पुणे शहरात बदलत्या हवामानामुळे साथीच्या आजारांचा धोका; आरोग्य विभागाकडून मार्गदर्शक सूचना जारी
पुणे, दि. २० मे २०२५: पुणे शहरात सध्या बदलत्या हवामानामुळे डेंग्यू, चिकुनगुनिया, मलेरिया यांसारख्या डासांमुळे पसरणाऱ्या आजारांचा तसेच सर्दी, खोकला यांसारख्या श्वसनासंबंधी आजारांचा प्रादुर्भाव वाढण्याची शक्यता आहे. या पार्श्वभूमीवर पुणे महानगरपालिकेच्या आरोग्य विभागाने नागरिकांसाठी प्रतिबंधक उपाययोजना आणि उपचारांसंबंधी मार्गदर्शक सूचना जारी केल्या आहेत.
आरोग्य विभागाने दिलेल्या माहितीनुसार, नागरिकांनी ताप आणि थंडी वाजून येणे, अंगदुखी, डोकेदुखी यांसारखी लक्षणे आढळल्यास त्वरित आपल्या परिसरातील आरोग्य अधिकारी किंवा आरोग्य कर्मचाऱ्यांशी संपर्क साधावा. तसेच, दोन दिवसांपेक्षा जास्त काळ ताप येत असल्यास तातडीने डॉक्टरांचा सल्ला घ्यावा.
सर्दी आणि खोकला टाळण्यासाठी उपाय:
आरोग्य विभागाने सर्दी आणि खोकला यांसारख्या श्वसनासंबंधी आजारांपासून बचाव करण्यासाठी नागरिकांना काही महत्त्वाचे उपाय सांगितले आहेत:
- सर्दी किंवा खोकला झाल्यास शक्यतोवर ट्रिपल लेअर मेडिकल मास्कचा वापर करावा.
- शिंकताना व खोकताना तोंडासमोर रुमाल धरावा.
- साबण आणि पाण्याचा वापर करून वारंवार हात धुवावेत किंवा सॅनिटायझरचा वापर करावा.
- हात न धुता डोळे, नाक आणि तोंडाला स्पर्श करणे टाळावे.
- आजारी लोकांशी संपर्क टाळावा.
उपचार:
ताप, डोकेदुखी, अंगदुखी यांसारख्या आजारांवर त्वरित उपचार घेणे आवश्यक आहे. सर्व महानगरपालिका दवाखाने आणि नागरी आरोग्य केंद्रांमध्ये या आजारांवर औषधोपचार तसेच आवश्यक तपासण्या उपलब्ध आहेत. नागरिकांनी खासगी वैद्यकीय व्यावसायिकांकडून उपचार घेतल्यानंतरही टायफॉइड, कावीळ, उलट्या-जुलाब, डेंग्यू, चिकुनगुनिया, मलेरिया, सर्दी, खोकला आणि H1N1 यांसारख्या सांसर्गिक रोगांची लक्षणे आढळल्यास तात्काळ आपल्या परिसरातील आरोग्य विभागाला किंवा आरोग्य कर्मचाऱ्याला कळवावे, असे आवाहन आरोग्य विभागाने केले आहे.
बदलत्या हवामानात नागरिकांनी आपल्या आरोग्याची काळजी घ्यावी, असे आवाहन पुणे महानगरपालिकेच्या आरोग्य विभागाने केले आहे.
----------------------------------------------------------------------------------------------
#Pune #HealthAlert #SeasonalDiseases #Dengue #Malaria #Chikungunya #PublicHealth #PMC #IndiaFightsDisease
Reviewed by ANN news network
on
५/२०/२०२५ ०५:३३:०० PM
Rating:
कोणत्याही टिप्पण्‍या नाहीत: