पिंपरी-चिंचवडमध्ये मतदार जनजागृतीसाठी भव्य बाईक रॅलीचे आयोजन

 

पिंपरी(प्रतिनिधी): आगामी विधानसभा निवडणूक २०२४ मध्ये मतदानाचे प्रमाण वाढविण्याच्या उद्देशाने पिंपरी-चिंचवड महानगरपालिकेतर्फे भव्य बाईक रॅलीचे आयोजन करण्यात आले. निगडी येथील भक्तीशक्ती चौकात आयुक्त शेखर सिंह यांच्या हस्ते हिरवा झेंडा दाखवून रॅलीला सुरुवात झाली. या जनजागृती अभियानाद्वारे नागरिकांना मतदान करण्यासाठी प्रोत्साहित करण्याचा महत्त्वाचा संदेश देण्यात आला.

जिल्हाधिकारी कार्यालयाने मतदानाच्या दिवशी (२० नोव्हेंबर) सर्व शासकीय आणि खासगी आस्थापनांना कर्मचाऱ्यांना पगारी सुट्टी देण्याचे निर्देश दिले आहेत. "ही सुट्टी केवळ मतदानासाठी वापरावी," असे आवाहन आयुक्त शेखर सिंह यांनी नागरिकांना केले आहे.

रॅलीमध्ये ३५० पेक्षा अधिक बाईक रायडर्सनी उत्साहाने सहभाग घेतला. पिंपरी, भोसरी, आणि चिंचवड या तीन विधानसभा मतदारसंघातून ३३ किलोमीटर अंतर पार करत रॅलीने लांडेवाडी, भोसरी येथील छत्रपती शिवाजी महाराज पुतळ्यास अभिवादन केले आणि कै. अंकुशराव लांडगे नाट्यगृह येथे समारोप झाला.

निगडी येथील भक्तीशक्ती चौकात जीएनडी ग्रुपच्या बालकलाकारांनी मतदार जनजागृतीपर नृत्य सादर केले. तसेच, उपस्थित नागरिकांनी मतदान करण्याची शपथ घेतली, ज्यामुळे उपस्थितांमध्ये मतदानाबद्दलची उत्सुकता वाढली.