आशियातील देशांमध्ये रुग्णवाढ चिंताजनक

नवी दिल्ली: जगभरामध्ये पुन्हा एकदा कोरोना विषाणूच्या पुनरागमनाची चिंता व्यक्त केली जात आहे. आशिया खंडातील अनेक देशांमध्ये कोरोना रुग्णांच्या संख्येत वाढ झाल्याने सतर्कतेचे संकेत मिळत आहेत. चीनमधील नवी कोरोना लाट, तसेच हाँगकाँग आणि सिंगापूरमधील वाढती रुग्णसंख्या आरोग्य तज्ज्ञांच्या चिंतेचे कारण बनली आहे.

विशेष म्हणजे, उन्हाळ्याच्या काळात सिंगापूर आणि हाँगकाँगमध्ये कोरोना रुग्णसंख्येतील वाढ तज्ज्ञांना आश्चर्यचकित करणारी आहे. सहसा पावसाळ्यात विषाणूजन्य आजारांचा प्रादुर्भाव वाढतो, परंतु या वर्षी उन्हाळ्यात रुग्णसंख्या वाढल्याने नवीन चिंता निर्माण झाली आहे.

हाँगकाँग-सिंगापूरमध्ये गंभीर परिस्थिती

हाँगकाँगमध्ये मार्च महिन्यात कोरोना रुग्णांचे प्रमाण फक्त १% होते, परंतु मे महिन्यापर्यंत हा आकडा ११.४% पर्यंत पोहोचला आहे. चालू वर्षात हाँगकाँगमध्ये कोरोनामुळे ३० जणांचा मृत्यू झाला असून, सध्या ८१ रुग्णांची प्रकृती गंभीर आहे. रुग्णांमध्ये ६५ वर्षांवरील नागरिकांचे प्रमाण ८३% असून, त्यांपैकी ९०% रुग्ण इतर गंभीर आजारांनीही ग्रस्त आहेत.

सिंगापूरमधील परिस्थितीही तेवढीच चिंताजनक आहे. सध्या सिंगापूरमध्ये १४,२०० कोरोना रुग्ण असून, रुग्णालयात दाखल होणाऱ्यांच्या संख्येत ३०% वाढ नोंदवली गेली आहे. मे महिन्यात रुग्णसंख्या दुप्पट झाली असून, दररोज सरासरी ३० नवीन रुग्ण रुग्णालयात दाखल होत आहेत. सिंगापूरमध्ये कोरोना चाचण्यांचेही प्रमाण वाढले आहे.

हा नवीन कोरोना विषाणू सांडपाण्यातून उद्भवल्याचे सांगितले जात आहे. मात्र, हा नेमका कोणता व्हेरियंट आहे, त्याचा संसर्ग किती वेगाने होतो आणि त्याचा घातकपणा किती आहे, याबाबत अभ्यास सुरू आहे. सिंगापूरच्या आरोग्य विभागाच्या माहितीनुसार, नवीन व्हेरियंट अधिक घातक असल्याचे पुरावे आतापर्यंत मिळालेले नाहीत, परंतु त्यामुळे दैनंदिन जीवनावर आणि आरोग्य यंत्रणेवर ताण येण्याची शक्यता नाकारता येत नाही.

भारतातील स्थिती आणि तयारी

भारतात कोरोनाच्या पहिल्या आणि दुसऱ्या लाटेचा मोठा फटका बसला होता. आतापर्यंत देशात ४ कोटी ५० लाख ४१ हजार ७४८ कोरोना रुग्ण आढळले असून, ५ लाख ३ हजार ६२३ नागरिकांचा मृत्यू झाला आहे. मात्र, सध्या भारतात कोरोनाची स्थिती नियंत्रणात आहे. आरोग्य विभागाच्या माहितीनुसार, सध्या देशात फक्त ९० च्या आसपास कोरोना रुग्ण आहेत. त्यामुळे सद्यस्थितीत भारतात कोरोनाबाबत चिंता करण्याचे कारण नाही, असे तज्ज्ञांचे मत आहे. भविष्यात कोरोनाची लाट आली तरी ती मागील लाटांइतकी गंभीर नसेल, असा अंदाज व्यक्त केला जात आहे.

भारताचा आरोग्य विभाग हाँगकाँग आणि सिंगापूरमधील परिस्थितीवर बारकाईने लक्ष ठेवून आहे.

कोरोना पुनरागमनात घ्यावयाची खबरदारी

कोरोनाची परिस्थिती पुन्हा बिघडल्यास, काही महत्त्वाच्या खबरदारी घेणे गरजेचे आहे:

कोरोना लसीचे दोन्ही डोस पूर्ण केले आहेत का, याची खातरजमा करा.
इतर आजार (कोमॉर्बिड) असल्यास, डॉक्टरांच्या सल्ल्यानुसार बूस्टर डोस घ्या.
सर्दी, खोकला, ताप किंवा दम लागणे यासारखी लक्षणे दिसल्यास तत्काळ वैद्यकीय सल्ला घ्या.
नियमितपणे हात धुवा, योग्य सामाजिक अंतर राखा आणि मास्कचा वापर करा.
गर्दीच्या ठिकाणी जाणे टाळा.
मधुमेह, हृदयविकार आणि उच्च रक्तदाबाच्या रुग्णांनी विशेष काळजी घ्यावी.

इंडियन मेडिकल असोसिएशनचे अध्यक्ष डॉ. सुनील इंगळे यांनी सांगितले की, विषाणूचा प्रादुर्भाव झाल्यानंतर काही कालावधीनंतर त्याचा पुन्हा उद्रेक होण्याची शक्यता नाकारता येत नाही. मात्र, नवीन व्हेरियंटबद्दल अधिक माहिती लवकरच उपलब्ध होईल. भारताने मागील दोन लाटांमधून धडा घेऊन बरीच तयारी केली आहे, त्यामुळे मोठे नुकसान होण्याची शक्यता कमी आहे. नागरिकांनी त्रिसूत्रीचे पालन करणे आणि आजार अंगावर न काढणे गरजेचे आहे.

कोरोनाने आपल्याला अनेक नवीन शब्द शिकवले आणि 'प्रिव्हेंशन इज ऑलवेज बेटर दॅन क्युअर' हे महत्त्वाचे सूत्र दिले. त्यामुळे सतर्क राहा आणि स्वतःची काळजी घ्या.