पाकिस्तानच्या दहशतवादाविरुद्ध भारताचे शिष्टमंडळ युनोमध्ये जाणार

 

 भारताची सर्वपक्षीय एकजूट

३० वर्षांनंतर पुन्हा इतिहासाची पुनरावृत्ती; ऑपरेशन सिंदूरनंतर कूटनीतिक पावले

भारत सरकारने पाकिस्तानच्या दहशतवादी कारवायांचा पर्दाफाश करण्यासाठी संयुक्त राष्ट्रात एक सर्वपक्षीय शिष्टमंडळ पाठवण्याचा निर्णय घेतला आहे. राष्ट्रीय सुरक्षेच्या प्रश्नी सत्ताधारी आणि विरोधी पक्षांमध्ये एकी दिसून येत आहे. काँग्रेस नेते डॉ. शशी थरूर यांच्यासह विविध पक्षांच्या अनेक अनुभवी नेत्यांचा या शिष्टमंडळात समावेश करण्यात आला आहे.

हे पाऊल १९९४ मधील नरसिंह राव यांच्या काळातील निर्णयाची आठवण करून देते, जेव्हा त्यांनी विरोधी पक्षनेते अटल बिहारी वाजपेयी यांना संयुक्त राष्ट्रात भारताची बाजू मांडण्यासाठी पाठवले होते. वाजपेयींनी यशस्वीरीत्या भारताची बाजू मांडून पाकिस्तानच्या खोट्या प्रचाराचा पर्दाफाश केला होता.

आता,  दहशतवादी हल्ल्यानंतर भारताने 'ऑपरेशन सिंदूर'च्या माध्यमातून दिलेल्या प्रतिसादानंतर, पाकिस्तानने आंतरराष्ट्रीय समुदायात भारताविरोधात प्रचार सुरू केला आहे. या पार्श्वभूमीवर भारत सरकारने कूटनीतिक मोर्चावर प्रभावी पावले उचलण्याचा निर्णय घेतला आहे.

या शिष्टमंडळात डॉ. शशी थरूर (काँग्रेस), कनिमोळी करुणानिधी (द्रमुक), सुप्रिया सुळे (राष्ट्रवादी काँग्रेस), रवीशंकर प्रसाद (भाजप), विजयंत पांडा (भाजप), संजय कुमार झा (जेडीयू) आणि श्रीकांत शिंदे (शिवसेना) यांच्यासह अन्य अनुभवी खासदारांचाही समावेश आहे. निशिकांत दुबे, बांसुरी स्वराज, अनुराग ठाकूर, एम. जे. अकबर यांसारखे अनेक अनुभवी नेतेही या शिष्टमंडळाचा भाग असतील.

डॉ. थरूर हे संयुक्त राष्ट्रात दीर्घकाळ कार्यरत राहिलेले असून जागतिक राजकारणाची त्यांना चांगली जाण आहे. पंतप्रधान नरेंद्र मोदी यांनी डॉ. थरूर यांच्या क्षमतेवर विश्वास दर्शवला आहे. हे शिष्टमंडळ संयुक्त राष्ट्र सुरक्षा परिषदेच्या सदस्यांना आणि मित्र राष्ट्रांना भारताच्या दहशतवादाविरोधातील 'झिरो टॉलरन्स' धोरणाची माहिती देणार आहे.

'ऑपरेशन सिंदूर' केवळ लष्करी कारवाई नसून पाकिस्तानवर राजकीय व आर्थिक दबाव आणण्याचे भारताचे व्यापक धोरण आहे. 'जी २०' परिषदेनंतर भारताने उचललेले हे एक महत्त्वाचे कूटनीतिक पाऊल मानले जात आहे. राष्ट्रीय सुरक्षेच्या विषयावर सर्व पक्षांची एकजूट आणि सामंजस्य ही भारतीय लोकशाहीची ताकद पुन्हा एकदा दिसून येत आहे.

-----------------------------------------------

#IndoPakRelations #OperationSindoor #UnitedNations #IndianDiplomacy #CrossPartyUnity #TerrorismResponse #ShashiThuroor #IndianForeignPolicy