच्या ओट्याचा पुनर्विकास करावा आणि वाखरीचे विशिष्ट मॉडेल वारकरी तळ तयार करण्यासाठी आराखडा तयार करावा, असेही मुख्यमंत्र्यांनी सांगितले.

पंढरपूर दिंडीत सहभागी होणाऱ्या वारकऱ्यांसाठी मागील वर्षी सुरू केलेली ‘विठ्ठल रखुमाई वारकरी विमा छत्र योजना’ यावर्षीही सुरू राहणार आहे. मानाच्या पालखीतील वारकऱ्यांना दर्शन पास योग्य प्रमाणात वाढवून दिले जातील. ‘निर्मल वारी, हरित वारी’ उपक्रमासाठी प्रशासनाने प्रयत्न करावेत आणि रस्त्याच्या दुतर्फा देशी झाडे लावण्यासाठी आराखडा तयार करावा, असे निर्देशही त्यांनी दिले.

पावसाचा अंदाज लक्षात घेऊन वारकऱ्यांच्या निवाऱ्यासाठी ३६ वॉटरप्रूफ तंबूंची तयारी करण्यात आली आहे. आवश्यकतेनुसार आणखी तंबू वाढवले जातील. महिलांसाठी हिरकणी कक्ष आणि स्वतंत्र स्नानगृहांची सोय उपलब्ध करून दिली जाईल, असेही मुख्यमंत्र्यांनी सांगितले.

उपमुख्यमंत्री एकनाथ शिंदे यांनी सांगितले की, पावसामुळे वारकऱ्यांची गैरसोय होऊ नये, यासाठी शासन काळजी घेत आहे. शुद्ध पाणी, वीज, वॉटरप्रूफ तंबू, आरोग्य सुविधा, फिरती शौचालये आणि ॲम्ब्युलन्सची व्यवस्था केली जाईल. महिलांच्या आरोग्याची विशेष काळजी घेतली जाईल. वारकऱ्यांसाठी अधिक बस आणि रेल्वे उपलब्ध करून देण्यासाठी शासन प्रयत्नशील आहे.

विठ्ठल रुक्मिणी मंदिरे समितीचे सहअध्यक्ष गहिनीनाथ औसेकर यांनी सोयीसुविधांची माहिती दिली. योगी निरंजननाथ, चैतन्य कबीर महाराज, जालिंदर मोरे, सोमनाथ घाटेकर, अक्षय महाराज भोसले आणि श्री. साधू यांनी सूचना मांडल्या.

--------------------------------------------------------------------------------------------------------------------