रत्नागिरीतील अवैध होर्डिंग्स हटवण्याचे आदेश

रत्नागिरी, २३ मे - रत्नागिरी जिल्ह्याचे पालकमंत्री डॉ. उदय सामंत यांनी जिल्ह्यातील अनधिकृत आणि अनावश्यक होर्डिंग्स काढून टाकण्याचे निर्देश संबंधित अधिकाऱ्यांना दिले आहेत. पर्यटन वाढीसाठी आणि शहराचे सुशोभीकरण करण्याच्या उद्देशाने हा महत्त्वाचा निर्णय घेण्यात आला आहे.

डॉ. सामंत यांच्या पालकमंत्रिपदाची नियुक्ती झाल्यापासून रत्नागिरी जिल्ह्यात विकासकामांची गंगा वाहू लागली आहे. त्यांच्याकडे उद्योग खाते असल्यामुळे जिल्ह्यामध्ये कोट्यवधी रुपयांची गुंतवणूक येत असून अपेक्षेपेक्षा जास्त उद्योग स्थापन होत आहेत.

येत्या उद्योगांच्या पार्श्वभूमीवर जिल्ह्यामध्ये मोठ्या संख्येने पर्यटक येण्याची अपेक्षा आहे. यासाठी डॉ. सामंत यांनी अनेक पर्यटन स्थळांचा विकास केला आहे आणि काही विकसित होत आहेत.

पर्यटन वाढीसाठी त्रासदायक ठरणाऱ्या अनधिकृत होर्डिंग्सच्या मुद्द्यावर आता डॉ. सामंत "अॅक्शन मोड" मध्ये दिसत आहेत. शहराचे विद्रूपीकरण करणाऱ्या या होर्डिंग्स केवळ शहराचे सौंदर्य बिघडवत नाहीत तर पर्यटक आणि नागरिकांना त्रासदायक ठरतात. तसेच या होर्डिंग्समुळे मोठ्या अपघातांचा धोका निर्माण होतो.

भविष्यातील रत्नागिरी जिल्ह्याचे व्हिजन डोळ्यासमोर ठेवून डॉ. सामंत यांनी रत्नागिरी शहरासह संपूर्ण जिल्ह्यातील अनधिकृत आणि अनावश्यक होर्डिंग्स काढून टाकण्याच्या सूचना अधिकाऱ्यांना दिल्या आहेत.