"मविआमध्ये मुख्यमंत्रीपदासाठी आठजणांची रस्सीखेच"
उमरेड - महाविकास आघाडीमध्ये मुख्यमंत्रीपदासाठी आठ दावेदार असून, त्यांच्यात सत्तेसाठी वाद सुरू असल्याची टीका भाजपा प्रदेशाध्यक्ष चंद्रशेखर बावनकुळे यांनी केली. उमरेड विधानसभा क्षेत्रातील बेला, सिर्सी, नांद आणि कुही येथील प्रचारसभांमध्ये ते बोलत होते.
"महायुती विकासासाठी निवडणूक लढवत असताना, महाविकास आघाडीचे नेते केवळ मुख्यमंत्रीपदासाठी लढत आहेत," असा थेट आरोप बावनकुळे यांनी केला. त्यांनी पुढे सांगितले की, काँग्रेस आघाडीचे सरकार आल्यास लाडकी बहीण योजना, शेतकऱ्यांना मोफत वीज पुरवठा यांसारख्या कल्याणकारी योजना बंद होण्याचा धोका आहे.
भाजपा उमेदवार सुधीर पारवे यांच्या प्रचारादरम्यान बेला येथे काँग्रेस व राष्ट्रवादी काँग्रेसच्या अनेक पदाधिकाऱ्यांनी भाजपात प्रवेश केला. उमरेड मतदारसंघात 78 हजार महिलांना लाडकी बहीण योजनेचा लाभ मिळवून देण्यात पारवे यांचे योगदान असल्याचेही बावनकुळे यांनी नमूद केले.
दरम्यान, राहुल गांधी यांनी नागपूर येथील सभेत संविधानाचे मुखपृष्ठ असलेली कोरी पुस्तिका वाटून संविधानाचा अपमान केल्याचा आरोपही त्यांनी केला.
Reviewed by ANN news network
on
११/१०/२०२४ ०४:१५:०० PM
Rating:
कोणत्याही टिप्पण्या नाहीत: