मुंबई : माहिम वाहतूक विभागात सेनापती बापट रोड ते वृंदावन सोसायटी पर्यंत नो पार्किंग झोन

एसआरए इमारतीमुळे अवजड वाहनांच्या वाहतुकीसाठी मार्ग मोकळा

मुंबई : मुंबईतील माहिम वाहतूक विभाग हद्दीत झोपडपट्टी पुनर्वसन प्राधिकरण (एसआरए) च्या बांधकाम कामामुळे पार्किंग निर्बंध लागू करण्यात आले आहेत. समाधान पवार, पोलीस उप आयुक्त, मुख्यालय व मध्य विभाग, वाहतूक, मुंबई यांनी या संदर्भात महत्त्वाचा आदेश काढला आहे.

सेनापती बापट रोड ते वृंदावन सोसायटी दरम्यानच्या रस्त्यावर चालू असलेल्या एसआरए कामामुळे अवजड वाहनांच्या वाहतुकीत अडथळे निर्माण होत आहेत. इमारतीच्या समोरील वृंदावन सोसायटीकडे जाणाऱ्या मार्गावर होणाऱ्या दुचाकी आणि चारचाकी वाहनांच्या पार्किंगमुळे एसआरए बिल्डिंगच्या कामासाठी येणाऱ्या क्रेन, मिक्सर, डंपर, ट्रॅकर, ट्रक व इतर अवजड वाहनांना येजा करण्यात अडचणी येत आहेत.

या समस्येचे निराकरण करण्यासाठी वाहतूक पोलिसांनी मोटार वाहन अधिनियम १९८८ चे कलम ११५ व संबंधित शासकीय अधिसूचनांच्या अधिकाराचा वापर करून पार्किंग निर्बंध लादले आहेत. या आदेशानुसार दिनांक २५ मे २०२५ रोजी सकाळी ००:०१ वाजेपासून दिनांक २४ मे २०२७ रोजी रात्री २४:०० वाजेपर्यंत हे निर्बंध तात्पुरत्या स्वरूपात अंमलात राहतील.

नो पार्किंग निर्बंधानुसार सेनापती बापट मार्ग ते वृंदावन सोसायटी पर्यंतच्या आतील रस्त्यावर एका बाजूस, विशेषतः इमारतीचे काम चालू असलेल्या समोरील बाजूस सर्व प्रकारच्या वाहनांना वाहन पार्किंग करण्यास प्रतिबंध करण्यात आला आहे.

जनतेस पोहोचणारा धोका, अडथळा तसेच गैरसोय टाळण्यासाठी हा निर्णय घेण्यात आला असल्याचे पोलीस उप आयुक्त समाधान पवार यांनी स्पष्ट केले आहे. या आदेशाचे उल्लंघन करणाऱ्यांवर मोटार वाहन अधिनियमानुसार कारवाई करण्यात येईल.

वाहतूक पोलिसांनी नागरिकांना सूचित केले आहे की, या कालावधीत त्यांनी वैकल्पिक पार्किंग व्यवस्थेचा वापर करावा आणि एसआरए कामामध्ये येणाऱ्या अवजड वाहनांच्या वाहतुकीस सहकार्य करावे. अधिक माहितीसाठी नागरिक वाहतूक पोलीस मुख्यालय, ८७, सर पोचखानवाला मार्ग, वरळी, मुंबई - ४०० ०३० येथे संपर्क साधू शकतात किंवा ०२२-२४९४६२२३, विस्तारांक ११३ या दूरध्वनी क्रमांकावर संपर्क साधू शकतात. तसेच dcphq.traffic@mahapolice.gov.in या ई-मेल पत्त्यावरही संपर्क साधता येईल.

हा आदेश दिनांक २३ मे २०२५ रोजी समाधान पवार, पोलीस उप आयुक्त, मुख्यालय व मध्य विभाग, वाहतूक, मुंबई यांच्या सही व शिक्यानिशीसह काढण्यात आला आहे.