मुंबई : छत्रपती शिवाजी महाराज आंतरराष्ट्रीय विमानतळ आणि जुहू एरोड्रोमच्या आसपासच्या परिसरात पतंग उडवणे, फुगे सोडणे, उंच उडणारे फटाके फोडणे आणि लेझर लाईट बीम चमकवणे यावर बृहन्मुंबई पोलिसांनी बंदी घातली आहे. हे आदेश ३१ मे २०२५ पासून २९ जुलै २०२५ पर्यंत लागू राहतील.
विमानतळाच्या जवळपास असुरक्षित उड्डाण क्षेत्र तयार होऊ नये आणि विमानांच्या सुरक्षित अवगमनात कोणताही अडथळा येऊ नये यासाठी हे पाऊल उचलण्यात आले आहे. अनेकवेळा विमानांच्या लँडिंग आणि टेक-ऑफच्या वेळी लेझर लाईटमुळे धोका निर्माण होतो, तसेच पतंग आणि फुग्यांमुळेही विमानांच्या मार्गात अडथळे येतात.
पोलीस उपायुक्त (अभियान) संग्रामसिंह निशाणदार यांनी भारतीय नागरिक सुरक्षा संहिता, २०२३ च्या कलम १६३ आणि महाराष्ट्र पोलीस अधिनियम, १९५१ च्या कलम १० (२) अन्वये हे आदेश जारी केले आहेत. या आदेशाचे उल्लंघन करणाऱ्या कोणत्याही व्यक्तीवर भारतीय न्याय संहिता, २०२३ च्या कलम २२३ अंतर्गत कारवाई केली जाईल.
जर कोणालाही अशा प्रकारची कृती करताना आढळल्यास, त्यांनी तात्काळ जवळच्या पोलीस स्टेशनला माहिती द्यावी, असे आवाहन पोलिसांनी केले आहे.
---------------------------------------------------------------------------------------------------------
: #Mumbai #AirportSecurity #FlyingBan #SafetyFirst #MaharashtraPolice #AviationSafety
Reviewed by ANN news network
on
५/३१/२०२५ ०५:३०:०० PM
Rating:
कोणत्याही टिप्पण्‍या नाहीत: