महाराष्ट्र स्वराज पक्षाचे उमेदवार भापकर यांचा दणदणीत प्रचार

 

काळेवाडीत भापकर यांचा जनसंपर्क; मतदारांकडून उत्स्फूर्त प्रतिसाद

चिंचवड (प्रतिनिधी) - चिंचवड विधानसभा मतदारसंघातील महाशक्ती आघाडीचे अधिकृत उमेदवार मारुती साहेबराव भापकर यांनी आज काळेवाडी परिसरात मतदारांच्या घरोघरी भेटी घेतल्या. यावेळी त्यांनी आपला कार्य अहवाल आणि गॅरंटी कार्ड मतदारांसमोर मांडले.

महाराष्ट्र स्वराज पक्ष, प्रहार जनशक्ती पार्टी, स्वाभिमानी शेतकरी संघटना आणि भारतीय जवान किसान पार्टी (परिवर्तन महाशक्ती) यांच्या वतीने २०५ चिंचवड विधानसभा मतदारसंघात भापकर निवडणूक लढवत आहेत. त्यांच्या प्रचार फेरीत ब्रह्मानंद जाधव, अजित पाटील, राम करंजे, प्रवीण दोडके, विक्रम पवार, शरद थोरात आणि नाना खरात हे कार्यकर्ते सहभागी झाले होते.

भापकर यांनी मतदारांशी संवाद साधून त्यांच्या समस्या जाणून घेतल्या. त्यांनी सादर केलेल्या कार्य अहवालाला आणि गॅरंटी कार्डला मतदारांकडून उत्स्फूर्त प्रतिसाद मिळाला. यावेळी त्यांनी मतदारांना येत्या निवडणुकीत मतदान करण्याचे आवाहन केले.