रिंगरोडनंतर बुलेट ट्रेन मार्गातही बदल; भंडारा डोंगरासाठी दुहेरी दिलासा

 

पिंपरी: मुंबई-पुणे-हैदराबाद बुलेट ट्रेन प्रकल्पाचा मार्ग श्री क्षेत्र भंडारा डोंगराला भेदून जाणार नाही, असे आश्वासन रेल्वेमंत्री अश्विनी वैष्णव यांनी दिले आहे, अशी माहिती मावळचे खासदार श्रीरंग बारणे यांनी दिली.

या प्रकल्पासाठी केलेल्या सर्वेक्षणात हा मार्ग भंडारा डोंगराला बोगदा खणून प्रस्तावित करण्यात आला होता. यावर वारकरी संप्रदायाने तीव्र चिंता व्यक्त केली होती, कारण भंडारा डोंगर हे वारकरी संप्रदायाचे एक महत्त्वाचे श्रद्धास्थान आहे आणि त्यांच्या भावना या डोंगराशी जोडलेल्या आहेत.

खासदार श्रीरंग बारणे यांनी भंडारा डोंगर मंदिर ट्रस्टचे अध्यक्ष बाळासाहेब काशीद यांच्यासह रेल्वेमंत्री अश्विनी वैष्णव यांची दिल्लीत भेट घेतली. त्यांनी प्रस्तावित मार्ग बदलण्याची विनंती केली, जी रेल्वेमंत्र्यांनी मान्य केली.

खासदार बारणे म्हणाले, "प्रस्तावित मार्ग संत तुकाराम महाराजांची कर्मभूमी असलेल्या भंडारा डोंगरातून जाणार होता. हे स्थान महाराष्ट्र आणि देशभरातील वारकरी संप्रदायासाठी अत्यंत पवित्र आहे. येथे दररोज हजारो भाविक दर्शनासाठी येतात. १५० कोटी रुपये खर्चून भंडारा डोंगरावर नागरशैलीत आणि अयोध्येतील प्रभू श्रीराम मंदिराच्या धर्तीवर जगद्गुरु श्री संत तुकाराम महाराजांचे भव्य मंदिर उभारले जात आहे. बोगद्यामुळे या पवित्र स्थळाच्या धार्मिक शांतता आणि स्थिरतेवर विपरीत परिणाम होण्याची शक्यता होती, अशी चिंता भाविक, वारकरी संप्रदाय आणि ट्रस्टने व्यक्त केली होती. त्यामुळे, हा मार्ग किमान दोन किलोमीटर उत्तरेकडे वळवण्याची मागणी आम्ही केली."

या मागणीला सकारात्मक प्रतिसाद देत रेल्वेमंत्री वैष्णव यांनी सांगितले की, भंडारा डोंगर हे वारकरी संप्रदायाचे श्रद्धास्थान असल्याने बुलेट ट्रेनचा मार्ग डोंगराला बोगदा न खणता वळवला जाईल.

रिंगरोड मार्गातही बारणेंच्या पाठपुराव्यामुळे बदल

महाराष्ट्र राज्य रस्ते विकास महामंडळाच्या (एमएसआरडीसी) वतीने पुणे जिल्ह्यात प्रस्तावित असलेला ११० मीटर रुंद रिंगरोडही मावळ तालुक्यातील भंडारा डोंगराला भेदून जाणार होता, ज्याला खासदार बारणे आणि वारकऱ्यांनी विरोध केला होता. खासदार बारणे यांनी तत्कालीन मुख्यमंत्री आणि आताचे उपमुख्यमंत्री एकनाथ शिंदे यांच्याकडे पाठपुरावा केला, त्यानंतर शिंदे यांनी एमएसआरडीसीला रिंगरोडच्या रेखांकनात बदल करण्याचे आदेश दिले, ज्यामुळे हा मार्ग डोंगराला न भेदता किंवा बोगदा न खणता बनणार आहे.

------------------------------------------------------------------------------------------------

#BulletTrain #BhandaraDongar #Maharashtra #IndianRailways #ShrirangBarne #ReligiousSite #Pune #Pimpri