नव्या पोपच्या निवडीसाठी व्हॅटिकनची गुप्त प्रक्रिया

व्हॅटिकन सिटी (२२ एप्रिल) –८८ वर्षांचे पोप फ्रान्सिस यांचे निधन झाल्याने संपूर्ण कॅथोलिक चर्चमध्ये शोककळा पसरली आहे. जगभरातून श्रद्धांजली वाहिल्या जात असताना, व्हॅटिकन सिटीमध्ये पोप फ्रान्सिस यांच्या निधनानंतर ९ दिवसांचा शोककाळ जाहीर करण्यात आला आहे. यानंतर, कॅथोलिक चर्चमधील एक अत्यंत पुरातन, गुप्ततेने व्यापलेली आणि जागतिक लक्ष वेधणारी प्रक्रिया सुरू होते – नव्या पोपची निवड!

गुप्तता आणि परंपरेने भरलेली प्रक्रिया

पोपच्या निधनानंतर कमीत कमी १५ दिवस आणि जास्तीत जास्त २० दिवसांच्या आत नव्या पोपच्या निवडीसाठी प्रक्रिया सुरू केली जाते. या कालावधीत संपूर्ण जगभरातून कार्डिनल्स रोममध्ये एकत्र येतात. एकदा प्रक्रिया सुरू झाली की, या कार्डिनल्सना बाह्य जगाशी कोणताही संपर्क ठेवता येत नाही.

शोक विधी आणि अंतिम संस्कार

या प्रक्रियेची सुरुवात पोपच्या अंत्यविधींनी होते. नव्या पोपची निवड होईपर्यंत ९ दिवस विशेष प्रार्थना आणि अंत्यसंस्कारांचे विधी पार पडतात. यावेळी केवळ कार्डिनल्सच नव्हे, तर विविध राष्ट्रप्रमुखही अंतिम श्रद्धांजली वाहण्यासाठी उपस्थित राहतात.

कॉन्क्लेव्ह – बंद दारांमागील निर्णयप्रक्रिया

यानंतर सुरु होते कॉन्क्लेव्ह, म्हणजेच पोप निवडण्यासाठी गुप्त बैठकांची मालिका. या बैठकी दरम्यान कार्डिनल्स सिस्टीन चॅपेलमध्ये एकत्र येतात आणि गुप्त मतदानाद्वारे नव्या पोपची निवड करतात. कोणताही उमेदवार पोप म्हणून निवडला जाण्यासाठी त्याला किमान दोनतृतीयांश बहुमत मिळणे आवश्यक असते.

धुराचे संकेत – काळा की पांढरा?

प्रत्येक मतदानानंतर मतपत्रिका जाळल्या जातात. जर कोणालाही आवश्यक बहुमत मिळाले नसेल तर सिस्टीन चॅपेलच्या धुराडीतून **काळा धुर** बाहेर येतो – याचा अर्थ अजून पोप ठरलेला नाही. पण जर कोणाला बहुमत मिळाले असेल, तर **पांढरा धुर** चॅपेलमधून बाहेर पडतो – जो संपूर्ण जगाला एक नवा आध्यात्मिक नेता मिळाल्याचा संकेत देतो.

पुढील पोपपदासाठी संभाव्य उमेदवार कोण?

नवीन पोपपदासाठी चर्चेत असलेल्या काही प्रमुख कार्डिनल्स खालीलप्रमाणे आहेत:

1. कार्डिनल जॉन मार्क अबेने – थिअलॉजिकल विचारवंत, फ्रान्सिस यांच्या धोरणांना पाठिंबा देणारे, स्थलांतर व धर्मांतर संवादावर भर देणारे.

2. कार्डिनल पीटर एर्डो – कायदेतज्ज्ञ, अनेक भाषा जाणणारे, पारंपरिक विचारसरणीचे प्रतिनिधी, परंतु व्यावहारिक दृष्टिकोन असलेले.

3. कार्डिनल मारिओ ग्रिन – सुधारणा समर्थक, आधुनिक काळाशी सुसंगत चर्च उभारण्याचा प्रयत्न करणारे.

4. कार्डिनल जुआन जोसे – सामाजिक जाणीव असलेले, दयाळूपणा व धर्मोपदेशक वृत्तीचे, फ्रान्सिस यांच्या निकटवर्तीयांपैकी एक.

5. कार्डिनल पिएत्रो परोलिन – व्हॅटिकनचे विद्यमान परराष्ट्र सचिव, अनुभवी मुत्सद्दी, स्थिर नेतृत्वासाठी प्रभावी पर्याय.

नवीन पोपपुढील आव्हाने

कोणताही कार्डिनल पोप म्हणून निवडला गेला तरी त्याच्या पुढे खूप मोठी जबाबदारी असेल. चर्च सध्या एक वळणावर उभी आहे – आधुनिकीकरण, जुन्या वादग्रस्त घटनांचे पडसाद, आणि नव्या सामाजिक-सांस्कृतिक समस्यांसह जगभरात कॅथोलिक धर्माच्या भवितव्याचे नेतृत्व करणे आवश्यक आहे.