विकास आराखड्यामुळे रामनगरमधील राममंदिर धोक्यात; २५० घरे बाधित

मोहननगर-रामनगरमध्ये नवीन विकास आराखडा; नागरिकांची चिंता वाढली

पिंपरी-चिंचवड: पिंपरी-चिंचवड महानगरपालिकेच्या नवीन विकास आराखड्यामुळे मोहननगर-रामनगर परिसरातील सुमारे २५० घरे आणि ऐतिहासिक राम मंदिर बाधित होण्याची भीती वर्तवली जात आहे. रामनगरमधील मुख्य रस्ता ३६.६ मीटर रुंद करण्याच्या प्रस्तावामुळे ऐतिहासिक राममंदिराचा ७०-९० टक्के भाग धोक्यात आल्याचे या भागातील काही सामाजिक कार्यकर्त्यांचे म्हणणे आहे.

महापालिकेने १४ मे रोजी जाहीर केलेल्या या विकास आराखड्यानुसार, स्पॅको कंपनी ते परशुराम चौकादरम्यानचा रस्ता सध्याच्या १५ मीटरवरून ३६.६ मीटर रुंद करण्याचे नियोजन आहे. यामुळे दातीर पाटलांच्या चाळी, व्यावसायिक संकुले आणि झोपडपट्टीतील अनेक घरे बाधित होणार आहेत.

येथील कार्यकर्त्यांनी सांगितले की, पूर्वीच्या विकास आराखड्यात हा रस्ता एमआयडीसीच्या हद्दीतून जाणार होता, जिथे कोणतेही बांधकाम बाधित होत नव्हते. मात्र नवीन आराखड्यात हा बदल का करण्यात आला, असा प्रश्न त्यांनी उपस्थित केला आहे. त्यांनी प्रशासनाला जुन्या आराखड्यानुसार नियोजन करण्याची किंवा रुंदी ३० मीटरपर्यंत मर्यादित ठेवण्याची मागणी केली आहे.

मोहननगर परिसरातही मोठे बदल प्रस्तावित आहेत. येथे सहा विद्यमान रस्त्यांचे रुंदीकरण आणि पाच नवीन रस्त्यांची निर्मिती सुचवण्यात आली आहे. यामध्ये डॉ. बाबासाहेब आंबेडकर चौक ते रामनगर, वालिया कॉटेज ते लीलाबाई खिवसारा शाळा, अक्षय स्टोन कंपनी ते ईएसआय हॉस्पिटल अशा प्रमुख रस्त्यांचा समावेश आहे.

नागरिकांना या विकास आराखड्यावर हरकती आणि सूचना नोंदवण्यासाठी ६० दिवसांची मुदत देण्यात आली आहे. बाधित होणाऱ्या मालमत्तेच्या मालकांनी लेखी स्वरूपात सबळ कारणांसह महापालिका आयुक्तांकडे अर्ज सादर करणे आवश्यक आहे.

कार्यकर्त्यांनी राममंदिर हे महानगरपालिका स्थापनेपूर्वीचे श्रद्धास्थान असल्याचे सांगून, प्रशासनाला जागेवर येऊन वस्तुस्थिती पाहण्याचे आवाहन केले आहे. ३५-४० वर्षे जुनी घरे असलेल्या गरीब नागरिकांना विस्थापित करणे अयोग्य असल्याचे त्यांचे मत आहे.