उरणकरांना मैदानाचा हक्क मिळवून देण्यासाठी द्रोणागिरी स्पोर्टसचे आंदोलन

 

द्रोणागिरी स्पोर्टसचे महादेव घरत प्रकल्पग्रस्तांच्या प्रश्नांसाठी आक्रमक

उरण: द्रोणागिरी स्पोर्टस उरणचे अध्यक्ष महादेव घरत यांनी उरणमधील प्रकल्पग्रस्तांच्या मूलभूत प्रश्नांना वाचा फोडली आहे. उरणकरांना क्रीडांगण मिळावे यासाठी त्यांनी आक्रमक आंदोलन छेडले असून, या लढ्यात कवींच्या कवितांच्या माध्यमातून त्यांनी जोरदार आवाज उठवला आहे.

या आंदोलनाच्या भूमिकेचे कौतुक करताना, नवी मुंबईतील प्रसिद्ध कामगार नेते ॲड. सुरेश ठाकूर यांनी भेंडखळ येथे झालेल्या जाहीर सभेत आपले विचार व्यक्त केले. ते म्हणाले, "महादेव घरत यांनी उरणकरांच्या महत्त्वाच्या प्रश्नांना योग्य प्रकारे हात घातला आहे आणि निश्चितच त्यांना न्याय मिळेल."

"उरणकरांना मैदान द्या" या मागणीसाठी द्रोणागिरी स्पोर्टसने सुरू केलेल्या आंदोलनाला तालुक्यातून चांगला प्रतिसाद मिळत असल्याचे स्पष्टीकरण महादेव घरत यांनी आपल्या भाषणात दिले.

या आंदोलनात आयोजित करण्यात आलेल्या कवितांच्या कार्यक्रमात रायगडभूषण प्रा. एल. बी. पाटील यांनी "सिडकोला उलटा टांगणार" या कवितेतून आंदोलनाची धार अधिक तीव्र केली. त्यांनी आगरी बोलीत पसायदान सादर केले. अनिल भोईर, भरत पाटील, अक्षता गोसावी, प्रा. चंद्रकांत मढवी, न.ग. पाटील यांसारख्या अनेक कवींनी आपल्या रचनांनी उपस्थितांना मंत्रमुग्ध केले. प्रांजळ भोईर यांनी कार्यक्रमाचे सुंदर सूत्रसंचालन केले, तर मच्छिंद्र घरत यांनी प्रास्ताविक आणि किरण घरत यांनी स्वागत केले. भेंडखळ ग्रामपंचायतीच्या सदस्या संगीता भगत यांनी ग्रामपंचायतीचा आंदोलनाला पाठिंबा जाहीर केला.

यावेळी विजय ठाकूर, लखूशेठ ठाकूर, यशवंत ठाकूर, प्रकाश घरत, गणेश घरत, भालचंद्र भगत, नासिकेत म्हात्रे, पांडुरंग पाटील, गणेश घरत, दीपक ठाकूर, रेखा घरत, मेघश्याम भगत, अशोक ठाकूर यांसारखे प्रमुख ग्रामस्थ उपस्थित होते. कार्यक्रमादरम्यान, परीक्षेत विशेष यश मिळवलेल्या दिव्या भगत आणि रिवा घरत या विद्यार्थिनींचा मान्यवरांच्या हस्ते सत्कार करण्यात आला.

----------------------------------------------

#Uran #Raigad #SportsGround #Protest #LandRights #Maharashtra #DronagiriSports