फेक कॉलद्वारे मतदारांची फसवणूक; निवडणूक आयोगाकडे तक्रार दाखल

 

चिंचवडमध्ये बनावट कॉलचा खेळ; महाविकास आघाडीचा आरोप

चिंचवड - चिंचवड मतदारसंघात डॉ. अमोल कोल्हे यांच्या नावाने फेक कॉल करून मतदारांची दिशाभूल करण्याचा धक्कादायक प्रकार समोर आला आहे. याप्रकरणी महाविकास आघाडीचे उमेदवार राहुल कलाटे यांच्या समर्थकांनी निवडणूक निर्णय अधिकाऱ्यांकडे तक्रार दाखल केली आहे.

मतदारांना येत असलेल्या कॉलमध्ये "मी डॉ. अमोल कोल्हे बोलतोय" असे सांगून महायुतीचे उमेदवार शंकर जगताप यांना मतदान करण्याचे आवाहन केले जात आहे. ट्रू कॉलरवर डॉ. कोल्हे यांचे नाव दिसत असल्याने अनेक मतदार हा कॉल स्वीकारत आहेत.

राष्ट्रवादी काँग्रेसच्या कार्यकर्त्यांनी या प्रकरणाची खातरजमा केली असता हा संपूर्ण प्रकार फसवणुकीचा असल्याचे स्पष्ट झाले. त्यानंतर त्यांनी तात्काळ निवडणूक निर्णय अधिकाऱ्यांकडे धाव घेत तक्रार नोंदवली.

राहुल कलाटे यांचे उमेदवार प्रतिनिधी रोहन जाधव यांनी या प्रकरणाचा निषेध करत कडक कारवाईची मागणी केली आहे. तर उमेदवार राहुल कलाटे यांनी "पराभवाच्या भीतीपोटी भाजप अशा मार्गांचा अवलंब करत असून जनता याला भीक घालणार नाही" असे म्हटले आहे.

या प्रकरणाने मतदारसंघात खळबळ उडाली असून निवडणूक आयोगाकडून कारवाईची अपेक्षा व्यक्त होत आहे.